अस्थायी प्रहरी चौकी निर्माण गर्दा झडप, प्रहरीसहित ६ जना घाइते
काठमाडौं । बाजुराको हिमाली गाउँपालिकामा अस्थायी प्रहरी चौकी निर्माण र सिमानाको विषयलाई लिएर झडप भएको छ । झडपमा जनप्रतिनिधि, कर्मचारी र प्रहरीसहित ६ जना घाइते भएका छन् । घाइते हुनेमा ३४ वर्षीय पेमा गारा गुरुङ, ३३ वर्षीया लक्ष्मी गुरुङ, नरबहादुर गुरुङ, मीनु कुँवर, प्रहरी महेश धामी र कुलबहादुर थापा रहेका छन् । हिमाली गाउँपालिका ३ लाम्पाटास्थित अस्थायी प्रहरी चौकी निर्माण गर्दा स्थानीयहरूबीच सिमाना र निर्माणसम्बन्धी विवाद उत्पन्न भएको थियो । आक्रोशित समूहले निर्माण सामग्री समेत फालिदिएपछि हिमाली गाउँपालिकाका अध्यक्ष गोविन्द बहादुर मल्लले प्रहरीलाई जानकारी दिएका थिए । हिमाली गाउँपालिकाका अध्यक्ष मल्ल र ‘हाम्रो सुदूरपश्चिम हामी चिनाउँछौं’ अभियानमा रहेका धनगढी उपमहानगरपालिकाका नगर प्रमुख मेयर गोपाल हमालसहितको ४० जनाको भ्रमण टोली पनि घटनास्थल पुगेको थियो । ड्रोनबाट भिडियो खिच्न थालेपछि हुम्लाको खार्पुनाथ गाउँपालिका २ थालीका ४०–५० जना स्थानीय अचानक आक्रोशित भएका जिल्ला प्रहरी कार्यालयका सूचना अधिकारी नरेश बहादुर शाहीले जानकारी दिए । भनाभन र वादविवाद हुँदा दुवै पक्षबीच हातपात भएको उनले बताए ।
३० अंकले बढ्यो नेप्से, अप्पर लोहोरे खोलामा सकारात्मक सर्किट
काठमाडौं । बुधबार सेयर बजार दोहोरो अंकले बढेको छ । नेपाल स्टक एक्सचेन्ज (नेप्से) परिसूचक ३० अंकले बढेर २७५४ बिन्दुमा पुगेको छ । नेप्सेका अनुसार २४९ कम्पनीको सेयर मूल्य बढ्दा २१ कम्पनीको सेयर मूल्य घटेको छ । बुधबार ३४६ कम्पनीको १ करोड कित्ता सेयर किनबेच हुँदा ३ अर्ब ८० करोड रुपैयाँ बराबरको कारोबार भएको छ । जसमध्ये सबैभन्दा धेरै कारोबार कर्पोरेट डेभलपमेन्ट बैंकको भएको छ । कर्पोरेटको १७ करोड ८६ लाख रुपैयाँ बराबरको कारोबार भएको छ । साथै आँखु खोला जलविद्युतको १७ करोड ६५ लाख, एपीआई पावर कम्पनीको ११ करोड ३२ लाख, रिडि पावरको ११ करोड २५ लाख र नेसनल हाइड्रोको ९ करोड रुपैयाँ बराबरको कारोबार भएको छ । आजको कारोबारमा अप्पर लोहोरे खोला हाइड्रोपावरको सेयर मूल्य १५ प्रतिशतले बढेर सकारात्मक सर्किट लागेको छ । बुधबार सबै समूहका उपसूचकमा हरियाली छाएको छ । बैंकिङ ०.७३ प्रतिशत, डेभलपमेन्ट बैंकको ०.४४ प्रतिशत, फाइनान्स १.४० प्रतिशत, होटल एन्ड टुरिजम १.८९ प्रतिशत, हाइड्रोपावर १.८९ प्रतिशत, इन्भेष्टमेन्ट १.१५ प्रतिशत, लाइफ इन्स्योरेन्स ०.९७ प्रतिशत, उत्पादन तथा प्रशोधन १.१५ प्रतिशत, माइक्रोफाइनान्स ०.६२ प्रतिशत, म्युचल फन्ड ०.८२ प्रतिशत, नन लाइफ इन्स्योरेन्स ०.४४ प्रतिशत, अन्य १.०९ प्रतिशत र ट्रेडिङको १.५१ प्रतिशतले बढेका छन् ।
