काठमाडौंमा १०० ठूला विद्युतीय बस थपिँदै, चार्जिङ स्टेसनका लागि जग्गा खोज्दै
काठमाडौं । काठमाडौं उपत्यकामा थप एक सय स्मार्ट विद्युतीय बस सञ्चालनका लागि आवश्यक जग्गा व्यवस्थापन र अन्य प्राविधिक पक्षका विषयमा प्रधानमन्त्री तथा मन्त्रिपरिषद्को कार्यालयमा सम्बन्धित निकायका प्रतिनिधिसँग छलफल भएको छ । छलफलमा साझा यातायातका तर्फबाट प्रमुख कार्यकारी अधिकृत भूपेन्द्र अर्यालले नेपाल सरकारको सहजीकरणबाट निकट भविष्यमा उपलब्ध हुने विद्युतीय सवारी साधनको सञ्चालन र व्यवस्थापनका विविध आयाम माथि प्रस्तुतीकरण दिए । सो क्रममा विद्युतीय सवारीको दिगो व्यवस्थापन र प्रयोगका सन्दर्भमा साझा यातायातलाई विद्युतीय सवारी सञ्चालनका लागि आवश्यक पूर्वाधार निर्माणका लागि जग्गा व्यवस्थापन मुख्य समस्याको रुपमा रहेको उल्लेख गरिएकाे छ । छलफलका क्रममा नयाँ विद्युतीय बसहरू सञ्चालनका लागि आवश्यक पार्किङ तथा होल्डिङ सेन्टर, चार्जिङ स्टेसन, मर्मत केन्द्र तथा स्पेयर्स पार्टस्लगायतका विषयमा चर्चा भएको प्रधानमन्त्री केपी शर्मा ओलीका निजी सचिव विनोद बहादुर कुँवरले जानकारी दिए । साझा यातायातलाई आवश्यक जग्गाको खोजी र आवश्यक सहजीकरणको लागि प्रधानमन्त्री कार्यालयका सचिव राजकुमार श्रेष्ठ, सहसचिव नमराज घिमिरेलाई अन्तर निकाय सहजीकरण र जग्गा यकिन गर्न काम गर्ने गरी तोक्ने निर्णय गरेको छ । उपत्यकाभित्र प्राप्त हुन सक्ने विभिन्न जग्गाका विषयमा व्यापक छलफल गरेको बैठकले त्यस्तो जग्गा प्राप्तिका लागि सम्बन्धित निकायसँग आवश्यक सहजीकरण गर्न सचिव श्रेष्ठलाई जिम्मेवारी दिइएको छ । काठमाडौं उपत्यकाको बढ्दो सार्वजनिक यातायातको चापलाई न्यूनीकरण गर्ने तथा विकसित शहरी यातायात प्रणालीसमेत अवलम्बन गर्ने मुख्य ध्येयसहित सरकारले केही महिनाभित्रै काठमाडौं उपत्यकामा थप १०० वटा ठूला यात्रुवाहक बस सञ्चालनको गृहकार्य गरेको हो । छलफलमा प्रधानमन्त्री केपी शर्मा ओलीका मुख्य सल्लाहकार विष्णुप्रसाद रिमाल, आर्थिक, विकास सल्लाहकार डा युवराज खतिवडा, जनसम्पर्क सल्लाहकार किरण पौडेल, भूमि व्यवस्था सहकारी तथा गरिबी निवारण मन्त्रालयका सचिव केदारनाथ शर्मा, यातायात व्यवस्था विभागका महानिर्देशक राजीव पोखरेललगायत सहभागी थिए ।
अटो हब थापाथलीमा जगदम्बा मोटर्सकाे अत्याधुनिक शोरुम, थप १५ ठाउँमा खोल्दै
