विद्यालय समायोजनलाई लिएर दुई दिनदेखि वडा कार्यालय तालाबन्दी
सिमकोट । हुम्लाको सर्केगाड गाउँपालिका–१ को वडा कार्यालय जैरमा दुई दिनदेखि तालाबन्दी लगाइएको छ । माझ गाउँमा रहेको सिर्जनशील प्रावि डिल गाउँमा रहेको बिहानी प्राविसँग समायोजन (गाभ्ने) निर्णय गाउँपालिकाले गरेसँगै माझ गाउँवासीले वडा कार्यालयमा तालाबन्दी गरेका हुन् । यहाँका स्थानीयले विद्यालय समायोजन (गाभ्ने) गाउँपालिकाको निर्णय मान्ने नहुने भन्दै मङ्गलबार लगाएको ताला आज पनि खुल्न नसकेको हो । जैरको माझ गाउँवासीले गाउँपालिका र वडाले आफूहरुसँग कुनै समन्वय तथा जानकारी नगरी एकलौटी विद्यालय समायोजन गरेको भन्दै आन्दोलन गर्नुपरेको प्रयागलाल बुढाले बताए। यस्तै सिर्जनशील प्रावि विद्यालय व्यवस्थापन समितिका अध्यक्ष रुपलाल रावतले माझ गाउँवासीलाई मात्रै नभएर आफूलाई समेत कुनै जानकारी नगराइ विद्यालय समायोजन गर्ने निर्णय प्रति असन्तुष्टि व्यक्त गरेका छन् । माझ गाउँका लागि २०६८ सालमा स्थापना भएको विद्यालय कुनै पनि हालतमा समायोजन गर्न नदिन यहाँका अधिकांश अभिभावक लागिपरेका छन् । विद्यालय समायोजन निर्णयविरुद्ध अभिभावकहरु आन्दोलनमा उत्रिदै वडा कार्यालय बन्द गरेपछि वडाबाट हुने सम्पूर्ण कामकाज दुई दिनदेखि ठप्प रहेको वडाध्यक्ष बलबहादुर कार्कीले बताए । सिर्जनशील प्राविमा अध्ययनरत ५२ विद्यार्थीमध्ये २७ विद्यार्थी बिहानीमा अध्ययन गर्दै आएका र बाँकी २५ मात्रै विद्यार्थी भएको हुँदा सबै पायक पर्ने भएर बिहानीमा यो विद्यालय समायोजन गरिएको वडाध्यक्ष कार्कीले बताए । सबै विद्यार्थी बिहानी जाने भएको हुँदा विद्यालय समायोजन र कर्मचारी पदास्थानको पत्र वडामा आइपुगेको उनको भनाइ थियो । सिर्जनशील विद्यालय दुई वर्षअघि नै बिहानीसँग समायोजन गर्ने सहमति भएको थियो । अहिले आएर यहाँका अभिभावक आन्दोलित बनेका छन् । रासस
कलंकीमा लेमिनार टायल्सको नयाँ डिलर शोरूम
काठमाडौं । नेपालकै पहिलो र एकमात्र भिट्रिफाइड टायल्स ब्रान्ड लेमिनार टायल्सले राजधानीमा आफ्नो नयाँ विशेष डिलर शोरूम सञ्चालनमा ल्याएको छ । काठमाडौंको कलंकीस्थित टन्केश्वर टाइल एण्ड मार्बल हाउस प्रालिलाई आधिकारिक डिलर नियुक्त गर्दै बुधबार एक कार्यक्रमका बीच नयाँ शोरूमको उद्घाटन गरिएको हो । टन्केश्वर टाइल एण्ड मार्बल हाउसका सञ्चालक प्रज्ज्वल अधिकारी, लेमिनार टायल्सका निर्देशकद्वय अभिनभ चुरिवाल र आशुतोष खेतानले संयुक्त रूपमा ‘एम्पोरियो’ श्रेणीअन्तर्गतको शोरूम उद्घाटन गरे । कार्यक्रममा बोल्दै निर्देशक चुरिवालले लेमिनार टायल्सले देशभर १०० भन्दा बढी विशेष शोरूम सञ्चालन गर्ने लक्ष्य लिएको बताए । बर्दियाको गुलरियामा १२.