प्रतिष्ठित ‘इन्टरनेसनल बुकर प्राइज’ उपन्यास ‘ताइवान ट्राभलग’ लाई
काठमाडौं । ताइवानको परिकार र निषेधित प्रेमको कथामा आधारित उपन्यास ‘ताइवान ट्राभलग’ ले प्रतिष्ठित इन्टरनेसनल बुकर प्राइज जितेको छ । मन्दारिन चिनियाँ भाषाबाट अनुवाद गरिएको कुनै उपन्यासले यो सम्मान पाएको यो पहिलो पटक हो । यो उपन्यास ताइवानी लेखक याङ सुआङ जीले लेखेकी हुन् भने ताइवानी–अमेरिकी नागरिक लिन किङले अंग्रेजीमा अनुवाद गरेकी हुन् । यसको कथा सन् १९३० को दशकको ताइवानको पृष्ठभूमिमा आधारित छ, जुन समयमा यो जापानी शासनको अधीनमा थियो । यसमा दुई महिलाको ताइवानका विभिन्न परिकारहरूको यात्रालाई देखाइएको छ । उपन्यासलाई यसरी प्रस्तुत गरिएको छ कि मानौं यो कुनै पुरानो यात्रा संस्मरणको अनुवाद हो, जसमा काल्पनिक फुटनोटहरूसमेत समावेश छन् । सन् २०२० मा यो पुस्तक प्रकाशित हुँदा धेरै पाठकहरूलाई यो वास्तवमै कुनै ऐतिहासिक दस्तावेज हो जस्तो लागेको थियो । जुरी प्यानलकी अध्यक्ष नताशा ब्राउनले यसलाई ‘अत्यन्तै आकर्षक र चलाखीपूर्वक लेखिएको परिष्कृत उपन्यास’ भनेकी छन् । कथाकी मुख्य पात्र काल्पनिक जापानी लेखिका आओयामा चिजुको हुन्, जो सरकारद्वारा प्रायोजित ताइवान यात्रामा निस्कन्छिन् । उनीसँग ताइवानी अनुवादक ओ चिजुरु हुन्छिन्, जसको प्रेममा उनी पर्छिन् । उपन्यासले यी दुई पात्रहरूका माध्यमबाट प्रेम, संस्कृति, औपनिवेशिक इतिहास र सत्ताजस्ता विषयहरूको खोजी गर्दछ ।
निर्वाचनसम्बन्धी दुई विधेयक प्रस्तुत
काठमाडौं । प्रतिनिधिसभाको आजको बैठकमा प्रधानमन्त्री वालेन्द्र शाहका तर्फबाट कानुन, न्याय तथा संसदीय मामिलामन्त्री सोविता गौतमले गत निर्वाचनका लागि जारी भएका अध्यादेशलाई प्रतिस्थापन गर्ने बनेका दुई विधेयक प्रस्तुत गरेकी छन् । मन्त्री गौतमले ‘प्रतिनिधिसभा सदस्य निर्वाचन (पहिलो संशोधन) विधेयक, २०८३’ र ‘मतदाता नामावली (पहिलो संशोधन) विधेयक, २०८३’ प्रस्तुत गरेकी हुन् । ती विधेयक प्रस्तुत गर्न अनुमति माग्ने प्रस्ताव बहुमतले स्वीकृत भएको थियो । प्रतिनिधिसभाको अर्को बैठक यही जेठ ७ गते बिहीबार बिहान ११ः०० बजे बस्नेछ ।
पशुपति विकास कोष अगाडि स्थानीयको धर्ना
