नेपाल टेलिकमको ५५ प्रतिशत नगद लाभांश पारित, माघ २ गतेदेखि वितरण गरिने
काठमाडौं । नेपाल दूरसञ्चार कम्पनी लिमिटेड(नेपाल टेलिकम)को सेयरधनीलाई ५५ प्रतिशत नगद लाभांश पारित भएको छ । आइतबार सम्पन्न टेलिकमको १०औँ वार्षिक साधारणसभाले कम्पनीको उक्त प्रस्तावलाई पारित गरेको छ । सभाले पारित गरे बमोजिम टेलिकमले आर्थिक वर्ष २०७३/७४ को मुनाफा रकम मध्येबाट ५५ रुपैयाँ प्रतिसेयरका दरले सेयरधनीहरुलाई नगद लाभांश वितरण गर्ने भएको छ । कम्पनीले आगामी माघ २ गते देखि सो मात्राको लाभांश रकम आफ्ना सेयरधनीहरुलाई वितरण गर्ने भएको छ । कम्पनीले वितरण गर्न लागेको उक्त लाभांश रकम अहिलेसम्म वितरण गरिएको लाभांश रकम मध्ये सबैभन्दा बढी हो । साथै, सभाले सर्वसाधारण शेयरधनी मध्येबाट निर्वाचित हुने सञ्चालकको कार्यकाल ३ वर्ष वा नियुक्ति भएको मिति देखि तीन वटा साधारणसभा बस्ने मिति मध्ये जुन पहिलो हुन्छ, सो मितिसम्म मात्र हुने व्यवस्था गरेको छ । कम्पनीले आर्थिक वर्ष २०७३/७४ मा खुद मुनाफा १५ अर्ब ३७ करोड रुपैयाँ कमाएको छ । साथै, गत आवको तुलनामा १७.२३ प्रतिशतले ग्राहक संख्यामा वृद्धि भई १ करोड ७६ लाखभन्दा बढी ग्राहकहरूलाई सस्तो तथा भरपर्दो दूरसञ्चार सेवा उपलब्ध गराउन कम्पनी सफल भएको सभामा जानकारी गराइएको छ ।
२०० प्रतिशत हकप्रद सेयर निष्कासन गर्ने साधारणसभाको निर्णय, अपी पावरले ल्याउने भयो २ अर्ब २६ करोड हकप्रद सेयर
काठमाडौं । अपी पावर कम्पनी लिमिटेडले २०० प्रतिशत हकप्रद सेयर निष्कासन गर्ने भएको छ । अपीको आइतबार सम्पन्न साधारणसभाले २ अर्ब २६ करोड ८० लाख रुपैयाँ बराबरको २ करोड २६ लाख ८० हजार कित्ता हकप्रद सेयर निष्कासन गर्न प्रस्ताव पारित गरेको छ । साधारणसभाले पारित गरेकाले कम्पनी व्यवस्थापनलाई हकप्रद निष्कासनको काम अघि बढाउन बाटो खुला भएको छ । अपीले धितोपत्र बोर्डमा हकप्रद निष्कासनका लागि निवेदन दिएको छ । जलविद्युत र सौर्य ऊर्जामा लगानी गर्न अपीले हकप्रद सेयर निष्कासन गर्न लागेको हो । कम्पनीले हकप्रद सेयर मध्ये १ अर्ब रुपैयाँ सिद्धकाली पावर लिमिटेडले निर्माण गर्न लागेको त्रिशुली–गल्छी र १ अर्ब २६ करोड ८० लाख रुपैयाँ १८ मेगावाट क्षमताका विभिन्न सौर्य आयोजनामा लगानी गर्ने जानकारी दिएको छ । गत आर्थिक वर्षको नाफाबाट ८ प्रतिशत बोनस सेयर जारी गरेपछि कम्पनीको सेयर संख्या १ करोड १३ लाख ४० हजार रुपैयाँ पुग्ने छ । कम्पनीले निर्माण गर्ने विभिन्न जलविद्युत र सौर्य आयोजनामा लगानीका लागि बैंकबाट ऋण लिने अधिकार सञ्चालक समितिलाई दिनका लागि सभामा प्रस्ताव सभाले पारित गरेको छ । कम्पनीले यसअघि २ अर्ब ११ करोड रुपैयाँको हकप्रद सेयर निष्कासन गर्न धितोपत्र बोर्डमा निवेदन दिइसकेको छ । सेयर पुँजी बढाएर हकप्रद निष्कासन रकम बढाएको छ । अपीले हाल ८ मेगावाटको नौगाड जलविद्युत आयोजना सञ्चालन गरिरहेको छ । यस्तै ८.५ मेगावाटको नौगाड आयोजना निर्माण गरिरहेको छ । यस्तै ७५ मेगावाटको त्रिशुली गल्छीमा बनाउने भनेपनि बैंकले लगानी नगर्ने भनेपछि सिद्धकालीले क्षमता घटाएर २६ मेगावाटको विद्युत उत्पादन अनुमतिपत्र (लाइसेन्स) लिनका लागि विद्युत विकास विभागमा निवेदन दिएको छ । त्रिशुली गल्छी आयोजना नबन्ने भएमा सो रकम प्रस्तावित ४० मेगावाटको माथिल्लो चमेलिया जलविद्युत आयोजनामा लगानी गर्ने प्रस्ताव सभाबाट पारित भएको सञ्चालक सतिश न्यौपानेले बताए । “सकेसम्म त्रिशुली गल्छीमा नभए माथिल्लो चमेलियमा लगानी गर्ने प्रस्ताव पारित भएको छ” उनले भने ।
गुहेश्वरी मर्चेण्ट बैंकिङ्गकाे १५ प्रतिशत बोनस सेयर पारित, हकप्रद किन्नेले पनि पाउने
काठमाडौं । गुहेश्वरी मर्चेण्ट बैंकिङ्ग एण्ड फाइनान्स लि.को सेयरधनीलाई १५.७९ प्रतिशत बोनस सेयर दिने प्रस्ताव पारित भएको छ । आइतबार(आज) सम्पन्न संस्थाको १६औँ वार्षिक साधारणसभाले सञ्चालक समितिको उक्त प्रस्तावलाई पारित गरेको हो । सभाले पारित गरे बमोजिम संस्थाले आ.व. २०७३/०७४ को नाफाबाट १५.७९ प्रतिशत बोनस सेयर दिने भएको छ । उक्त सेयर हालै निष्काशन भई बाडँफाँड गरिएको ४० प्रतिशत हकप्रद सेयरमा समेत प्रदान हुने गरी पारित भएको सभामा जानकारी गराइएको छ । अर्थात संस्थाकाे ४० प्रतिशत हकप्रद किन्नेले पनि सो मात्राको बोनस सेयर पाउने संस्थाले बताएको छ । उक्त बोनस पश्चात संस्थाको चुक्ता पुँजी ८० करोड रुपैयाँ पुगेको छ । हाल सम्ममा निक्षेप २ अर्ब ७७ करोड रुपैयाँ तथा कर्जा २ अर्ब ४१ करोड रुपैयाँ रहेको छ । साथै, सोही अवधिमा संस्थाले १ करोड ३९ लाख रुपैयँँ संचालन मुनाफा कमाउन सफल भएको संस्थाबाट जारी विज्ञप्तीमा उल्लेख छ । हाल सम्म यस संस्थाको आठ वटा शाखा कार्यालय रहेको छ । साथै, संस्थाले आगामी दिनमा थप दुई शाखा कार्यालयहरु खोल्ने तयारी गर्दैछ ।