५ बिगाहा क्षेत्रफलमा स्थापित अत्याधुनिक यूरोपेली प्रविधियुक्त उत्पादन केन्द्रमार्फत लेमिनार टायल्स उत्पादन हुँदै आएको छ । कम्पनीले हाल ५०० भन्दा बढी डिजाइनमा पाँच विभिन्न साइजका टायल्स बजारमा उपलब्ध गराएको छ । कम्पनीका अनुसार यी टायल्स पूर्ण भिट्रिफाइड भएकाले ९९.९२ प्रतिशतसम्म वाटरप्रुफ छन् र उच्च गुणस्तरका कच्चा पदार्थ प्रयोग भएकाले साधारण सेरामिक टायल्सभन्दा चार गुणा बढी टिकाउ हुने विशेषता रहेका छन् ।
दुई लाख घुससहित मालपोतका खरिदार पक्राउ
काठमाडौं । अख्तियार दुरुपयोग अनुसन्धान आयोगले मालपोत कार्यालय धुलिखेल ९काभ्रेपलाञ्चोक०मा कार्यरत खरिदार ज्ञानेन्द्रप्रसाद भण्डारीलाई दुई लाख रुपैयाँ घुससहित पक्राउ गरेको छ । काभ्रेपलाञ्चोकको साविक दोलालघाट गाविस–७ मा रहेको फिल्डबुकमा दर्ता छुट भएको जग्गा धनीको नाममा दर्ता गर्ने प्रयोजनका लागि सेवाग्राहीसँग दुई लाख रुपैयाँ घुस लिँदै गरेको अवस्थामा आयोगको केन्द्रीय कार्यालय टङ्गालबाट गएको टोलीले पक्राउ गरेको हो । आयोगले खरिदार भण्डारीलाई मालपोत कार्यालय धुलीखेलको कार्यालय परिसरबाट पक्राउ गरेको हो । भण्डारीको साथबाट आयोगले मोबाइल एक थान पनि नियन्त्रणमा लिएको छ । आरोपी भण्डारीमाथि थप अनुसन्धान भइरहेको आयोगका प्रवक्ता राजेन्द्रकुमार पौडेलले जानकारी दिए ।
हिमस्टार ऊर्जाको सेयर मूल्यमा सकारात्मक सर्किट, ३९ कम्पनीको मूल्य बढ्यो
काठमाडौं । बुधबार सेयर बजारमा सामान्य अंकको गिरावट आएको छ । नेपाल स्टक एक्सचेन्ज (नेप्से) परिसूचक १५ अंकले घटेर २७२६ बिन्दुमा झरेको छ । आज ३९ कम्पनीको सेयर मूल्य बढ्दा २१३ कम्पनीको सेयर मूल्य घटेको छ । बुधबार ३२६ कम्पनीको १ करोड कित्ता सेयर किनबेच हुँदा ४ अर्ब ७२ करोड रुपैयाँ बराबरको कारोबार भएको छ । जसमध्ये सबैभन्दा धेरै कारोबार युनियन हाइड्रोपावरको भएको छ । य्नियनको ३३ करोड रुपैयाँ बराबरको कारोबार भएको छ । साथै, लिर्बटी फाइनान्सको २७ करोड, नेपाल रिइन्स्योरेन्सको २६ करोड, हिमालयन रिइन्स्योरेन्सको २४ र पञ्चकन्या माइ हाइड्रोको १३ करोड रुपैयाँ बराबरको कारोबार भएको छ । आज हिमस्टार ऊर्जा कम्पनीको सेयर मूल्य १० प्रतिशतले बढेर सकारात्मक सर्किट लागेको छ ।
१२१ अस्थायी दरबन्दी स्वीकृत, नयाँ भर्ना कि पुरानाको सरूवा ?