काठमाडौं । तिलगङ्गाका स्थानियले आफूहरूलाई सुकुम्बासी भनेर हटाएको भन्दै पशुपति विकास कोष अगाडि धर्ना दिएका छन् । तिलगंगा बी–१३ का स्थानीयहरूले बुधबार कोष अगाडि धर्ना दिएका हुन् । उनीहरुले सरकारले आफूहरूलाई जग्गा सट्टा गर्ने सम्झौता विपरित बस्तीमा डोजर चलाएको आरोप लगाएका छन् । प्रभावित स्थानीयहरूले २०७१ सालमा गुरुयोजना लागू गर्दा कोषसँग सट्टाभर्नासम्बन्धी सम्झौता गरेको बताएका छन् । उनीहरुले आफूहरूसंग लालपुर्जा भएको दाबी गरेका छन् । केही भने गुठीको जग्गा रहेको छ । गुठीबाट नै जात्रापुजा लगायतका गतिविधी गर्ने गरिएको उनीहरुको भनाई छ । कोषले गूरुयोजना बनाउँदा स्थानीयलाई गोठटार क्षेत्रमा चार आना जग्गा उपलब्ध गराउने सहमति गरेको थियो । तर उक्त गुरुयोजना कार्यन्वयन नगरि बस्तीमा डोजर चलाईएको स्थानियको आरोप छ । स्थानियका अनुसार पशुपति बजार र वनकाली क्षेत्रका बासिन्दालाई भने सट्टा जग्गा उपलब्ध गराएको छ । तर आफूहरूलाई भने सुकुम्बासीको सूचीमा राखेर बस्तीमा डोजर चलाएको स्थानियको गुनासो छ । स्थानियका अनुसार कोषसँग सरकारी मूल्याङ्कनमा आफ्नो जग्गा बेच्ने र कोषले उपलब्ध गराउने जग्गा सरकारी मूल्याङ्कनमै खरिद गर्नेगरि सम्झौता भएको थियो । धर्नामा स्थानियले डोजर चल्यो बस्तीमा घर छैन, पीडितको सुन दिने कोही छैन !, हामी पीडित हौँ, पीडक होइनौँ, हामी सुकुम्बासी होइनौँ, स्थानिय हौँ, हाम्रो वस्ती, न खोलाको मापदण्ड, न सडकको मापदण्ड, न जोमिख क्षेत्र फेरि किन डोजर आतंक ?, पशुपतिको बृहतीकरण र विकासको विमित्त चक्रपथमा जोडिएको आफ्नो स्थान छोडी ६ किलोमिटर पर स्थान्तरण हुन राजी हुनु के हाम्रो गल्ती हो ?, गुरुयोजना अनुरुपको स्थानान्तराण खै ?, गूरुयोजनालाई आधार मानेर अधिकरण गर्ने तर गुरुयोजनामै लेखिएको स्थानान्तरणलाई नमान्ने ?, डोजर चल्यो १९ मा जानकारी आयो २१ मा !, विश्व सम्पदा सुचीभित्र डोजर चलाउन आदेश दिनेलाई कारबाही खोई ? लेखिएका प्लेकार्ड राखेका छन् ।
अवैध कन्सल्टेन्सी कारबाहीमा महासंघको समर्थन, निर्दोषलाई नतर्साउन माग
काठमाडौं । नेपाल सरकारले अनुमति नलिई गैरकानुनी रूपमा सञ्चालन भइरहेका कन्सल्टेन्सीमाथि सुरु गरेको कानुनी कारबाहीको प्रक्रियाप्रति ‘नेपाल शैक्षिक परामर्श व्यवसायी महासंघ’ ले पूर्णरूपमा समर्थन गरेको छ । बुधबार विज्ञप्ति जारी गर्दै महासंघले सरकारको कदमप्रति पूर्ण समर्थन जनाएको हो । गत जेठ १ गते गृह मन्त्रालयअन्तर्गतको नेपाल प्रहरी उपत्यका अनुसन्धान कार्यालय, टेकुले शिक्षा ऐन र निर्देशिका विपरीत कन्सल्टेन्सीहरूमाथि अनुसन्धान र कानुनी कारबाही अघि बढाएको विषयमा विज्ञप्ति जारी गरेपछि महासंघले आफ्नो औपचारिक धारणा सार्वजनिक गरेको हो । महासंघले सरकारको यस कदमले समग्र शैक्षिक