नेकपाले राष्ट्रिय सभा निर्वाचनका सबै सिटमा उम्मेदवारी दिने
काठमाडौं । नेपाली कम्युनिस्ट पार्टी नेकपाले आगामी राष्ट्रिय सभा निर्वाचनमा सबै सिटमा उम्मेदवारी दर्ता गर्ने भएको छ । बुधवार (आज) बिहान १० बजेदेखि दिउँसो ३ बजेसम्म उम्मेदवारी दर्ताको समय तोकिएको छ । नेपाली कांग्रेस र नेकपा एमालेबीच बनेको चुनावी गठबन्धनबाट अलग भएपछि नेकपाले एक्लै चुनावी मैदानमा उत्रिने निर्णय गरेको हो । पार्टीले सबै प्रदेशमा उम्मेदवार टुंग्याउँदै दर्ता प्रक्रियामा सहभागी हुने जनाएको छ । राष्ट्रिय सभा निर्वाचन आगामी माघ ११ गते हुँदै छ । प्राप्त सूचीअनुसार नेकपाले कोशी प्रदेशबाट खेमराज सुन्दास, हेमराज घिमिरे, नमिता न्यौपानेलाई उमेदवार चयन गरेको छ । नेकपाको मधेस प्रदेश उमेदवारहरूमा रामनन्दन प्रसाद, लक्ष्मण पौडेल, शम्भु पासवान र समिकुमारी अग्रवाल रहेका छन् । बागमती प्रदेशवाट प्रेमप्रसाद सापकोटा र सरोजकुमारी झासँगै गण्डकीबाट कपिल लामालाई उमेदवारको रूपमा नेकपाले अगाडि सारेको छ । बागमती प्रदेशको एक सिट भने खाली छोडेको छ । यस्तै, लुम्बिनी प्रदेशबाट दुर्गा भण्डारी, वृहस्पति अधिकारी, सर्जन विकको साथै कर्णाली प्रदेशबाट बुद्धिप्रसाद शर्मा र अन्जु महतारालाई उमेदबार बनाएको छ । सुदूरपश्चिम प्रदेशवाट टीकाराम जैशी र रोजी बस्नेत सुनारलाई उम्मेदबार वनाएको छ । नेकपाका मुख्य सचिव गणेशमान गुरुङका अनुसार पार्टीले गठबन्धनबिनै चुनावी प्रतिस्पर्धामा उत्रँदै आफ्नो राजनीतिक हैसियत पुनःस्थापित गर्ने लक्ष्य राखेको छ ।
दशरथ चन्द स्वास्थ्य विज्ञान विश्वविद्यालयको उपकुलपतिमा सुनिलकुमार र रजिस्ट्रारमा खेमराज नियुक्त
काठमाडौं । शहीद दशरथ चन्द स्वास्थ्य विज्ञान विश्वविद्यालयको उपकुलपतिमा प्रा.डा. सुनिलकुमार जोशी नियुक्त भएका छन् । उपकुलपति नियुक्तिका लागि मापदण्ड कडा भएकाले उम्मेदवारी नपरेको भन्दै पहिलो पटक सूचना जारी गर्दा आवेदन नपरेपछि पुनः दरखास्त आह्वान गरिएको थियो । दोस्रो पटक सूचना जारी गर्दा पनि उम्मेदवारी नपरेपछि तेस्रो पटक सूचना प्रकाशित गरिएको थियो । तेस्रो पटकको सूचनामा दुई जनाको मात्र नामावली दर्ता भएको थियो । तीमध्ये एक जनाको योग्यता मापदण्डअनुसार नपुगेकाले उपकुलपति पदमा प्रा.डा. सुनिलकुमार जोशी नियुक्त भएका हुन् । यस्तै, सोही विश्वविद्यालयको रजिस्ट्रार पदमा डा. खेमराज जोशी नियुक्त भएका छन् । रजिस्ट्रार पदका लागि भने १० जनाको आवेदन परेको थियो । मंगलबार शिक्षा, विज्ञान तथा प्रविधिमन्त्री महावीर पुनको अध्यक्षतामा बसेको विश्वविद्यालयको सिनेट बैठकले प्रा.