प्रधानमन्त्रीलाई संसदमा जवाफदेही बनाउने रुलिङपछि प्रतिपक्षीको अवरोध हट्यो
काठमाडौं । प्रधानमन्त्री बालेन्द्र शाहलाई संसदमा उपस्थित गराएर सांसदका प्रश्नको जवाफ दिन सभामुख डोलप्रसाद अर्यालले रुलिङ गरेपछि झण्डै दुई महिनादेखि हुँदै आएको प्रतिनिधि सभा अवरोध हटेको छ । सभामुखको रुलिङपछि मंगलबार बसेको प्रतिनिधि सभाको बैठक प्रतिपक्षीको विरोध र अवरोधबिनै सञ्चालन भइरहेको छ । बिहान ११ बजे सुरु भएको बैठकमा प्रतिपक्षी सांसदहरूले बैठक अवरुद्ध नगरी नियमित कार्यसूचीमा सहभागी भएका छन् । प्रधानमन्त्री शाहले गत जेठ १७ गते प्रतिनिधि सभामा बोल्ने क्रममा ‘नेपालले पनि भारतको जमिन मिचेको’ अभिव्यक्ति दिएपछि प्रतिपक्षी दलहरू आक्रोशित भएका थिए । उक्त अभिव्यक्तिप्रति प्रधानमन्त्रीले संसदमै जवाफ दिनुपर्ने र आफ्नो भनाइबारे स्पष्ट पार्नुपर्ने माग गर्दै उनीहरूले त्यसयता निरन्तर बैठक अवरुद्ध गर्दै आएका थिए । बैठक सुरु हुनेबित्तिकै प्रतिपक्षी सांसदहरू उठेर विरोध जनाउने, प्रधानमन्त्रीलाई संसद्मा उपस्थित गराउन माग गर्ने र आफ्ना प्रश्नको जवाफ दिनुपर्ने अडान राख्ने गरेका थिए । तर, प्रधानमन्त्री शाहले प्रतिपक्षीको माग सम्बोधन नगरेपछि संसदमा गतिरोध कायमै थियो । सोमबारको बैठकमा पनि सुरुआतमै प्रतिपक्षी सांसदहरूले उठेर विरोध जनाएका थिए । त्यसक्रममा सभामुख अर्यालले यसअघिका बैठकमा जस्तो प्रतिपक्षीलाई लामो समय बोल्ने अवसर नदिई प्रधानमन्त्री शाहलाई संसद्मा उपस्थित भएर सांसदहरूले उठाएका प्रश्नको जवाफ दिन रुलिङ गरे। सभामुखको उक्त रुलिङपछि प्रतिपक्षी दलहरूले बैठकमा गर्दै आएको अवरोध तत्काल हटाएका थिए । त्यसको भोलिपल्टै संसद् बैठक सहज रूपमा सञ्चालन भएको हो । मंगलबारको बैठकमा आकस्मिक समयअन्तर्गत सांसदहरूले आफ्ना धारणा राखिसकेका छन् । अहिले शून्य समयमा सांसदहरूले समसामयिक विषयमा सरकारको ध्यानाकर्षण गराउँदै आफ्ना भनाइ राखिरहेका छन् । आजको बैठकमा सरकारका चार मन्त्रालयसँग सम्बन्धित विषयमा सांसदहरूले उठाएका प्रश्नको मन्त्रीहरूले जवाफ दिने कार्यसूची छ । बैठकमा परराष्ट्र, ऊर्जा, जलस्रोत तथा सिँचाइ, संस्कृति, पर्यटन तथा नागरिक उड्डयन र कृषि, वन तथा वातावरण मन्त्रालयसँग सम्बन्धित मौखिक प्रश्नमाथि सम्बन्धित मन्त्रीले जवाफ दिने कार्यसूची छ । बैठकमा प्रधानमन्त्री वालेन्द्र शाहका तर्फबाट कानुन, न्याय तथा संसदीय मामिलामन्त्री सोविता गौतमले ‘थारु आयोगको सातौं वार्षिक प्रतिवेदन, २०८१/०८२’ संसदमा पेस