परामर्श क्षेत्रलाई स्वच्छ, विश्वसनीय, उत्तरदायी र मर्यादित बनाउन सहयोग पुग्ने विश्वास व्यक्त गर्दै नेपाल सरकारप्रति धन्यवाद ज्ञापन गरेको छ । तर, कानुन कार्यान्वयन गर्ने बहानामा प्रक्रिया पुर्याएर दर्ता भएका र कानुनी रूपमा सञ्चालनमा रहेका निर्दोष व्यवसायीहरूलाई अन्याय हुन नदिन र उनीहरूको व्यावसायिक प्रतिष्ठामा आघात नपुर्याउन महासंघले सरकारको विशेष ध्यानाकर्षण गराएको छ । विज्ञप्तिमा भनिएको छ, ‘व्यक्तिगत असन्तुष्टि, भिसा अस्वीकृति, विदेश अध्ययनसम्बन्धी नियम उल्लंघन, विद्यार्थी भिसाको दुरुपयोग वा अन्य स्वार्थ प्रेरित गतिविधिका आधारमा व्यवसायीहरूलाई अनावश्यक दुःख दिने, मानसिक दबाब सिर्जना गर्ने, मोलमोलाइ गर्ने वा नियोजित ढंगले व्यावसायिक प्रतिष्ठामाथि प्रहार गर्ने प्रवृत्तिप्रति महासंघ गम्भीर छ ।’ महासंघले यस्ता विषयगत उजुरी र विवादहरूको समाधान गर्दा सम्बन्धित संघ वा महासंघका प्रतिनिधिहरूसँग समन्वय गरी निष्पक्ष, तथ्यपरक र कानुनसम्मत ढंगले प्रक्रिया अघि बढाउन गृह मन्त्रालय, जिल्ला प्रशासन कार्यालय, नेपाल प्रहरी र शिक्षा मन्त्रालयसँग अनुरोधसमेत गरेको छ । नेपालमा विगत ३६ वर्षदेखि शैक्षिक परामर्श व्यवसायले विद्यार्थीहरूलाई विदेश अध्ययनका लागि परामर्श सेवा प्रदान गर्दै आएको महासंघले जनाएको छ । हालै मात्र यस क्षेत्रलाई थप व्यवस्थित, मर्यादित र पारदर्शी बनाउन देशभरिका आठवटा प्रमुख संघहरू एकताबद्ध भएका छन् । महासंघमा ईक्यान, आइरिन नायर, जाल्सान, एपक्यान, केक्यान, एईक्यान र नेवा संघहरू रहेका छन् । यी आठवटै संघहरू मिलेर ‘नेपाल शैक्षिक परामर्श व्यवसायी महासंघ’ गठन भएको हो । यसमा आवद्ध आबद्ध देशभरिका सम्पूर्ण सदस्य कम्पनीहरू शिक्षा ऐन, २०२८, शैक्षिक परामर्श तथा भाषा शिक्षण सम्बन्धी निर्देशिका, २०७३ र सम्बन्धित प्रदेशको सामाजिक विकास मन्त्रालयबाट अनुमति लिएरै सञ्चालन भइरहेको महासंघले स्पष्ट पारेको छ । महासंघले सम्पूर्ण सदस्य संस्थाहरूलाई कुनै पनि प्रकारको भ्रम, डर वा मानसिक दबाबमा नपरी निर्धक्क भई सत्य र तथ्यमा आधारित सेवा तथा पूर्वतयारी कक्षाहरू सञ्चालन गर्नसमेत आग्रह गरेको छ । नवीकरण र दर्ता नभएका कन्सल्टेन्सीलाई थप कडाइ
सामसुङमा तलब विवाद चर्कियो