फरवार्ड कम्युनिटी माइक्रोफाइनान्सको ६५ प्रतिशत लाभांशले लगानीकर्ता लोभिए, आइतबार सबैभन्दा बढी कारोबार
काठमाडौं । फरवार्ड कम्युनिटी माइक्रोफाइनान्स वित्तीय संस्था लिमिटेडले ६५ प्रतिशत लाभांश घोषणा गरेपछि लगानीकर्ता लोभिएका छन् । लाभांश सार्वजनिक भएपछि आईतबार नेपाल स्टक एक्चेन्ज लिमिटेडमा फरवार्डको सबैभन्दा बढी सेयर किनबेच भएको छ । अघिल्लो साता संस्थाले गत आर्थिक वर्षमा गरको नाफाबाट सेयरधनीलाई ५० प्रतिशत बोनस सेयर र १५ प्रतिशत नगद लाभांश दिने घोषणा गरेपछि लगानीकर्ता झुम्मिएका हुन् । फरवार्डले प्रस्ताव गरेको लाभांश नेपाल राष्ट्र बैंकको स्वीकृति र कम्पनीको आगामी साधारणसभाले पारित गरेपछि लगानीकर्तालाई वितरण हुनेछ । आइतबार फरवार्डको प्रतिकित्ता ३ हजार ३८१ रुपैयाँमा १ करोड ९३ लाख ८५ हजार रुपैयाँ बराबर ५ हजार ६३८ कित्ता सेयर किनबेच भएको छ । लगानीकर्ता लोभिए पनि फरवार्डको सेयर मूल्य प्रतिकित्ता १२३ रुपैयाँ घटेको छ । बिहीबार फरवार्डको सेयर मूल्य प्रतिकित्ता ३ हजार ५०४ रुपैयाँ थियो । चुक्ता पुँजी २० करोड रुपैयाँ रहेको संस्थाको बोनस सेयर वितरणपछि पुँजी ३० करोड रुपैयाँ पुग्नेछ । कम्पनीले गतबर्ष मात्र साधारण सेयर (आइपीओ) निष्कासन गरेको हो । चालु आर्थिक वर्षको पहिलो त्रैमासमा कम्पनीले ६ करोड ७८ लाख रुपैयाँ खुद नाफा गरेको छ । फरवार्डको संचित कोषमा ६६ करोड ७६ लाख १६ हजार रुपैयाँ छ । संस्थाको सेयर मूल्य धेरै भएकाले बोनस पाउने लोभमा सेयर खरिद गर्नु पछिका लागि फाइदा नहुने संभावना त्यत्तिकै छ । केही महिना अघिसम्म फरवार्डको सेयर मूल्य प्रतिकित्ता ४ हजार रुपैयाँ थियो । यस्तै नेपाल लाइफ इन्स्योरेन्स कम्पनी लिमिटेडको सेयर १ हजार ७८६ रुपैयाँमा १ करोड ५२ लाख ४० हजार रुपैयाँको सेयर कारोबार भएको छ । अघिल्लो साता प्रतिकित्ता १ हजार ८८९ रुपैयाँसम्म पुगेको नेपाल लाइफको सेयर मूल्य घटेको छ । पछिल्लो समयमा नेपाल लाइफका लगानीकर्ताले प्रतिकित्ता १ सय रुपैयाँ गुमाएका छन् । बढी लाभांश दिने हल्ला चलेपछि नेपाल लाइफको सेयर कारोबार बढी हुदै आएको छ । सानिमामाई हाइड्रोपावर लिमिटेडले थप आयोजना बनाउन लगानी बढाउने भएपछि यसको पनि कारोबार धेरै भएको छ । आइतबार सानिमाको प्रतिकित्ता ४५१ रुपैयाँमा १ करोड ४२ लाख ८५ हजार रुपैयाँको सेयर किनबेच भएको छ ।
९ अंकले ओरालो लागेको बजारमा चिलिमेका लगानीकर्ताले कमाए सबैभन्दा बढी