डा. जोशीलाई उपकुलपति र डा. जोशीलाई रजिस्ट्रार नियुक्त गर्ने निर्णय गरेको हो । उपकुलपतिमा नियुक्त जोशी काठमाडौं मेडिकल कलेजमा कम्युनिटी मेडिसिन विषयका प्राध्यापक हुन् । राष्ट्रपति रामचन्द्र पौडेलले संघीय संसद्बाट पारित शहीद दशरथ चन्द स्वास्थ्य विज्ञान विश्वविद्यालय ऐन २०८२ असार ४ गते प्रमाणीकरण गरेसँगै उपकुलपति, रजिस्ट्रारलगायत पदाधिकारी नियुक्तिको प्रक्रिया सुरु गरिएको हो ।
सुनिल थापा, रामकुमारी झाँक्री र महन्थ ठाकुर राष्ट्रियसभा निर्वाचनमा गठबन्धनका उम्मेदवार
काठमाडौं । राष्ट्रिय सभाको निर्वाचनमा नेपाली कांग्रेसले पूर्वसहमहामन्त्री सुनिलबहादुर थापालाई कोशी प्रदेशवाट उम्मेदवार बनाएको छ । तीन ठूला दलहरू नेपाली कांग्रेस, नेकपा एमाले र जनता समाजवादी पार्टीबीच चुनावी तालमेल हुने भएपछि थापा उम्मेदवार बन्ने भएका हुन् । पछिल्लो तीन दलीय तालमेलअनुसार कांग्रेसले ९ सीट, एमालेले ८ सीट र जसपाले १ सिट पाउने भएका छन् । जसपाले प्राप्त गर्ने उक्त सिटमा अध्यक्ष महन्थ ठाकुर उम्मेदवार बन्ने भएका छन् । कांग्रेसले मधेसबाट धमेन्द्र पासवान र सञ्जत कर्ण, बागमतीबाट गीता देवकोटा, गण्डकीबाट जगत तिमल्सिना, लुम्बिनीबाट बासुदेव जंगली र चन्द्रबहादुर केसी, कर्णालीबाट ललितबहादुर शाही तथा सुदूरपश्चिमबाट खम्मबहादुर खातीलाई राष्ट्रिय सभा उम्मेदवार बनाएको छ । कोशीका उमेदवार थापा राष्ट्रपति रामचन्द्र पौडेलका मुख्य राजनीतिक सल्लाहकार थिए । राष्ट्रिय सभाको निर्वाचनमा प्रतिष्पर्धा गर्न थापाले उक्त पदबाट राजीनामा दिएका थिए । खाती पूर्वमहान्याधिवक्ता हुन् । एमालेले पनि आफूले तालमेलअनुसार पाएको सिटमा उम्मेदवारी टुँग्याएको छ । एमालेले पाएको ८ सीटमा कोशी प्रदेशबाट रोशनी मेचे, बागमतीबाट डा. प्रेमकुमार दङ्गाल, गण्डकीबाट सम्झना देवकोटा, लुम्बिनीबाट रामकुमारी झाँक्री, कर्णालीबाट मीना रखाल र सुदूरपश्चिमबाट लीलाकुमारी भण्डारीलाई उम्मेदवारका रूपमा अघि सारेको छ । मेचे एमाले अध्यक्ष केपी ओली प्रधानमन्त्री रहेको समयमा सचिवालयमा रहेर काम गरेकी नेतृ हुन् । डा. दँगाल किसान आयोगका पूर्वअध्यक्ष हुन् भने झाँक्री २०७४ को समानुपातिक सांसद हुन् ।
ईक्यानको नयाँ अध्यक्षका लागि पौडेल र भुसाल भिड्ने, १८ पदका लागि ३४ जनाको उम्मेदवारी