काठमाडौं । नेपाल सरकार मन्त्रिपरिषदको भदौ १३ गतेको बैठकले १२१ अधिकृत स्तरका कर्मचारीहरुको अस्थायी दरबन्दी स्वीकृत गरेको छ । विभिन्न मन्त्रालय अन्तर्गतका आयोजना र कार्यालयरूबाट माग भएबमोजिम त्यस्ता दरबन्दी स्वीकृत गरिएको प्रधानमन्त्री तथा मन्त्रिपरिषद कार्यालयले जनाएको छ । कार्यालयका प्रवक्ता श्रृजना शर्माका अनुसार भूमि व्यवस्था तथा गरिबी निवारण मन्त्रालयमा सबैभन्दा धेरै अधिकृतहरूको दरबन्दी स्वीकृत गरिएको छ । उक्त मन्त्रालयमा ८७ जना अधिकृतको अस्थायी दरबन्दी स्वीकृत गरिएको हो । यसैगरी, युवा तथा खेलकुद मन्त्रालयमा २१ र पर्यटन तथा नागरिक उड्डयन मन्त्रालयमा १० जना अधिकृतको अस्थायी दरवन्दी स्वीकृत गरीएको प्रवक्ता शर्माले जानकारी दिइन् । शर्माका अनुसार ती दरबन्दीहरू अस्थायी भएपनि बहालवाला स्थायी कर्मचारी नै ती दरबन्दीमा रहनेछन् । भूमि व्यवस्था मन्त्रालयका ८७ जना अधिकृतमध्ये ३ जना सहसचिव स्तरका र ४ जना उपसचिव स्तरका अधिकृत रहेको मन्त्रालयका प्रवक्ता गणेशप्रसाद भट्टले जानकारी दिए । भूमि आयोगसहितका विभिन्न कार्यालयमा काजमा कार्यरत कर्मचारीहरूको दरबन्दी स्वीकृत मन्त्रिपरिषदले गर्ने गरेको उनले जानकारी दिए । खेलकुदमा पनि राष्ट्रिय युवा परिषद, फाप्ला क्रिकेट मैदानलगायतमा रहेका अस्थायी दरबन्दीका स्थायी कर्मचारीको दरबन्दी मन्त्रिपरिषदले स्वीकृत गरेको मन्त्रालयका सूचना अधिकारी जगदीश पराजुलीले बताए । यस्तै, पर्यटन मन्त्रालय अन्तर्गतका दश दरबन्दी पनि सोही प्रकृतिको रहेको मन्त्रालयका प्रवक्ता रामकृष्ण लामिछानेले जानकारी दिए । उनका अनुसार पुरातत्व विभागमा एक जना सहसचिवसहित दश जनाको दरबन्दी रहेको छ ।
४ करोड र ९ किलो सुनसहित पक्राउ परेका मिटरब्याजी श्रेष्ठलाई राजस्वमा पठाइने
काठमाडौं । चार करोड २५ लाख रुपैयाँ र ९ किलो सुनसहित गोरखाका ७७ वर्षीय विनोदकुमार श्रेष्ठलाई राजस्व अनुसन्धान विभागमा पठाइने भएको छ । प्रहरीले उनलाई बरामद रकम र सुनसहित राजस्व अनुसन्धान विभाग, हरिहर भवन पठाउने तयारी गरेको हो । जिल्ला प्रहरी परिसर काठमाडौंका एसएसपी विश्व अधिकारीका अनुसार श्रेष्ठको कसुरलाई प्रहरीले भन्दा पनि विभागले हेर्ने किसिमको रहेकाले सो स्थानमा पठाउन लागिएको हो । मंगलबार प्रहरीले श्रेष्ठको घरमा छापा मारेर ठूलो मात्रामा रकम र मूल्यवान धातु बरामद गरेको थियो । बैंकको मेसिन प्रयोग गरी रकम गणना गर्दा करिब ४ करोड २५ लाख रुपैयाँ भएको पुष्टि भएको थियो । साथै, सुनका विभिन्न गरगहनाहरू ९ किलो ८३७ ग्राम र चाँदीका गरगहनाहरू ३ किलो २१८ ग्राम बरामद भएको छ । प्रहरीले पक्राउ परेका श्रेष्ठ मिटरब्याजी रहेको दाबी गरेको छ । काठमाडौं महानगरपालिका–२६, गोंगबुस्थित आफ्नै घरबाट पक्राउ परेका श्रेष्ठले सुन धितो राखेर मिटरब्याजमा पैसा लगानी गर्ने गरेको बताइएको छ । ठूलो मात्रामा अवैध रकम लुकाइएको भन्ने सूचना प्राप्त भएपछि प्रहरीले छापा मारेको थियो ।
बीमकको विदेशी मुद्रा सटही सिफारिससम्बन्धी निर्देशन, २०८२ जारी, के के छ व्यवस्था ?