काठमाडौं । दक्षिण कोरियाको प्रविधि क्षेत्रमा विश्वस्तरीय प्रभाव राख्ने कम्पनी सामसुङ इलेक्ट्रोनिक्समा तलबसम्बन्धी वार्ता असफल भएपछि हडतालको सम्भावना तीव्र बनेको छ । व्यवस्थापन र युनियनबीच बुधबार अन्तिम चरणको वार्ता निष्कर्षविहीन रूपमा टुङ्गिएपछि देशको प्रमुख चिप तथा इलेक्ट्रोनिक्स उद्योगमा ठूलो अवरोध आउने चिन्ता बढेको छ । श्रमिक प्रतिनिधिहरूले कृत्रिम बौद्धिकता (एआई) मा आधारित विश्वव्यापी मागका कारण कम्पनीको नाफा उल्लेखनीय रूपमा बढे पनि कर्मचारीलाई उचित क्षतिपूर्ति नदिएको आरोप लगाएका छन् । लगभग ७४ हजार कामदारको प्रतिनिधित्व गर्ने युनियनले माग पूरा नभए बिहीबारदेखि १८ दिनसम्म हडताल सुरु गर्ने घोषणा गरेको छ । यसबीच सरकार पनि सक्रिय बनेको छ । अधिकारीहरूले सामसुङमा सम्झौता गराउन दुर्लभ रूपमा प्रयोग गरिने आपतकालीन अधिकार प्रयोग गर्ने चेतावनी दिएका छन् । सरकारको भनाइमा, सम्भावित हडतालले सेमिकन्डक्टर उत्पादनलाई प्रभावित पार्दै देशको निर्यात–निर्भर अर्थतन्त्रमा ठूलो असर पार्न सक्छ । वार्ताको पछिल्लो चरण पनि कुनै सहमति बिना समाप्त भएपछि युनियनका नेता चोई सुङ–होले पत्रकारहरूसँग हडताल अपरिहार्य भएको बताए । उनका अनुसार व्यवस्थापनले सरकारी मध्यस्थता प्रस्ताव अस्वीकार गरेको आरोप युनियनले लगाएको छ, यद्यपि त्यस प्रस्तावको विस्तृत विवरण सार्वजनिक गरिएको छैन । उता सामसुङ व्यवस्थापनले भने युनियनका मागहरू अत्यधिक रहेको दाबी गरेको छ । विशेषगरी घाटामा रहेका एकाइहरूमा पनि उच्च क्षतिपूर्ति प्याकेज मागिएको भन्दै कम्पनीले आपत्ति जनाएको छ । दुवै पक्षले वार्ता जारी राख्ने इच्छा व्यक्त गरे पनि निकट भविष्यमा पुनः बैठक बस्ने सम्भावना स्पष्ट छैन । सामसुङ इलेक्ट्रोनिक्स स्मार्टफोन, उपभोक्ता इलेक्ट्रोनिक्स र सेमिकन्डक्टर उत्पादनमा विश्वकै अग्रणी कम्पनीमध्ये एक हो । यसको क्रस–टाउन प्रतिस्पर्धी एसके हाइनिक्ससँग मिलेर यसले विश्वको करिब दुई–तिहाइ मेमोरी चिप उत्पादन नियन्त्रण गर्दछ, जुन एआई प्रविधिको तीव्र विस्तारसँगै उच्च मागमा छ । कम्पनीले हालै सार्वजनिक गरेको तथ्याङ्कअनुसार जनवरी–मार्च त्रैमासिकमा यसको सञ्चालन नाफा आठ गुणा बढेर ५७२ खर्ब वन (करिब ३८ अर्ब अमेरिकी डलर) पुगेको छ । यद्यपि युनियनले यही नाफाको आधारमा कर्मचारीलाई लाभ वितरण सुनिश्चित गर्नुपर्ने माग अघि सारेको छ । युनियनको प्रस्तावअनुसार कम्पनीले वार्षिक सञ्चालन नाफाको १५ प्रतिशत कर्मचारी बोनसका रूपमा छुट्याउनुपर्ने र हाल लागू ५० प्रतिशत तलब सीमाको बोनस क्याप हटाउनुपर्ने माग गरिएको छ । व्यवस्थापनले भने सेमिकन्डक्टर उद्योगको अत्यधिक उतारचढावयुक्त प्रकृतिका कारण यस्तो माग व्यावहारिक नभएको दाबी गरेको छ । सरकारका उच्च अधिकारी, प्रधानमन्त्री किम मिन–सिओकले आइतबार टेलिभिजन सम्बोधनमार्फत हडतालले