गर्नेछिन् । त्यसपछि विधायिकी कामकारबाही अघि बढाइनेछ। परराष्ट्रमन्त्री शिशिर खनालले ‘राहदानी (पहिलो संशोधन) विधेयक, २०८३ माथि विचार गरियोस्’ भन्ने प्रस्ताव प्रस्तुत गर्नेछन् । त्यस्तै, कानुनमन्त्री गौतमले ‘मेलमिलापसम्बन्धी (दोस्रो संशोधन) विधेयक, २०८३ माथि विचार गरियोस्’ भन्ने प्रस्ताव पेस गर्नेछिन् । आजको बैठकमा अन्तर्राष्ट्रिय समुद्री कानुनसँग सम्बन्धित सम्झौता पनि संसदमा प्रस्तुत हुँदैछ । कानुनमन्त्री गौतमले संयुक्त राष्ट्र संघीय सामुद्रिक कानुनसम्बन्धी महासन्धिअन्तर्गत राष्ट्रिय क्षेत्राधिकारभन्दा बाहिरका क्षेत्रमा सामुद्रिक जैविक विविधताको संरक्षण तथा दिगो प्रयोगसम्बन्धी सम्झौता पेस गर्ने कार्यसूची रहेको छ । संघीय संसद्का महासचिव पद्मप्रसाद पाण्डेयका अनुसार आजको बैठकमा प्रश्नोत्तर, वार्षिक प्रतिवेदन, विधेयक र अन्तर्राष्ट्रिय सम्झौता प्रस्तुत गर्नेसहितका कार्यसूची छन् । प्रतिनिधि सभाको आजको बैठकलाई सरकारको जवाफदेहिता र विधायिकी प्रक्रियाका दृष्टिले महत्त्वपूर्ण मानिएको छ।
नापजाँच सकिएको १० वर्षपछि धनुषाका ५७ परिवारले पाए लालपुर्जा
काठमाडौं । नापि कार्यालय धनुषाले नाप जाँच भएको करिब दश वर्षपछि धनुषाको सबैलाई नगरपालिका वडा नं ११ का ५७ परिवारलाई जग्गाधनी पुर्जा वितरण गरेको छ । साविक मखनाहा गाउँ विकास समिति वडा नै ६,७,८,९ अन्तर्गत पर्ने गाउँ ब्लक (स्ववासी) जग्गाको नापजाँच आर्थिक वर्ष २०७२/७३ मा सम्पन्न भएको थियो । नापजाँच सम्पन्न भए पनि जग्गा दर्ताका लागि आवश्यक जनसहभागिता न्यून हुँदा पुर्जा वितरणको प्रक्रिया लामो समय रोकिएको थियो । विगतमा आयोगबाट नापनक्सा भइसकेको जग्गाको आवश्यक प्रक्रिया पूरा गर्दै ५७ थान जग्गाधनी पुर्जा वितरण गरिएको हो । पुर्जा प्राप्त गरेसँगै लामो समयदेखि स्ववासीका रूपमा बसोबास गर्दै आएका ५७ परिवार औपचारिक रूपमा आफ्नो जग्गाको कानुनी स्वामित्व प्राप्त गरेका छन् ।
बालबालिकासँग खुसी साट्दै स्वास्थ्य संस्था सञ्चालक संघ
काठमाडौं । स्वास्थ्य संस्था सञ्चालक संघ नेपालले आफ्नो स्थापना दिवस बालबालिकासँग खुसी साट्दै मनाएको छ । संघले कागेश्वरी मनोहरा–स्थित सिर्जनशील बाल सेवा परिवारमा रहेका बालबालिकालाई भोजन गराएर आफ्नो वार्षिकोत्सव तथा स्थापना दिवस मनाएको हो । स्थापना दिवसका अवसरमा आयोजित कार्यक्रममा नेपाल मेडिकल व्यवसायी संघका निवर्तमान अध्यक्ष सीताराम रेग्मीले स्वास्थ्य संस्था सञ्चालक संघ नेपाल नयाँ संस्था भए पनि छोटो समयमै