काठमाडौं । नेपाल शैक्षिक परामर्श संघ (ईक्यान) को नयाँ नेतृत्वका लागि दौडधुप सुरु भएको छ । यही पुस २८ गते हुने २०औँ साधारणसभा तथा महाधिवेशनबाट नयाँ नेतृत्व चयन गरिने भएपछि उम्मेदवारी दर्ता प्रक्रिया अघि बढेको हो । ईक्यानका अनुसार अध्यक्ष पदका लागि दुई जनाको उम्मेदवारी परेको छ । हालका प्रथम उपाध्यक्ष एन्ड्र्यु पौडेल (लक्ष्मण) र महासचिव दीपकराज भुसाल अध्यक्ष पदका प्रत्याशी बनेका हुन् । यसअघि अध्यक्षमा उम्मेदवारी दिने घोषणा गरेकी गीता शिवाकोटी (गीताञ्जली) पछि हटेपछि अध्यक्ष पदमा दुई जनाबीच प्रतिस्पर्धा हुने भएको हो । यस्तै, छ उपाध्यक्ष पदका लागि सात जनाको उम्मेदवारी दर्ता भएको छ । उपाध्यक्ष पदका उम्मेदवारमा रत्नबहादुर भट्टराई, विकल्पराज पाख्रेल, फिलिपकुमार डाँगी क्षेत्री, मञ्जित ढकाल, पुष्पराज भट्टराई, बासुदेव दाहल र गीता शिवाकोटी (गीताञ्जली) रहेका छन् । महासचिव पदका लागि भवननाथ हुमागाईं र नवराज केसी खत्रीको उम्मेदवारी परेको छ भने दुई सचिव पदका लागि चार जनाले उम्मेदवारी दिएका छन् । सचिव पदका उम्मेदवारमा लालबहादुर तामाङ, भूपाल केसी, आशिष कार्की र सुरज सिलवाल छन् । कोषाध्यक्ष पदका लागि उमा खड्का पाठक र साधना पुडासैनी उम्मेदवार बनेका छन् भने सह–कोषाध्यक्ष पदका लागि भीमबहादुर थापा र गोविन्द खनालले उम्मेदवारी दर्ता गराएका छन् । यस्तै, नौ सदस्य पदका लागि १४ जनाको उम्मेदवारी परेको छ । सदस्य पदका उम्मेदवारमा अशोककुमार हाथी, प्रकाश रिजाल, अनन्तराज घिमिरे, विवेक बस्नेत, दामोदर शर्मा, सञ्जीव पाण्डे, नवराज नेपाल, उद्धव वन, कमलप्रसाद तिमल्सिना, बसन्त पाण्डे, प्रभात पौडेल, भेषराज राय, दिनेश पौडेल र शिवप्रसाद अर्याल रहेका छन् । पुस २८ गते हुने साधारणसभा तथा महाधिवेशनबाट अध्यक्षसहित १८ पदका लागि ३४ जनाको उम्मेदवारी परेको ईक्यानले जनाएको छ। अध्यक्षका उम्मेदवार एन्ड्र्यु पौडेलले ईक्यानलाई थप व्यावसायिक, पारदर्शी र सदस्यकेन्द्रित संस्थाका रूपमा विकास गर्ने प्रतिबद्धता व्यक्त गरेका छन् । उनले शैक्षिक परामर्श व्यवसायमा देखिएका नीतिगत चुनौती समाधान, सरकारी निकायसँग प्रभावकारी संवाद तथा सदस्यहरूको हकहित संरक्षणलाई आफ्नो प्रमुख एजेन्डा बनाएका छन् । निर्वाचनका लागि दुवै पक्षले तयारी तीव्र पारेका छन् । भुसाल प्यानलतर्फ उपाध्यक्ष पदका उम्मेदवारमा फिलिप डीसी, मञ्जित ढकाल, विकल्पराज पाख्रेल र रत्न भट्टराई रहेका छन् । भुसाललाई पूर्वअध्यक्ष प्रकाश पाण्डे र वर्तमान अध्यक्ष शेषराज भट्टराईको समर्थन रहेको छ । भुसालका प्रस्तावक स्वयं पाण्डे र समर्थक भट्टराई रहेका छन् ।
शीतलहरका कारण चिसो बढेपछि विद्यालयमा पठनपाठन स्थगित