काठमाडौं । नेपालका लागि प्रोटोन गाडीको आधिकारिक बिक्रेता जगदम्बा मोटर्सले काठमाडौंको अटोमोबाइल हब मानिने थापाथलीमा आफ्नो नयाँ अत्याधुनिक शोरुम सञ्चालनमा ल्याएको छ । आइतबार एक कार्यक्रमबीच कम्पनीले आफ्नो इलेक्ट्रिक गाडी ‘प्रोटोन ईमास ७’ को नयाँ शोरुम उद्घाटन गरेको हो । कम्पनीका कार्यकारी निर्देशक अखिल गुप्ता, वरिष्ठ उपाध्यक्ष राजु भेटवाल, चर्चित गायिका तथा अभिनेत्री केकी अधिकारी र गायक तथा संगीतकार बृजेश श्रेष्ठले संयुक्त रूपमा रिबन काटेर तथा पानसमा बत्ती बालेर शोरुमको शुभारम्भ गरे । कार्यक्रममा बोल्दै जगदम्बा मोटर्सका कार्यकारी निर्देशक अखिल गुप्ताले थापाथली जस्तो प्रमुख व्यापारिक केन्द्रमा शोरुम स्थापना गर्न पाउनु कम्पनीका लागि गौरवको विषय भएको बताए । उनले प्रोटोन ईमास-७ मलेसिया र चीनमा आफ्नो सेगमेन्टमा सबैभन्दा बढी बिक्री हुने इलेक्ट्रिक गाडी रहेको जानकारी दिँदै यसको सफलता विश्वव्यापी रहेको उल्लेख गरे । गुप्ताले भने, ‘हामीले सन् २०२५ भित्र नक्साल र थापाथलीसहित नेपालभर १५ वटा नयाँ शोरुम खोल्ने योजना बनाएका छौँ । केही महिनाभित्रै हाम्रो सञ्जाल देशभर फैलनेछ ।’ कम्पनीका वरिष्ठ उपाध्यक्ष राजु भेटवालले नेपालको अटोमोबाइल बजार अत्यन्तै चुनौतीपूर्ण रहेको बताए । उनले भने, ‘यो कठिन बजारमा ग्राहकलाई उत्कृष्ट सेवा दिन हामीले ‘कम्पनी आफैंले स्वामित्व लिई सञ्चालन गर्ने’ योजना बनाएका छौं ।’ उनले आगामी महिनाहरूमा भक्तपुर, पोखरा, नारायणघाट र नेपालगञ्जमा पनि थ्रीएस (३ एस) सुविधासहितका शोरुमहरू खोल्ने तयारी भइरहेको जानकारी दिए । कार्यक्रममा चर्चित अभिनेत्री केकी अधिकारीले प्रोटोन ईमास ७ गाडी खरिद गरेकी छन् । उनलाई कार्यकारी निर्देशक गुप्ता र वरिष्ठ उपाध्यक्ष बेटवालले गाडीको हस्तान्तरण गरे । गाडी बुझ्दै अभिनेत्री अधिकारीले गाडीको क्लासिक डिजाइन, आरामदायी भित्री भाग र शंकर ग्रुप जस्तो विश्वसनीय संस्थासँग जोडिएको ब्रान्ड भएकाले आफूले प्रोटोन रोजेको बताइन् । उनले भनिन्, ‘आज तुलसी एकादशीको शुभ दिनमा मैले यो गाडी पाएकी छु । यो गाडीको बनावट र विशेषताहरूले मलाई पहिलो नजरमै आकर्षित गर्यो । मलाई विश्वास छ, यसले मेरो यात्रालाई अझ सहज र सुखद बनाउनेछ । ’ कार्यक्रममा गायक तथा संगीतकार बृजेश श्रेष्ठले आफुले पहिलेदेखि नै प्रोटोन ईमास ७ को गाडी चलाइरहेको अनुभव सुनाए । उनले प्रोटोन ईमास ७ निकै सुरक्षा र यात्राका लागि भरपर्दो भएको दाबी गरे । उनले भने, ‘यो गाडीको फाइभ-स्टार सुरक्षा रेटिङ र लामो यात्राका लागि उपयुक्त हुनु मेरो पहिलो प्राथमिकता हो । मेरो परिवार पनि यो गाडीबाट अत्यन्तै खुसी छ । यसको पफर्मेन्स र आरामले म पूर्ण रूपमा सन्तुष्ट छु । ’ प्रोटोन सन् १९८३ मा मलेसियाको पहिलो राष्ट्रिय कारको रूपमा स्थापना भएको र सन् २०१७ मा चिनियाँ अटोमोबाइल ’जिली’ सँगको साझेदारीपछि प्रविधि