व्यवसायीका समस्या र सरोकारलाई राज्यका सम्बन्धित निकायसम्म पुर्याउन सफल भएको बताए । उनले संस्थाले व्यवसायीको हितमा सक्रिय भूमिका निर्वाह गरिरहेको उल्लेख गरे । नेपाल मेडिकल व्यवसायी संघका तत्कालीन महासचिव नवराज पौडेलले स्वास्थ्य क्षेत्रका व्यवसायीलाई एकताबद्ध भएर अघि बढ्न आग्रह गरे । विभिन्न संस्थाहरूले आफ्ना विधान र उद्देश्यभन्दा बाहिर गएर गतिविधि गर्दा व्यवसायी अन्योलमा पर्ने अवस्था सिर्जना भएको भन्दै उनले व्यवसायीको साझा हितका लागि संस्थागत एकता आवश्यक रहेको बताए । कार्यक्रम संघका अध्यक्ष मदनकुमार पूर्वेको अध्यक्षतामा सम्पन्न भएको थियो । रघुनाथ पनेरु (कालिका)ले सञ्चालन गरेको कार्यक्रममा सोमराज लिम्बुले स्वागत मन्तव्य दिएका थिए । कार्यक्रममा सिर्जनशील बाल सेवा परिवारकी अध्यक्ष उमा देवी कार्की बस्नेतले बालबालिकालाई लक्षित गरी सामाजिक सेवा गरेकोमा संघप्रति आभार व्यक्त गरिन् । उनले आगामी दिनमा पनि संस्थासँग सहकार्य गर्दै यस्ता सेवा गर्ने अवसर प्राप्त हुने अपेक्षा व्यक्त गर्दै स्वास्थ्य संस्था सञ्चालक संघका पदाधिकारी तथा सदस्यहरूको व्यावसायिक सफलताको शुभकामना दिइन् । संघले स्थापना दिवसलाई औपचारिक समारोहमा सीमित नगरी सामाजिक उत्तरदायित्वसँग जोडेर मनाएको जनाएको छ ।
ट्रम्पको लोकप्रियता खस्किँदै, ६४ प्रतिशत अमेरिकी असन्तुष्ट
काठमाडौं । अमेरिकी राष्ट्रपति डोनाल्ड ट्रम्पको लोकप्रियतामा लगातार गिरावट देखिएको छ । ‍रोयटर्स/इप्सोसको पछिल्लो सर्वेक्षणअनुसार ट्रम्पको स्वीकृति दर घटेर ३३ प्रतिशतमा झरेको छ । यो उनको वर्तमान कार्यकालकै सबैभन्दा न्यून स्तर हो । सर्वेक्षणमा सहभागी ६४ प्रतिशत अमेरिकी नागरिकले राष्ट्रपतिका रूपमा ट्रम्पको कार्यसम्पादनप्रति असन्तुष्टि जनाएका छन् भने ३३ प्रतिशतले मात्र उनको कामलाई अनुमोदन गरेका छन् । यसै महिनाको सुरुवातमा गरिएको सर्वेक्षणमा ट्रम्पको स्वीकृति दर ३५ प्रतिशत थियो । सर्वेक्षणअनुसार ट्रम्पको अहिलेको स्वीकृति दर उनको पहिलो कार्यकालकै न्यूनतम स्तरमा पनि पुगेको छ । पहिलो कार्यकालमा सन् २०१७ को डिसेम्बरमा पनि उनको स्वीकृति दर ३३ प्रतिशतमा झरेको थियो । सर्वेक्षणले इरानसँगको युद्धलाई लिएर अमेरिकी नागरिकको चिन्ता पनि बढेको देखाएको छ । करिब ८० प्रतिशत अमेरिकीले अमेरिका र इरानबीचको युद्ध लामो समयसम्म चल्ने आशंका व्यक्त गरेका छन् ।
सुनको मूल्य प्रतितोला तीन लाख ६ हजार ८०० रुपैयाँ पुग्यो