काठमाडौं । नेपाल बीमा प्राधिकरणले बीमकको विदेशी मुद्रा सटही सिफारिससम्बन्धी निर्देशन, २०८२ जारी गरेको छ । बीमकले पुनर्बीमा, रेट्रोसेसन, विदेशबाट आयात गर्ने परामर्श सेवाबापत भुक्तानी गर्नुपर्ने विदेशी मुद्रा सटही सिफारिस कार्यलाई पारदर्शी र व्यवस्थित गर्न वाञ्छनीय भएकोले बीमा ऐन, २०७९ को दफा १६६ ले दिएको अधिकार प्रयोग गरी यो निर्देशन जारी गरिएको प्राधिकरणले जनाएको छ । प्राधिकरणले जारी गरेको विदेशी मुद्रा सटही सिफारिससम्बन्धी निर्देशनअनुसार अब बीमकले विदेशी बीमक वा पुनर्बीमक वा नेपालमा रहेका बीमकमा लगानी गर्ने विदेशी लगानीकर्ता वा बीमकलाई सेवाप्रदान गर्ने विदेशी सेवाप्रदायक संस्थालाई सीधै वा बीमा दलालको संलग्नतामा गरिएको पुनर्बीमासँग सम्बन्धित पुनर्बीमा शुल्क तथा बीमा दाबी रकम, लाभांश फिर्ता, परामर्श सेवा लिएबापतको रकम भुक्तानी गर्न प्राधिकरणको सिफारिस लिएरमात्र गर्नुपर्ने छ । बीमकले यस निर्देशनको अतिरिक्त विदेशी लगानीसँग सम्बन्धित प्रचलित कानुन र नेपाल राष्ट्र बैंकले विदेशी विनिमय व्यवस्थापन सम्बन्धमा जारी गरेको निर्देशनको समेत पालना गर्नुपर्नेछ । सटही सिफारिस माग गर्दा प्रचलित कर, सेवा शुल्क, पुनर्बीमा कमिसन वा त्यस्तै कुनै छुटहरू पाउने भएमा सो समेत कट्टा गरी खुद रकमको भुक्तानीका लागि राष्ट्र बैंकबाट इजाजतपत्रप्राप्त बैंक तथा वित्तीय संस्थामार्फत विप्रेषण हुने गरी सिफारिस माग गर्नुपर्ने छ । प्राधिकरणले विदेशी मुद्रा सटही सिफारिस गर्दा डेबिट नोट वा बीजक जारी गर्ने सम्बन्धित पुनर्बीमक वा पुनर्बीमा दलाल वा विदेशी सेवाप्रदायक संस्थाको नाममा मात्र गर्नुपर्ने व्यवस्था गरेको छ । सटही सिफारिसको लागि प्राधिकरणमा पेश हुने निवेदनमा बीमकका प्रमुख कार्यकारी अधिकृत (सीईओ)को हस्ताक्षर गर्नुपर्ने छ । सटहीका लागि पेस हुने सबै संलग्न कागजातको प्रतिलिपिमा बीमक वा पुनर्बीमकको छापसहित सम्बन्धित कर्मचारीले हस्ताक्षर गर्नुपर्ने व्यवस्था छ । बीमकले प्राधिकरणबाट सटही सिफारिस प्राप्त मितिले वाणिज्य बैंकको हकमा १५ दिन र नेपाल राष्ट्र बैंकको हकमा ३० दिनभित्र भुक्तानी गरी सो निस्सा तीन दिनभित्र प्राधिकरणमा पेश गर्नुपर्ने व्यवस्था छ । सिफारिस माग गर्दा भारतको हकमा भारतीय मुद्रामा तथा अन्य मुलुकको हकमा उक्त