सुदूरपश्चिम । लगातारको शीतलहरका कारण चिसो बढेपछि कैलालीको गौरीगङ्गा नगरपालिका कार्यालयले एक हप्ताका लागि नगर क्षेत्रका विद्यालयमा बिदा दिएको छ । नगरपालिका कार्यालयले जारी गरेको सूचनामा केही दिनदेखि अत्यधिक चिसो भई बालबालिकाको स्वास्थ्यमा प्रतिकूल असर पर्नुका साथै विद्यालयको दैनिक पठनपाठन पनि प्रभावित भएकाले यही पुस २४ देखि आगामी माघ २ गतेसम्मका लागि बिदा दिइएको उल्लेख छ । बाक्लो हुस्सु र कुहिरोसँगै दिनहुँ चल्ने गरेको शीतलहरका कारण बढेको कठ्याङ्ग्रिने चिसोले कैलालीसहितका जिल्लाको जनजीवन कष्टकर बनेको छ । जाडोको सामना गरिरहेका अधिकांश सर्वसाधारणलाई आगो ताप्ने व्यवस्थाका लागि धनगढी उपमहानगरपालिका र गौरीगङ्गा नगरपालिकासहितका पालिका तहहरूले केही दिनअघि दाउरा उपलब्ध गराएको थियो । शीतलहरका कारण धनगढीको अधिकतम तापक्रम र न्यूनतम तापक्रम घट्दै गएको छ । पहाडी क्षेत्रमा पारिलो घाम लाग्दा यतिबेला तराईका जिल्लालाई भने कुहिरो र हुस्सुले ढाकेको छ । शीतलहरले बढ्ने चिसोका कारण आलु, तोरीलगायतको हिँउदे बालीमा डढुवा रोगको समस्या देखिएको किसानले बताएका छन् ।
विशेष महाधिवेशनलाई नीति महाधिवेशन बनाऔं : नेता केसी
काठमाडौं । नेपाली कांग्रेसका नेता अर्जुननरसिंह केसीले दोस्रो विशेष महाधिवेशनलाई सहमतिमा नीति महाधिवेशन बनाउन सकिने बताएका छन् । पार्टीका पूर्वप्रवक्तासमेत रहेका केसीले पत्रकारहरूसँग कुरा गर्दै पार्टीलाई विभाजनबाट रोक्न सबै पक्षलाई लचक हुन आह्वान गरेका छन् । कुनै बहानामा विशेष महाधिवेशन नरोकिने दाबी गर्दै केसीले यसलाई पार्टी निर्माणको अवसरको रूपमा योग गर्नुपर्ने बताएका छन् । पार्टीको विधानले बाध्यकारी मानेको विषयलाई कसैले पनि लत्याएर यसबाट भाग्न नहुनेमा केसीको जोड थियो ।
कांग्रेसमा शक्ति संघर्ष, विशेष महाधिवेशन आह्वान आज
काठमाडौं । नेपाली कांग्रेसभित्र जारी आन्तरिक विवादका बीच बुधबार (आज) विशेष महाधिवेशन औपचारिक रूपमा आह्वान गरिँदैछ । विशेष महाधिवेशनको माग गर्दै आएको पक्षले गठन गरेको दोस्रो विशेष महाधिवेशन सचिवालयले आज देशभरका प्रतिनिधिहरूलाई महाधिवेशनका लागि आह्वान गर्न लागेको हो । सचिवालयका तर्फबाट शान्ति सुरक्षाको व्यवस्था मिलाइदिन स्थानीय प्रशासनसँग औपचारिक पत्राचारसमेत गरिएको छ । सचिवालयका सदस्य तथा नेता मनोजमणि आचार्यले आजै विशेष महाधिवेशन आह्वान गरिने जानकारी दिँदै पार्टीलाई विद्यमान संकटबाट निकास दिन यो कदम चालिएको बताए । उनका अनुसार पार्टी विधानअनुसार नेतृत्वले समयमै नियमित महाधिवेशन गर्न नसकेपछि विशेष महाधिवेशन अपरिहार्य भएको निष्कर्षमा सचिवालय पुगेको हो । पार्टीलाई विधि र पद्धतिमा फर्काउन विशेष महाधिवेशनको आह्वान गरिएको हो । ‘पत्रकार सम्मलेनमार्फत नेतृत्वको जवाफदेहिता सुनिश्चित गर्ने र आन्तरिक लोकतन्त्र पुनःस्थापना गर्ने उद्देश्यले विशेष महाधिवेशनको आह्वान गरिएको हो,’ आचार्यले बताए । पछिल्लो