काठमाडौं । नेपाली बजारमा सुनको मूल्य मंगलबार स्थिर रहेको छ । चाँदीको मूल्य भने प्रतितोला १५ रुपैयाँले घटेको छ । नेपाल सुनचाँदी व्यवसायी महासंघका अनुसार मंगलबार सुन प्रतितोला तीन लाख ६ हजार ८०० रुपैयाँमा कारोबार भइरहेको छ । सोमबार पनि सुन यही मूल्यमा कारोबार भएको थियो । यस्तै, चाँदीको मूल्य भने घटेको छ । महासंघका अनुसार मंगलबार चाँदी प्रतितोला चार हजार ७५५ रुपैयाँमा कारोबार भइरहेको छ । सोमबार चाँदी प्रतितोला चार हजार ७७० रुपैयाँमा कारोबार भएको थियो । मंगलबार चाँदीको मूल्य प्रतितोला १५ रुपैयाँले घटेको हो ।
जब मजदुरले १ अर्ब ६० करोडको सुनको खजाना भेट्टाए...
काठमाडौं । युरोपेली देश बेल्जियममा जमिनमुनिबाट ठूलो परिमाणमा सुनको खजाना फेला परेको छ । पुरातत्त्वविद् वा विशेषज्ञको टोलीले नभई निर्माणको काम गरिरहेका मजदुरहरूले यो खजाना फेला पारेका हुन् । राजधानी ब्रसेल्सबाट करिब १९ माइल उत्तरपश्चिममा रहेको डेन्डरमोन्डे सहरमा एउटा भवनमुनि काम गर्ने क्रममा उनीहरूले ठूलो संख्यामा सुनका सिक्का र सुनका इँटा फेला पारेका हुन् । स्थानीय अधिकारीका अनुसार मंगलबार निर्माणका क्रममा फेला परेको उक्त सुनको सिक्का र बारको कुल मूल्य १०.५ मिलियन अमेरिकी डलर अर्थात १ अर्ब ६० करोड नेपाली रुपैयाँ बराबर रहेको छ । भवनको जगमुनि मर्मतको काम गर्ने क्रममा यो सुन फेला परेको हो । यो खजाना कोबे फिलिप्स नामका विद्यार्थीले फेला पारेका हुन्, जो पार्टटाइम निर्माण मजदुरका रूपमा काम गरिरहेका थिए । डेन्डरमोन्डे प्रहरी जिल्लाका प्रमुख प्याट्रिक फेयसले सीएनएनलाई बताएअनुसार एउटा पुरानो मदिरा उत्पादन गर्ने कारखानाको जगमा ४० वटा सुनका बार र करिब ४ हजारवटा सुनका सिक्का लुकाएर राखिएको अवस्थामा फेला परेका थिए । कोबे फिलिप्सका अनुसार सुरुमा आफूहरूले ती सिक्का एक युरोका सिक्का भएको ठानेका थिए । ती वस्तु बाहिर निकाल्दा एउटा सुनको बार देखिएपछि मात्रै वास्तविकता थाहा भएको उनले बताए । आफूहरूले अनुमान गरेभन्दा निकै ठूलो परिमाणमा सुन फेला परेको उनको भनाइ छ । सुन फेला परेपछि मजदुरहरूले सम्पत्तिका मालिकलाई खबर गरेका थिए । त्यसपछि प्रहरीलाई बोलाइएको थियो । इस्ट फ्ल्यान्डर्स सार्वजनिक अभियोजन कार्यालयका अनुसार सुनको ठूलो मूल्यका कारण प्रहरीलाई खबर गरिएको हो । अहिले उक्त सुनलाई कडा सुरक्षा र निगरानी भएको स्थानमा राखिएको छ । डेन्डरमोन्डे प्रहरीको फेसबुक पेजमा सार्वजनिक गरिएका तस्बिरमा सुनका सिक्काले भरिएको धातुको बाल्टी तथा सुनका बारले भरिएको