सामसुङको जटिल उत्पादन प्रणालीमा बाधा पुर्याएर करिब एक हजार खर्ब वन (६६ अर्ब अमेरिकी डलर) बराबरको आर्थिक क्षति हुन सक्ने चेतावनी दिए । यसैबीच अदालतले पनि हस्तक्षेप गर्दै कम्पनीको अनुरोध आंशिक रूपमा स्वीकार गरेको छ । सुवन जिल्ला अदालतले युनियनलाई सुविधामा क्षति नपुग्ने गरी निश्चित कर्मचारी सङ्ख्या कायम राख्नुपर्ने आदेश दिएको छ । साथै, प्रमुख उत्पादन केन्द्र र कार्यालयहरू कब्जा गर्न पनि रोक लगाइएको छ, जसले सम्भावित हडतालको स्वरूपलाई कानूनी सीमाभित्र राख्ने प्रयास गरिएको छ । रासस
पञ्चकन्या ग्रुपका ४ कम्पनीको आम्दानी ६.६८ अर्ब, ऋण ८.६६ अर्ब रुपैयाँ
काठमाडौं । पञ्चकन्या ग्रुपका विभिन्न ४ कम्पनीले एक वर्षमा साढे ६ अर्ब रुपैयाँ आम्दानी गरेका छन् । ग्रुप अन्तर्गतका पञ्चकन्या स्टील प्रालि, पञ्चकन्या रोटोमोल्ड प्रालि, पञ्चकन्या प्लास्ट प्रालि र पञ्चकन्या प्लास्टिक इन्डस्ट्रिज प्रालिले गत आर्थिक वर्ष २०८१/८२ मा ६ अर्ब ६८ करोड १० लाख रुपैयाँ सञ्चालन आम्दानी गरेका हुन् । यो आम्दानी अघिल्लो वर्षको तुलनामा १४.२६ प्रतिशत अर्थात् ८३ करोड ४० लाख रुपैयाँ बढी हो । चार वटै कम्पनीले आव २०८०/८१ मा ५ अर्ब ८४ करोड ७० लाख रुपैयाँ सञ्चालन आम्दानी गरेका थिए । यस्तै, आव २०७९/८० मा ७ अर्ब ८६ करोड रुपैयाँ, आव २०७८/७९ मा १० अर्ब १० करोड ९० लाख रुपैयाँ, र आव २०७७/७८ मा ८ अर्ब ६३ करोड ५० लाख रुपैयाँ आम्दानी गरेका थिए । यी चार वटै उद्योगको उत्पादन प्लान्ट भैरहवामा रहेको छ । साथै आयातमा आधारित रहेका यी उद्योगले विभिन्न देशबाट कच्चा पदार्थ आयात गरी स्वदेशमा तयारी सामाग्री उत्पादन तथा बिक्री वितरण गर्दै आएको छ । पञ्चकन्या समूह ट्रेडिङ, उत्पादन, ऊर्जा तथा अटोमोबाइल लगायतका विविध क्षेत्रमा संलग्न छ । कम्पनीको नेतृत्व प्रेम बहादुर श्रेष्ठले गर्दै आएका छन् । उनी करिब पाँच दशकभन्दा बढी समयदेखि व्यापार तथा आयात–निर्यात क्षेत्रमा संलग्न अनुभवी व्यवसायी हुन् । त्यस्तै, प्रबन्ध निर्देशक प्रदीप कुमार श्रेष्ठले पञ्चकन्या समूहअन्तर्गत कम्पनीहरू हेर्दै आएका छन् । कम्पनीसँग करिब ९० डिलर नेटवर्क र देशभर फैलिएका ७ डिपोहरू (बालकुमारी, ललितपुर, भैरहवा, पोखरा, धनगढी, नेपालगन्ज र बिर्तामोड) रहेका छन् । साथै ग्रुप अन्तर्गतका विभिन्न ४ कम्पनीले बैंक तथा वित्तीय संस्थाबाट ८ अर्ब ६६ करोड २२ लाख रुपैयाँ ऋण पनि लिएको छ । पञ्चकन्या स्टील सन् १९९५ मे ३१ मा स्थापना भएको पञ्चकन्या स्टील प्रालिले नेपालमा टीएमटी स्टील बार (डण्डी) उत्पादन