र नवीनतामा ठूलो फड्को मारेको उनले बताइन् । ईमास ७ मा १६० किलोवाटको शक्तिशाली मोटर, द्रुत गतिको चार्जिङ क्षमता भएको ब्लेड ब्याट्री र सुरक्षाका लागि ’ सेल-टु-बडी’ जस्ता अत्याधुनिक प्रविधिहरू जडान गरिएको छ । यो मलेसियाको ब्राण्ड हो । दक्षिण एशियासहितका राइट ह्याण्ड ड्राइभ भएका देशमा प्रोटोन इमास-७ उपलब्ध रहेको कम्पनीले जनाएको छ । कम्पनीका अनुसार यो दुई ब्याट्री अप्सनमा छ भने प्राइम र प्रिमियम गरी दुई भेरियन्टमा उपलब्ध छ । दुबै भेरियन्टमा फ्रन्ट ह्वील ड्राइभ १६० किलोवाट क्षमताको पावरफुल मोटर दिइएको छ । यसको पीकटर्क भने ३२० न्यूटन मिटर छ । इमास–७ ले शून्यबाट १०० को स्पीड भेट्टाउन ६.९ सेकेन्ड मात्रै लगाउने कम्पनीले दाबीको छ । एसयूभीको टप स्पीड १७५ किलोमिटर प्रतिघन्टा छ । यस्तै, इमास-७ को भेरियन्ट अनुसार ४९.५२ र ६०.२२ किलोवाट आवर क्षमताको ‘एजिस सर्ट ब्लेड ब्याट्री’ दिइएको छ । यी दुई ब्याट्रीको रेन्ज क्रमशः ३४५ र ४१० किलोमिटर रहने डब्लूएलटीपीले प्रमाणित गरेको छ । कम्पनीका अनुसार उक्त ब्याट्रीलाई ९२१ पटक पुरै चार्ज र डिस्चार्ज गर्दा ९०.५ प्रतिशत ब्याट्री हेल्थसहित ४ लाख किलोमिटर सजिलै गुडाउन सकिने कम्पनीले बताएको छ । मलेसियन बजारमा २३ हजारदेखि २७ हजार अमेरिकी डलर मूल्य पर्छ ।
एमएडब्लूले बालकुमारी र बसुन्धरामा अत्याधुनिक ईभी सर्भिस सेन्टर सञ्चालन गर्ने
काठमाडौं । एमएडब्लू वृद्धिले बालकुमारी र बसुन्धरामा दुईवटा अत्याधुनिक, विद्युतीय सवारी साधन ९ईभी० मा केन्द्रित सर्भिस सेन्टर सञ्चालन गर्ने भएको छ । ग्राहकलाई अझ राम्रो सेवा दिन र आफ्टर सेल्स सर्भिसलाई अझ सशक्त बनाउने उद्देश्यले सर्भिस सेन्टर सञ्चालनमा ल्याउन लागिएको एमएडब्लु वृद्धिले जनाएको छ। रणनीतिक रूपमा शहरका प्रमुख स्थानहरूमा स्थापना हुने यी सर्भिस सेन्टरहरूले एमएडब्लूका ग्राहकलाई अझै सहज, छिटो र विशेषज्ञस्तरको सेवा प्रदान गर्ने विश्वास लिइएको छ । डीपल, डोङ्गफेङ्ग र सेरेस ब्रान्डका विद्युतीय सवारीसाधनहरूका लागि मात्र यो सर्भिस सेन्टर समर्पति हुने जनाइएको छ । सर्भिस सेन्टरमा २५ वटा विशेष सर्भिस बेहरू रहनेछन् जसले धेरै संख्याका गाडीहरूलाई एकैपटक सजिलो, सूक्ष्म र दक्ष रूपमा मर्मत गर्न सक्ने क्षमता राख्नेछन्। एक्स्पर्ट केयरका लागि यी नयाँ केन्द्रहरू एमएडब्लूका दोस्रो र तेस्रो ईभी डेडीकेटेड सर्भिस वर्कशप हुनेछन् । यस विस्तारसँगै एमएडब्लू वृद्धिको ईभी सर्भिस सेन्टरको संख्या तीन पुग्नेछ । यी नयाँ सर्भिस सेन्टरहरू आगामी ३ देखि ५ महिनाभित्र पूर्ण रूपमा सञ्चालनमा आउने अपेक्षा गरिएको छ ।