टेबल देखिन्छ । प्रहरी प्रमुख फेयसका अनुसार केही सुनका बारमा १९६० को दशकका छाप भेटिएका छन् । त्यस्तै, सिक्कामा विभिन्न राजा र मितिका चिन्हहरू रहेका छन् । त्यसैले यो खजाना कहिले र कसले लुकाएको थियो भन्ने विषयमा अहिलेसम्म स्पष्ट जानकारी प्राप्त भएको छैन । खजाना फेला परेपछि यसको स्वामित्व दाबी गर्नेहरू पनि देखिन थालेका छन् । केही व्यक्तिले विभिन्न कागजात पेस गर्दै आफूहरू उक्त सुनका वास्तविक हकदार भएको दाबी गरेका छन् । प्रहरीले अहिले यो खजाना कसको हो र यससँग कुनै आपराधिक घटना जोडिएको छ कि छैन भन्नेबारे अनुसन्धान गरिरहेको छ । (अन्तर्राष्ट्रिय सञ्चारमाध्यमहरूबाट अनुदित तथा सम्पादित)
भीमफेदीमा अदालतका मुख्य न्यायाधीश सवार सवारी दुर्घटना, ६ जना घाइते
काठमाडौं । मकवानपुरको भीमफेदी गाउँपालिका–६, जुरिखेतमा मंगलबार बिहान भएको सवारी दुर्घटनामा उच्च अदालत वीरगञ्जका मुख्य न्यायाधीश र रजिस्ट्रारसहित ६ जना घाइते भएका छन् । प्रहरीकाअनुसार काठमाडौंबाट वीरगञ्जतर्फ जाँदै गरेको प्रदेश ३–०१–००२ झ ५१८३ नम्बरको सरकारी स्कारपियो जिप बिहान करिव ७ बजे अनियन्त्रित भई सडकबाट करिव ६० मिटर तल खोल्सामा खसेको थियो । दुर्घटनामा उच्च अदालत वीरगञ्जका मुख्य न्यायाधीश गोकर्ण डाँगी, रजिस्ट्रार तारादत्त बडू, उनकी श्रीमती लक्ष्मी बडू, छोरा रितेन्द्र बडू, छोरी रिता बडू र चालक छुनिलाल चौधरी घाइते भएका छन् । घाइतेमध्ये लक्ष्मी बडूको अवस्था गम्भीर रहेको र अन्य पाँच जनाको अवस्था सामान्य रहेको प्रहरीले जनाएको छ । घाइतेहरूको प्रारम्भिक उपचार भीमफेदी अस्पतालमा गरिएको थियो । थप उपचारका लागि चालक चौधरी र रजिस्ट्रार बडूलाई हेटौंडा अस्पताल पठाइएको छ भने मुख्य न्यायाधीश डाँगीसहित चार जनालाई नेपाली सेनाको हेलिकप्टरमार्फत काठमाडौंस्थित श्री वीरेन्द्र अस्पताल, छाउनी ल्याइएको छ । मुख्य न्यायाधीश डाँगीको टाउको र शरीरका विभिन्न भागमा चोट लागेको छ । अन्य घाइतेहरूको पनि टाउको र शरीरका विभिन्न अङ्गमा चोट लागेको प्रहरीले जनाएको छ । घटनाको जानकारी प्राप्त हुनासाथ इलाका प्रहरी कार्यालय भीमफेदी र जिल्ला प्रहरी कार्यालय मकवानपुरका प्रहरी उपरीक्षक श्यामबहादुर खत्रीसहितको टोली घटनास्थल पुगेको थियो । दुर्घटनाग्रस्त सवारी साधन घटनास्थलमै रहेको र हाल सडकमा यातायात सञ्चालन सुचारु रहेको छ । दुर्घटनाको कारणबारे थप अनुसन्धान भइरहेको प्रहरीले जनाएको छ ।
के नागढुङ्गा सुरुङमार्ग उद्घाटनपश्चात बन्द गरिएको हो ?