गरिरहेको छ । यसको कुल जडित उत्पादन क्षमता वार्षिक १ लाख ५० हजार मेट्रिक टन रहेको छ । कम्पनीले निर्माण क्षेत्रका लागि आवश्यक उच्च गुणस्तरका स्टील उत्पादन गर्दै नेपाली बजारमा महत्वपूर्ण भूमिका निर्वाह गर्दै आएको छ । कम्पनीले गत आर्थिक वर्ष २०८१/८२ मा ४ अर्ब ११ करोड ८० लाख रुपैयाँ सञ्चालन आम्दानी गरेको छ । यस्तै, आव २०८०/८१ मा ३ अर्ब ६५ करोड ७० लाख रुपैयाँ, आव २०७९/८० मा ५ अर्ब ११ करोड रुपैयाँ, आव २०७८/७९ मा ६ अर्ब ७४ करोड ९० लाख रुपैयाँ, आव २०७७/७८ मा ५ अर्ब ५३ करोड २० लाख रुपैयाँ, आव २०७६/७७ मा ३ अर्ब २६ करोड ५० लाख रुपैयाँ, आव २०७५/७६ मा ४ अर्ब ५७ करोड ४० लाख रुपैयाँ र आव २०७४/७५ मा ५ अर्ब २२ करोड १० लाख रुपैयाँ सञ्चालन आम्दानी गरेको थियो । पञ्चकन्या स्टीलले भारतबाट एमएस बिलेट आयात गर्ने भएकाले कच्चा पदार्थको मूल्य बजारमा आधारित हुन्छ । गत वर्ष कुल सञ्चालन आम्दानीको करिब ७३ प्रतिशत कच्चा पदार्थ लागतले ओगटेको जनाएको छ । यसले नाफा मार्जिनमा प्रत्यक्ष दबाब पारेको कम्पनीले जनाएको छ । साथै, आयात अमेरिकी डलरमा आधारित भएकाले विदेशी विनिमय दर उतारचढावको जोखिम पनि कम्पनीमा रहेको छ । सरकारले सडक, पुल, हवाईअड्डा तथा पूर्वाधार क्षेत्रमा निरन्तर लगानी गर्ने नीति लिएको कारण घरेलु स्टील उत्पादकहरूलाई दीर्घकालीन माग आधार प्राप्त हुने अपेक्षा कम्पनीको छ । कम्पनीले विभिन्न बैंक तथा वित्तीय संस्थाबाट ६५ करोड ९२ लाख रुपैयाँ दीर्घकालीन र ४ अर्ब ४८ करोड ३८ लाख रुपैयाँ अल्पकालीन गरी कुल ५ अर्ब १४ करोड ३१ लाख रुपैयाँ ऋण लिएको छ । पञ्चकन्या रोटोमोल्ड सन् १९८९ मा स्थापना भएको पञ्चकन्या रोटोमोल्ड प्रालिले नेपालमा यूपीभीसी पाइप तथा फिटिङ्स उत्पादन गर्दै आएको छ । पञ्चकन्या रोटोमोल्डको वार्षिक जडित उत्पादन क्षमता ६ हजार ५०० मेट्रिक टन रहेको छ । नेपालको पूर्वाधार, खानेपानी तथा निर्माण क्षेत्रमा आवश्यक पाइप तथा फिटिङ्स उत्पादन गर्दै आएको यो कम्पनी पञ्चकन्या समूहअन्तर्गतको स्थापित औद्योगिक कम्पनीका रूपमा परिचित छ । कम्पनीले गत आर्थिक वर्ष २०८१/८२ मा ७८ करोड ९० लाख रुपैयाँ सञ्चालन आम्दानी गरेको छ । यस्तै, आव २०८०/८१ मा ६६ करोड ७० लाख रुपैयाँ, आव २०७९/८० मा ७८ करोड २० लाख रुपैयाँ, आव २०७८/७९ मा १ अर्ब ५ करोड ९० लाख रुपैयाँ, आव २०७७/७८ मा ८६ करोड १० लाख रुपैयाँ, आव २०७६/७७ मा ४५ करोड ६० लाख रुपैयाँ, आव २०७५/७६ मा ५३ करोड ५० लाख रुपैयाँ र आव २०७४/७५ मा ४५ करोड ८० लाख रुपैयाँ सञ्चालन आम्दानी गरेको थियो । कम्पनीको