काठमाडौं । आइतबारको नेप्से परिसूचक ९.१९ अंकले ओरालो लागेको छ । सो दिन बजार खुले पश्चात लगातार ओरालो लागेको परिसूचक बजार बन्द हुँदा भने १४३१ अंकमा पुगेको छ । बजारमा परिसूचक सँगै सेयर कारोबारमा पनि गिरावट आएको छ । आइतबार कुल १५२ कम्पनीको ३२ करोड ८३ लाख रुपैयाँ बराबरको सेयर किनबेच भएको छ । सो दिन ९ लाख ७० हजार कित्ता सेयर किनबेच भएका छन् । झण्डै दोहोरो अंकले घटेको बजारमा सबैभन्दा बढी चिलिमे हाइड्रोपावर कम्पनीका लगानीकर्ताले कमाएका छन् । सो दिन यस हाइड्रोका लगानीकर्ताले करिब ७ (अर्थात ६.९५)प्रतिशत कमाएका छन् । आइतबार यस कम्पनीका सेयर मूल्य ६२ रुपैयाँले बढेर प्रतिकित्ता ९५४ रुपैयाँ पुगेको छ । उता सेन्ट्रल फाइनान्सका लगानीकर्ताले भने सबैभन्दा बढी (अर्थात ६.२९ प्रतिशत) गुमाएका छन् । सेयर बजारमा हाइड्रो र अन्य समूहको परिसूचक बाहेक बाँकी अन्य समूहको सूचक राताम्मे भएका छन् । हाइड्रो र अन्य समूहको परिसूचक क्रमशः ५५ र ३ अंकले उकालो लागेका छन् । सबैभन्दा बढी बीमा समूहको सूचक ९७ अंकले ओरालो लागेको छ ।
महालक्ष्मी विकास बैंकले ९ प्रतिशत नगद लाभांश वितरण गर्ने
काठमाडौं । महालक्ष्मी विकास बैंकले ९ प्रतिशत नगद लाभांश वितरण गर्ने भएको छ । गत शुक्रबार बसेको कम्पनी सञ्चालक समितिको बैठकले सो मात्राको लाभांश दिने निर्णय गरेको हो । बैंकले गत आवको मुनाफाबाट आफ्ना सेयरधनीलाई सो मात्राको नगद लाभांश वितरण गर्न लागेको हो । उक्त नगद लाभांश नेपाल राष्ट्र बैंकबाट स्वीकृत भै बैंकको साधारणसभाले अनुमोदन गरे पश्चात मात्र सेयरधनीलाई वितरण गरिने छ ।
नेप्सेमा सिद्धार्थ इक्विटी फण्डको कारोबार खुला, मूल्य प्रतिइकाई १० रुपैयाँ
काठमाडौं । आइतबारदेखि नेपाल स्टक एक्स्चेञ्ज(नेप्से)मा सिद्धार्थ इक्विटी फण्डको इकाई कारोबार खुलेको छ । नेप्सेका अनुसार कम्पनीले सो दिनको इकाई कारोबारको लागि प्रतिइकाई १० रुपैयाँ मूल्य तोकेको छ । सिद्धार्थ क्यापिटल अन्तर्गत संचालित यस सिद्धार्थ इक्विटीको कारोबार पुस ३० गते (आइतबार)देखि मात्रै खुलेको हो । हाल सम्म यस फण्डको एक अर्ब ५० करोड रुपैयाँ बराबरको १५ करोड इकाई नेप्सेमा सूचिकृत रहेको छ ।
भिसा कार्डबाट सपिङ गर्नुस्, भोली पल्टै खातामा थपिन्छ १० प्रतिशत नगद