काठमाडौं । नागढुङ्गा–सिस्नेखोला सुरुङमार्गको उद्घाटन भएपनि पूर्ण रूपमा सञ्चालनमा आउन सकेको छैन । सुरुङमार्गको सञ्चालनको जिम्मा पाएको युसियन एआरटी टोलीका नेपाली प्रतिनिधि तथा सेफ्टी म्यानेजमेन्ट डेपुटी लिडर कविराज श्रेष्ठले सुरुङमार्ग पूर्णरूपमा बन्द नभई परीक्षण र अभ्यासका लागि केही समय मात्र रोकिने गरेको जानकारी दिए । उनका अनुसार अहिले सुरक्षा र उद्धारको पूर्व–तयारीका लागि ‘मक ड्रिल’ अभ्यास भइरहेको हो । सुरुङमार्गभित्र हुन सक्ने सम्भावित दुर्घटनाहरूलाई मध्यनजर गर्दै सुरक्षा निकाय, स्वास्थ्यकर्मी र उद्धार टोलीको दक्षता परीक्षण गर्न यस्तो अभ्यास भइरहेको हो । अभ्यासका क्रममा सुरुङमार्गभित्र दुई वा सोभन्दा बढी सवारी साधनहरू एकापसमा ठोक्किएको काल्पनिक दृश्य बनाएर उद्धार कार्यको अभ्यास भइरहेको श्रेष्ठले बताए । के हो मक ड्रिल ? श्रेष्ठका अनुसार मक ड्रिल एउटा यस्तो अभ्यास हो, जहाँ टनेलभित्र दुर्घटना भएको अवस्थामा कति छिटो अस्पतालबाट एम्बुलेन्स आउँछ, नगरपालिकाबाट दमकल कति समयमा आइपुग्छ र सुरक्षा निकायले कसरी रेस्क्यु गर्छ भन्ने कुराको परीक्षण गरिन्छ । यस क्रममा घाइतेलाई उद्धार गर्ने र दुर्घटनामा परेका सवारी साधनलाई टनेल बाहिर निकाल्ने अभ्यास गरिन्छ । यस्ता अभ्यासका बेला ३ देखि ४ घण्टासम्म सुरुङमार्ग पूर्ण रूपमा बन्द हुने गर्दछ । साना सवारी साधनलाई प्राथमिकता सुरुङमार्ग सर्वसाधारणका लागि कहिले खुल्छ भन्ने जिज्ञासामा श्रेष्ठले एक-दुई भित्र नै साना चारपाङ्ग्रे सवारीसाधन (कार, जिप) का लागि परीक्षणका रूपमा बाटो खुला गर्ने तयारी भइरहेको जानकारी दिए । उनका अनुसार ठूला सवारी साधन र अन्यको हकमा भने थप परीक्षणपश्चात निर्णय लिइनेछ । सुरक्षामा उच्च मनोबल हालसम्म गरिएका अभ्यासहरूबाट उद्धार टोली उत्साहित देखिएको छ । सामान्य खालका दुर्घटना र उद्धारका लागि टोली पूर्ण रूपमा सक्षम र विश्वस्त रहेको अधिकारीहरूको भनाइ छ । यद्यपि, टनेल भित्र ठूलो आगलागी वा जटिल परिस्थिति सिर्जना भएमा त्यसका लागि छुट्टै विशेष योजना अनुसार काम गर्नुपर्ने उनीहरू बताउँछन् । हाल सुरुङ मार्गमा एम्बुलेन्स, दमकल र सुरक्षा निकायका गाडीहरूको आवतजावतलाई निरन्तरता दिँदै सर्वसाधारणको सुरक्षा सुनिश्चित गर्न अन्तिम चरणको तयारी भइरहेको छ ।