समय ६० प्रतिशत महाधिवेशन प्रतिनिधिहरू आफूहरूको सम्पर्कमा रहेको दाबी आचार्यको छ । संस्थापन समूहले व्यापक दवाव दिए पनि दुइ तिहाई प्रतिनिधि विशेष महाधिवेशनमा उपस्थित हुने जानकारी आएको आचार्यले बताए । विशेष महाधिवेशनको घोषणासँगै कांग्रेसभित्रको आन्तरिक शक्ति संघर्ष थप सतहमा आएको छ । एकातर्फ संस्थापन पक्षले यस कदमलाई असंवैधानिक र पार्टी विभाजनतर्फ उन्मुख प्रयास भन्दै आलोचना गरिरहेको छ भने अर्कोतर्फ विशेष पक्षधरहरूले यसलाई पार्टी बचाउने अन्तिम विकल्पको रूपमा प्रस्तुत गरेका छन् । सहमहामन्त्री बद्री पाण्डेले अहिले विवाद गर्ने समय नभएको बताउँछन् । उनले भने, ‘विशेष महाधिवेशनको पक्षमा रहेका साथीहरूले पनि शान्त भएर सोंचेपछि वातावरण सहज बन्दै जान्छ ।’ राजनीतिक विश्लेषकहरूका अनुसार आजको आह्वानले नेपाली कांग्रेसको आन्तरिक राजनीति नयाँ मोडमा प्रवेश गर्ने संकेत गरेको छ । अब पार्टी नेतृत्वले यसलाई कसरी सम्बोधन गर्छ र विवाद संवादमार्फत समाधान हुन्छ कि टकरावतर्फ जान्छ भन्ने विषय चासोको केन्द्र बनेको छ । पछिल्लो समय वरिष्ठ नेता डा. शेखर कोइराला विभाजन रोक्न लागेका छन् । कोइराला पक्षले विशेष महाधिवेशनलाई संकल्प भेलाको रूपमा लैजाने, आगामी संसदीय चुनावका उमेदवारहरू कोइरालासहित सभापति शेरबहादुर देउवा र महामन्त्री गगन थापाले आपसी सहमतिमा बाँड्ने र नयाँ नेतालाई आगामी प्रधानमन्त्रीको रूपमा अगाडि लिएर जाने सहितका प्रस्तावहरू ल्याएको छ । बुधवार अपरान्ह राष्ट्रियसभाका उमेदवारहरूको मनोनयनपछि वार्तालाई घनिभूत बनाउने तयारी कोइराला पक्षधर नेताहरूले गरेका छन् ।
युनिक नेपाल लघुवित्तले सेयरधनीलाई लाभांश नदिने
काठमाडौं । युनिक नेपाल लघुवित्त वित्तीय संस्था लिमिटेडले गत आर्थिक वर्षको मुनाफाबाट सेयरधनीलाई लाभांश वितरण नगर्ने निर्णय गरेको छ । संस्थाको पुस २२ गते बसेको सञ्चालक समितिको बैठकले लाभांश नदिने निर्णय गरेको हो । बैठकले देशव्यापी रूपमा बढ्दै गएको लघुवित्तविरोधी गतिविधिका कारण ऋण नतिर्ने प्रवृत्ति बढ्नु, व्यवसायिक मन्दीका कारण ऋणीको व्यवसाय प्रभावित भई कर्जा असुली हुन नसक्नु तथा युवा पलायनका कारण कर्जा लगानी विस्तार हुन नसकेको निष्कर्ष निकालेको छ । साथै, कम्पनीको निष्क्रिय कर्जा बढ्दै जाँदा आम्दानीको ठूलो हिस्सा नोक्सानीमा डुबेको र यसले मुनाफा घट्दै नगद प्रवाहमा समेत असर परेको बैठकको निष्कर्ष छ । यस्तो अवस्थामा सेयरधनीलाई लाभांश बाँड्ने चाहना हुँदाहुँदै पनि संस्थाको वित्तीय अवस्था जोगाउनु नै उत्तम विकल्प ठहर गर्दै लाभांश वितरण नगर्ने निर्णय गरिएको संस्थाले जनाएको छ ।
