जनशक्ति : रोजगारी

काठमाडाैं । राष्ट्रियसभाको प्रत्यायोजित व्यवस्थापन तथा सरकारी आश्वासन समितिले रोजगार अनुमति प्रणाली (इपिएस) अन्तर्गत भाषा र सीप परीक्षा उत्तीर्ण युवाहरु डेढ वर्षदेखि कामका लागि दक्षिण कोरिया जान नपाएको विषयमा गम्भीर हुन नेपाल सरकारलाई निर्देशन दिएको छ । सिंहदरबारस्थित समितिमा आज भएको बैठकमा सम्बन्धित मन्त्रालय र निकाय तथा पीडित पक्षको छलफलपछि कोभिड–१९ लाई मात्रै कारण बनाएर ती युवालाई रोक्न नहुने जनाउँदै छिटो र सरल माध्यमबाट पठाउन निर्देशन दिएको हो । समितिका सभापति रामनारायण बिडारीले प्रभावित युवाहरूले विभिन्न मन्त्रालयमा धाउँदा पनि काम नभएपछि आफूसमक्ष उजुरी दिएकाले तत्काल यो प्रक्रिया अघि बढाउनुपर्ने बताए । दक्षिण कोरियाले नेपाली कामदार लिन तयार रहेको र कोभिड बीमा गराई त्यहाँ पुगेपछि क्वारेन्टिनमा बस्ने गरी सिधा हवाई सम्पर्कमार्फत पठाउन आग्रह गरेकामा दोस्रो लहरको सङ्क्रमणका कारण ढिलाइ भएको सरकारी अधिकारीले जनाएका थिए । श्रम तथा सामाजिक सुरक्षा मन्त्रालयका सचिव सूर्यप्रसाद गौतमले सिधा हवाई सम्पर्कका लागि नेपाल एयरलाइन्सलाई अनुमति नभएकाले कोरियाली विमानबाट पठाउने प्रक्रिया शुरु गरिएको जानकारी दिए । समितिका सदस्य राधेश्याम अधिकारीले कोरियास्थित नेपाली दूतावासले पनि यसबारे पहल गर्नुपर्ने बताउनुभयो भने अर्का सदस्य डा खिमलाल देवकोटाले पीडित युवालाई मन्त्रालय र संसदीय समितिमा धाउन लगाउनु गलत भएकाले सम्बन्धित निकायका अधिकारीले नै पहल गर्नुपर्ने बताए । रासस