काठमाडौं । के तपाईले भिसा कार्डबाट सपिङ गरिरहनु भएको छ, त्यसो भए अब तपाईको खातामा थपिनेछ १० प्रतिशतसम्म नगद । भिसा कार्डबाट वस्तु तथा सेवा खरिद गरेको भोली पल्टै तपाईको बैंक खातामा १० प्रतिशत क्यास ब्याक जम्मा हुनेछ । यस्तो सुविधासहितका सेवा नेपाल इन्भेष्टमेन्ट बैंकको नेतृत्वमा रहेको भिसा कार्ड सर्भिस प्रदायक बैंकहरुले ल्याएका हुन् । माघ १ गतेदेखि ३० गतेसम्म लागु हुने योजनामा ८ वटा बाणिज्य बैंक र ३ वटा विकास बैंकका कार्ड प्रयोगकर्ताले उपयोग गर्न सक्नेछन् । सेञ्चुरी, ग्लोबल आईएमई, कुमारी, महालक्ष्मी विकास बैंक, मेगा बैंक, मुक्तिनाथ विकास बैंक, एनसीसी, नेपाल इन्भेष्टमेन्ट, राष्ट्रिय बाणिज्य बैंक, सानिमा बैंक र टुरिजम डेभलपमेन्ट बैंकका भिसा कार्ड प्रयोगकर्ताले यस्तो क्यास ब्याक अफर उपयोग गर्न पाउनेछन् । ‘भिसा कार्डबाट वस्तु तथा सेवा खरिद गरेको भोलीपल्टै अधिकतम १० प्रतिशत वा एक हजारसम्मको क्यास ब्याक सम्बन्धीत खरिदकर्ताकै बैंक खातामा जम्मा हुनेछ’, नेपाल इन्भेष्टमेन्ट बैंककी रिना चन्दले भनिन् । कस्तो छ नियम ? यो अफरका लागि न्युनतम ५ सय रुपैंयाँसम्मको वस्तु तथा सेवा खरिद गर्नुपर्नेछ । एक देखि ३ वटासम्म कारोबारमा २ प्रतिशत वा एक सय रुपैंयाँसम्म क्यास ब्याक पाइनेछ । ४ देखि १५ वटा कारोबारमा ५ प्रतिशत वा अधिकतम २ सय रुपैंयाँसम्म क्यास ब्याक पाइनेछ । त्यस्तै १६ देखि ३० वटासम्म कारोबार गर्दा ५ प्रतिशत वा ५ सय क्यास ब्याक पाइन्छ भने ३१ देखि ५० वटासम्म कारोबार गर्दा १० प्रतिशत वा एक हजारसम्म क्यास ब्याक पाइनेछ । कति छन् पल्स मेसिन ? हाल मुलुकका प्रमुख शहरहरुमा ४५ सय वटा पल्स मेसिनहरु रहेका छन् । तीमध्ये २ हजार वटा पल्स मेसिन नेपाल इन्भेष्टमेन्ट बैंककोे नेटवर्कमा आवद्ध रहेका छन् । सबै पल्स मेसिनहरुबाट हुने वस्तु तथा सेवा खरिदमा क्यास ब्याक अफर लागु हुनेछ । नेपाल इन्भेष्टमेन्ट बैंकको नेतृत्वमा रहेको भिसा कार्ड सर्भिस प्रोभाइडर बैंक अन्तर्गत १६ लाख कार्ड होल्डर रहेका छन् । दशैं तिहारपछिको उत्साह यी बैंकहरुले दशै, तिहार तथा छठको अवसरमा भिसा कार्डबाट हुने खरिदमा १० प्रतिशतसम्म क्यास ब्याक अफर ल्याएका थिए । सो अफरका कारण कार्डबाट हुने खरिद ५२ प्रतिशत बढेपछि बैंकहरुले उत्साहित हुँदै अहिले नयाँ पुनः सोही प्रकारको अफर ल्याएको बताएका छन् । क्यासलेस कारोबारको गतिलाई बढाउने उदेश्यले यस्तो सेवा आरम्भ गरेको उनीहरुको दावी छ ।
