छोरी जन्माएको भन्दै घर निकाला, घर फिर्ता आए १० लाख ल्याउनुपर्ने
इनरुवा । सुनसरी जिल्लाको दुहबी नगरपालिका-६ कि राधा साह छोरी जन्मिएकोमा दुई वर्षदेखि घरेलु हिंसाबाट पीडित भएका छन् । सुनसरीको इटहरीमा पत्रकार सम्मेलन गरेर साहले आफू छोरी जन्माएकै कारण घरबाट निकाला भएको र अपहेलितसमेत भएको बताए । उनले छोरी जन्मिएका कारण श्रीमान् र घरपरिवारबाट अपहेलित हुँदै अहिले माइतमा बस्न बाध्य भएको बताए । साहले २०७२ सालमा २० वर्षको उमेरमा रामधुनी नगरपालिका-३, प्रिपाहका २४ वर्षीय गोपाल साहसँग विवाह गरेका थिए । विवाहपछि छोरी जन्मिएको भन्दै श्रीमानले कुटपिट गर्ने गरेको र घरबाट निकालेको पीडित साहले पत्रकार सम्मेलनमा बताएका छन् । दुई वर्षदेखि दुहबीमा रहेकी आमाको घरमा बस्दै आएको बताउँदै साहले घर फिर्ता आए १० लाख रुपैयाँ लिएर आउनुपर्ने माग श्रीमानले गरेको बताए । आफू पीडित भएर पनि सम्बन्धित निकायले न्याय र चासो नदिएका कारण बाध्य भएर पत्रकार सम्मेलन गर्नुपरेको पीडित साहले बताएका छन् । दुई वर्षकी छोरीसहित पत्रकार सम्मेलनमा उपस्थित भएकी साहले आफू अन्यायमा परेको भन्दै दुहबी नगरपालिकाको न्यायिक समितिमा निवेदन दिए पनि सुनुवाइ नभएको गुनासो गरेका छन् । आफू छोरी जन्माएकै कारण श्रीमान् र घरपरिवारबाट अलग भएकोमा उनले दुःख व्यक्त गरेका छन् । उनले श्रीमानसहित ससुरा ललित साह तथा सासु छिनादेवी साहले घरबाट निकालेको र घरमा फिर्ता आए १० लाख रुपैयाँ ल्याउन पटक पटक दबाब दिएको बताए । पीडित साहले श्रीमानकै घरमा बस्न पाउनुपर्ने मागसमेत गरेका छन् । रासस
महिला उद्यमशीलता विकास कोषको सीमा १० देखि २५ लाख पुर्याउन माग
काठमाडौं । महिला उद्यमीहरुले महिला उद्यमशीलता विकास कोषको ऋण सीमा बढाउनु पर्ने माग राखेका छन् । उद्यमीहरुले अहिलेको कोषको सीमालाई बढाएर १० लाख देखि २५ लाख पुर्याउनु पर्ने माग राखेका हुन् । अहिलेको कोषको सीमा १ लाख देखि ५ लाख रुपैयाँसम्म रहेको छ । महिला उद्यमीले आफ्नो व्यवसाय चुस्त रुपमा सञ्चालन गर्न, कच्चा पदार्थ किन्न, नयाँ प्रवित्रिमा लगानी गर्न र व्यापार विस्तार गर्न आदि कार्यका कोषको सीमा बढाउन बलियो आवाज उठाएका हुन् । जसले प्रभावकारी ढंगबाट रकम उपयोग गरी देशमा रोजगारी श्रृजना बढाउन सक्ने उनीहरुको विश्वास छ । नेपाल भरिका उद्यमी महिलाहरुको प्रतिनिधि छाता संस्थाको रुपमा कार्यरत महिला उद्यमी महासंघ नेपालले महिला उद्यमीहरुलाई १ लाख देखि ५ लाख रुपैयाँसम्म ऋण दिँदै आएको छ । नेपाल घरेलु तथा साना उद्योग महासंघको संयुक्तपहलमा नेपाल सरकारले ३ वर्षका लागि ६ प्रतिशत ब्याजदरमा सो मात्राको ऋण उपलब्ध गराएको छ । जसले समयमै किस्ता भुक्तानी गर्छन् उनीहरुलाई ब्याजमा १ प्रतिशत छुट दिइने महासंघले जनाएको छ । हालसम्म वितरण भएको जम्मा रकम १५ करोड ७० लाख रुपैयाँ रहेको छ । महिला उद्यमशीलता विकास कोष(मउविको) कार्यक्रम वि.स.२०७२ सालमा १० जिल्लाबाट सुरु गरिएको थियो । २०७१/७२ सालमा नेपाल सरकारले २ करोड र कुल १९१ महिला उद्यमीलाई १ करोड ४३ लाख रुपैयाँ ऋण प्रदान गरिएको थियो । २०७२/७३ मा ४ करोड छुट्याइएको थियो । २०७२ सालको भुकम्प पश्चात थप ६ जिल्लाका २२९ महिला उद्यमीलाई २ करोड ७५ लाख ऋण प्रदान गरिएको र २०७३/७४ मा १८ करोड छुट्याइएको महासंघले जनाएको छ । त्यसैगरी, महासंघ नेपालले यो कार्यक्रम नेपालका ७७ जिल्लामा नै कार्यान्वयन गर्ने योजना बनाएको छ ।
ब्राजिलमा हुने कोपा अमेरिका जित्न मेसी र गर्डिवाला चाहिन्छ: अर्जेन्टिना फुटबल एशोसियसन
काठमाडौं । अर्जेन्टिना फुटबल एशोसियसनले प्रशिक्षक जोर्जे साम्पोलीलाई बर्खास्त गरेपछि नयाँ प्रशिक्षकको खोजी सुरु गरेको छ ।एशोसियसनले प्रशिक्षकको लागि पहिलो प्रथमिकतामा इंग्लिस क्लब म्यान्चेस्टर सिटीका प्रशिक्षक पेप गर्डिवालालाई राखेको छ । एशोसियसनले लियोनल मेसिको सम्बन्ध गर्डिवासँग राम्रो रहेको बताउँदै उनलाई प्रशिक्षक बनाउन प्रयास थालेको छ । मेसि र गर्डिवालाले बार्सिलोनामा ४ वर्ष सँगै बिताएका थिए । उनीहरुबिचको सम्बन्ध अझै पनि उत्कृष्ट रहेको छ । गर्डिवालालाई प्रशिक्षक बनाउन अर्जेन्टिनालाई सजिलो छैन । उनी सिटीमा उच्च सुविधाकासाथ आक्रामक फुटबल खेलाइरहेका छन् । उनले सन् २०१७ १८ को प्रिमियर लिग समेत सिटीलाई जिताइसकेका छन् । उता एशोसियसनले भने पुरै शक्ति लगाएर गर्डिवालालाई प्रशिक्षक बनाउने तयारी थालेको छ । केहि समयअघि मात्रै गर्डिवालाले अर्जेन्टिानाका प्रशिक्षक बन्ने इच्छा प्रकट गरेको एशोसियसनले दाबी गरेको छ । कोपा अमेरिका सन् २०१९ मा ब्राजिलमा हुदैं छ । प्रतियोगितामा १२ देशले सहभागिता जनाउने छन् ।