मुलुकको प्रचलित स्वदेशी मुद्रा वा परिवर्तनीय अमेरिकन डलरमा मात्रै भुक्तानीका लागि सिफारिस माग गर्नुपर्नेछ । विदेशी बीमक वा विदेशी ब्रोकरलाई बीमाको दाबीबाप्तको भुक्तानी गर्दा ट्रिट्री वा फ्याकल्टेटिभ हिसाबकिताब मिलान गरी अनुसूची ४ बमोजिमको कागजातहरू संलग्न गरी प्राधिकरणमा पेश गर्नुपर्ने हुन्छ । बीमकले पुनर्बीमा शुल्कबापत विदेशी मुद्रा सटही सिफारिस माग गर्दा बीमकले धारण गरेको जोखिमको हिस्साबाहेकको बाँकी जोखिम सतप्रतिशत हस्तान्तरण गरेको आवश्यक विवरण तथा स्व:घोषणासहितको सारांश पेस गर्नुपर्ने निर्देशनमार्फत व्यवस्था गरिएको छ । पुनर्बीमा वा रेट्रोसनबापत विदेशी मुद्रा सटही माग गर्दा प्राधिकरणले जारी गरेको बीमकको पुनर्बीमा निर्देशिकाबमोजिम सूचीकरण भएका विदेशी पुनर्बीमक तथा पुनर्बीमा दलाल र सोही निर्देशिका बमोजिमको रेटिङ प्राप्त पुनर्बीमकका लागि मात्र प्राधिकरण सिफारिस दिनेछ । तर, बीमकको पुनर्बीमा निर्देशिका लागू हुनुपूर्व गरिएको बीमा वा पुनर्बीमा सम्झौतासँग सम्बन्धित रकमको भुक्तानीका लागि विदेशी मुद्रा सिफारिस माग गर्न वा प्रदान गर्न यस व्यवस्थाले बाधा नपुर्याउने निर्देशनमा व्यवस्था गरिएको छ । बीमकको लगानीसम्बन्धी निर्देशन संशोधन, के-के छन् नयाँ व्यवस्था ?
नेपाल इन्भेष्टमेण्ट मेगा बैंक र नेपाल मेडिकल एसोसिएसनबीच सम्झौता, सदस्यलाई छुट सुविधा
काठमाडौं । नेपाल इन्भेष्टमेण्ट मेगा बैंक लिमिटेड र नेपाल मेडिकल एसोसिएसनबीच व्यावसायिक सम्झौता भएको छ । यस सम्झौतामा बैंकका प्रमुख कार्यकारी अधिकृत ज्योति प्रकाश पाण्डे र एसोसिएसनका अध्यक्ष डा. अनिल बिक्रम कार्कीले हस्ताक्षर गरेका छन् । सम्झौता अनुसार नेपाल मेडिकल एसोसिएसनका सम्पूर्ण सदस्यलाई बैंकको २७५ वटा शाखामार्फत विभिन्न सेवामा विशेष छुट उपलब्ध हुने भएको छ । जसअन्तर्गत प्रोफेशनल बचत खाता, दश लाखसम्मको दुर्घटना बीमा, व्यावसायिक कर्जा, साना तथा मझौला कर्जा, क्लिन सोसल कर्जा, व्यक्तिगत कर्जा, सवारी तथा घर कर्जा लगायतका सुविधामा विशेष प्रावधान गरिएको बैंकले जनाएको छ । साथै, डेबिटरक्रेडिट कार्ड, मोबाइल बैंकिङ लगायतका सेवामा पनि छुटको व्यवस्था गरिएको छ । बैंकले यस सम्झौताबाट एसोसिएसनका हजारौं सदस्य प्रत्यक्ष लाभान्वित हुने विश्वास व्यक्त गरेको छ।