मुख्य कच्चा पदार्थ पोलिभिनिल क्लोराइड रेसिन पाउडर हो, जुन मुख्यतः थाइल्यान्डबाट आयात गरिन्छ । कम्पनीले विभिन्न बैंक तथा वित्तीय संस्थाबाट ४० करोड ९७ लाख रुपैयाँ दीर्घकालीन र ६९ करोड १२ लाख रुपैयाँ अल्पकालीन गरी कुल १ अर्ब १० करोड १० लाख रुपैयाँ ऋण लिएको छ । पञ्चकन्या प्लास्ट सन् २००३ मा स्थापना भएको पञ्चकन्या प्लास्ट प्रालिले नेपालमा पोलिप्रोपाइलिन र्याण्डम कोपोलिमर (पीपीआर) तथा क्लोरिनेटेड पोलिभिनिल क्लोराइड (सीपीभीसी) पाइप र फिटिङ्स उत्पादन गर्दै आएको छ । कम्पनीको वार्षिक जडित उत्पादन क्षमता ५ हजार मेट्रिक टन रहेको छ । कम्पनीले गत आर्थिक वर्ष २०८१/८२ मा ७९ करोड १० लाख रुपैयाँ सञ्चालन आम्दानी गरेको छ । यस्तै, आव २०८०/८१ मा ६४ करोड रुपैयाँ, आव २०७९/८० मा ७३ करोड ४० लाख रुपैयाँ, आव २०७८/७९ मा ९३ करोड ६० लाख रुपैयाँ, आव २०७७/७८ मा ८९ करोड ५० लाख रुपैयाँ, आव २०७६/७७ मा ८३ करोड ५० लाख रुपैयाँ, आव २०७५/७६ मा ९६ करोड ५० लाख रुपैयाँ र आव २०७४/७५ मा ७४ करोड ७० लाख रुपैयाँ सञ्चालन आम्दानी गरेको थियो । कम्पनीले थाइल्यान्ड तथा सिंगापुरबाट कच्चा पदार्थ आयात गर्छ, जुन कच्चा तेलमा आधारित उत्पादन हुन् । अन्तर्राष्ट्रिय बजारमा कच्चा तेलको मूल्य माग–आपूर्तिअनुसार परिवर्तन भइरहने भएकाले उत्पादन लागतमा उतारचढाव आउने जोखिम रहेको कम्पनीले जनाएको छ । कम्पनीले विभिन्न बैंक तथा वित्तीय संस्थाबाट ५६ करोड २१ लाख रुपैयाँ दीर्घकालीन र ६८ करोड २८ लाख रुपैयाँ अल्पकालीन गरी कुल १ अर्ब २४ करोड ५० लाख रुपैयाँ ऋण लिएको छ । पञ्चकन्या प्लास्टिक इन्डस्ट्रिज सन् १९८२ मा स्थापना भएको पञ्चकन्या प्लास्टिक इन्डस्ट्रिज प्रालिले नेपालमा एचडीपीई पाइप तथा फिटिङ्स उत्पादन गर्दै आएको छ । कम्पनीको वार्षिक जडित उत्पादन क्षमता ९ हजार मेट्रिक टन रहेको छ । कम्पनीले गत आर्थिक वर्ष २०८१/८२ मा ९८ करोड ३० लाख रुपैयाँ सञ्चालन आम्दानी गरेको छ । यस्तै, आव २०८०/८१ मा ८८ करोड २० लाख रुपैयाँ, आव २०७९/८० मा १ अर्ब २३ करोड ३० लाख रुपैयाँ, आव २०७८/७९ मा १ अर्ब ३६ करोड ५० लाख रुपैयाँ, आव २०७७/७८ मा १ अर्ब ३४ करोड ८० लाख रुपैयाँ, आव २०७६/७७ मा १ अर्ब २९ करोड रुपैयाँ, आव २०७५/७६ मा १ अर्ब २४ करोड २० लाख रुपैयाँ र आव २०७४/७५ मा ९७ करोड ६० लाख रुपैयाँ सञ्चालन आम्दानी गरेको थियो । कम्पनीले विभिन्न बैंक तथा वित्तीय संस्थाबाट ४७ करोड ७८ लाख रुपैयाँ दीर्घकालीन र ६९ करोड ५२ लाख रुपैयाँ अल्पकालीन गरी कुल १ अर्ब १७ करोड ३१ लाख रुपैयाँ ऋण लिएको छ ।