काठमाडौं । सामाजिक सुरक्षा कोषबाट नियमित पेन्सन पाउनेको संख्या ३३ पुगेको छ । कोषमा आवद्ध भएका योगदानकर्ताको पति वा पत्नी तथा आश्रित परिवार गरी सो संख्यामा पेन्सन पाउन थालेका हुन् । कोषका अनुसार २ महिना (दुई किस्ता) मात्रै कोषमा रकम योगदान गरेका योगदानकर्ताको पति वा पत्नी तथा आश्रित परिवारले पेन्सन पाइरहेका छन् । यस्तै, योगदानकर्ताको सन्ततिले शैक्षिक बृत्ति अन्तरगतको सुविधा पनि पाइरहेका छन् । कोषले दिएको जानकारी अनुसार योगदानकर्ता प्रकाश तामाङ मोक्तानले कोषमा २ महिना मात्रै योगदान गरेका थिए । उनको निधनपछि कोषले २०७६ असोजदेखि उनका बाबु आमालाई ‘आश्रित बाबु आमाले पाउने सुविधा’ अन्तरगत मासिक १० हजार २ सय रुपैयाँ रकम दिइरहेको छ । यस्तै, २ महिना मात्रै रकम योगदान गरेका रुपेन्द्र थापाकी श्रीमतीले पनि कोषबाट मासिक पेन्सन पाउँदै आएकी थिइन् । योगदानकर्ता थापाको निधनपछि उनकी श्रीमतीले २०७६ असोजदेखि मासिक १७ हजार १ सय रुपैयाँ पेन्सन पाउँदै आएकी थिइन् । थापाकी श्रीमतीको पनि केही समय अघि निधन भइसकेको छ । कोषका योजना अनुसार योगदानकर्ताका परिवारले लाभ प्राप्त गरिरहेको कोषको तथ्यांकले देखाएको छ । कोषका अनुसार योगदानकर्ता अनिता रिजालको निधनपछि उनका श्रीमान्ले २०७७ असारदेखि मासिक २३ हजार ५२२ रुपैयाँ र उनका एक सन्तानले शैक्षिक वृत्ति योजना अनुसार मासिक १५ हजार ६८२ रुपैयाँ पाउँदै आएका छन् । रिजालले कोषमा ११ महिना योगदान गरेकी थिइन् । योगदानकर्ता आइतसिंह लोप्चनको निधनपछि उनकी श्रीमतीले २०७६ पुसदेखि मासिक १४ हजार २०५ रुपैयाँ पेन्सन पाइरहेकी छन् । लोप्चनले कोषमा ५ महिनाको रकम योगदान गरेका थिए । अर्का योगदानकर्ता उत्तरबहादुर थिङको निधनपछि उनकी श्रीमतीले मासिक १२ हजार ३ सय ९० रुपैयाँ पेन्सन पाइरहेकी छिन् । थिङले कोषमा जम्मा ४ महिना मात्रै कोषमा रकम जम्मा गरेका थिए । अर्का योगदानकर्ता कामेश्वर यादबको निधन भएपछि उनकी श्रीमतीले २०७७ कात्तिकदेखि मासिक ५ हजार ८२० रुपैयाँ पेन्सन पाइरहेकी छन् । यादबले कोषमा १५ महिनाको रकम जम्मा गरेका थिए । कोषमा १२ महिना मात्रै रकम जम्मा गरेका तेजबहादुर शाक्यको निधनपछि उनकी श्रीमतीले २०७७ कात्तिकदेखि मासिक ८ हजार ९७४ रुपैयाँ पेन्सन पाइरहेकी छन् । कोषमा ४ किस्ता मात्रै रकम योगदान गरेका दलबहादुर खड्काकी श्रीमतीले मासिक ४ हजार ८७७ रुपैयाँ पेन्सन लिइरहेकी छन् भने उनका २ सन्तानले मासिक ४ हजार ८७७ रुपैयाँ नै शैक्षिक बृत्ति वापतको रकम पाइरहेका छन् । कोषमा १७ महिना योगदान गरेका ध्रुवकुमार कार्कीको निधन भएपछि उनकी श्रीमतीले २०७७ पुसदेखि कोषबाट मासिक ८ हजार ८९२ रुपैयाँ पेन्सन पाइरहेकी छन् । कोषमा ७ महिना योगदान गरेका निर्मल कुमार थापाको निधनपछि उनकी श्रीमतीले मासिक ५ हजार १ सय रुपैयाँ पेन्सन र उनका एक सन्ततिले मासिक ३ हजार ४ सय रुपैयाँ शैक्षिक बृत्तिवापत पाइरहेका छन् । कोषले अहिले मासिक ३ लाख ४ हजार रुपैयाँभन्दा बढी आश्रित परिवारलाई पेन्सन र सन्ततिलाई शैक्षिक वृत्ति वापतको रकम दिइरहेको छ । यो संख्या बढिरहेको कोषले जानकारी दिएको छ । कोषका अनुसार थप ३७ जना योगदानकर्ताको आश्रित परिवार कोषबाट सुविधा लिने प्रक्रियामा छ ।

काठमाडौं । इजरायलमा १ हजार नेपाली कामदारका लागि आवेदन खुलेको छ । वैदेशिक रोजगार विभागले १ हजार जना नेपाली केयरगिभरका लागि आवेदन खुलेको हो । विभागले आज सूचना जारी गर्दै २१ दिन भित्र विभागको वेभसाइट मा अनलाइन आवेदन दिन सक्ने जनाएको छ । सूचनामा ७० प्रतिशत महिला र ३० प्रतिशत पुरुष लैजाने भनिएको छ । विभागका अनुसार केयरगिभरको मासिक तलब एक हजार छ सय अमेरिकी डलर अर्थात एक लाख ८८ हजार नेपाली रुपैयाँ हुनेछ । जसमा ओभर टाइम र सेवासुविधा इजरायली सरकारको नियमअनुसार हुने छ । यस्ता छन् योग्यता नेपाली नागरिक २५ वर्ष उमेर पुरा भई ४५ वर्ष ननाघेको । उचाई कम्तिमा एक दशमलव पाँच मिटर (चार दशमलव नौ फिट) । तौलः ४५ केजी । शैक्षिक योग्यता कम्तीमा दश कक्षा उत्तीर्ण गरी अनमी वा सिएमए सम्बन्धि विषयमा १५ महिनाको अध्ययन पूरा गरेको अथवा १२ कक्षा वा सो सरहको शैक्षिक योग्यता हासिल गरी सरकारबाट मान्यता प्राप्त प्रशिक्षण केन्द्रमार्फत तालिम लिएको। अंग्रेजी भाषामा दक्ष। शारीरिक तथा मानसिक रुपमा स्वस्थ र असल चरित्र भएको।