सेवा विस्तार गर्दै साझा यातायात, २९ वटा बस थप गर्ने
ललितपुर । साझा यातायातले २९ वटा बस थप गर्ने भएको छ । उपत्यकाभित्र चल्ने र बाहिरका लागि समेत गरेर २९ वटा नयाँ बस ल्याउन लागिएको कामु प्रमुख कार्यकारी अधिकृत महेन्द्रराज पाण्डेयले बताए। उपत्यका भित्रन लागेको नयाँ बसमध्ये एउटा अपाङ्गतामैत्री होचो बससमेत रहेको छ । अपाङ्तामैत्री बस र डिलक्स बस भित्रने क्रममा रहेको छ भने सिटी बसको टेण्डर प्रक्रिया सकिएको छ । डिलक्स बस उपत्यकाबाहिर चल्नेछ भने सिटी बसलाई माग भएका र आवश्यकता बढी भएका ठाउँमा चलाइने उनी बताउछन् । उनले भने, “बस उपत्यका आएपछि प्राविधिक जाँच गरेर यातायात व्यवस्था कार्यालयमा दर्ता हुन्छ र त्यसपछि नै रुट कता लिने भन्ने हुन्छ ।” काठमाडौँ उपत्यकाबाहिर अहिले साझाका २ वटा बस काठमाडौँ–बाग्लुङ रुटमा गुडिरहेका छन् । डिलक्स बस यही रुटमा थप्ने वा अन्य जिल्लामा भन्ने निर्णय भइसकेको छैन । काठमाडौँ उपत्यकामा चल्ने सिटी बसका लागि भने धेरै ठाउँबाट माग भएको छ । नयाँ बनेका नगरपालिकाले समेत साझाको शेयर खरिद गर्न र आफ्नो ठाउँमा साझा बसको सेवाका लागि इच्छुक देखिएका छन् । उनले भने, “काठमाडौँ उपत्यका र उपत्यकाबाहिर दुबैतिर साझाको माग छ ।” काठमाडौँ उपत्यकामा ४४ र उपत्यकाबाहिर २ वटा गरेर अहिले साझाका ४६ वटा बस सञ्चालनमा छन् । रासस
कुवेर मर्चेन्टको नाफा २ करोड ८२ लाख, इपीएस ३७.७१ रुपैयाँ
काठमाडौं । समस्याग्रस्त अवस्थाबाट हालै मुक्त भएको कुबेर मर्चेन्ट फाइनान्स लिमिटेडले लोभलाग्दो प्रगति गरेको छ । फाइनान्सले गत पुससम्म २ करोड ८२ लाख रुपैयाँ खुदनाफा गरेको छ । चाल आवको दोस्रो त्रैमासिक अवधिमा १ करोड ४१ लाख रुपैयाँ सञ्चालन नोक्सानी व्यहोरेको फाइनान्सले ४ करोड खराब कर्जा असुलीबाट नाफा गरेको हो । फाइनान्सको चुक्तापुँजी २८ करोड २ लाख रुपैयाँ छ । फाइनान्स २२ करोड ४६ लाख रुपैयाँ संचित नोक्सानमा रहेको छ । नेपाल राष्ट्र बैंकले कुबेर मर्चेन्टलाई मंसिर २४ गतेदेखि समस्याग्रस्त अवस्थाबाट मुक्त गरेको हो । हाल फाइनान्सले निक्षेप फिर्ता भुक्तानी तथा पुरानो कर्जा असुलीलाई जोड दिएको छ । व्यवसाय वृद्धिको काम नभएको र आगामी त्रैमाशबाट सुरु गर्ने फाइनान्सले जनाएको छ । हाल निक्षेप संकलन तथा कर्जा प्रबाहको काम बन्द रहेको फाइनान्सले जनाएको छ । फाइनान्सको निष्कृय कर्जा शतप्रतिशत छ । प्रतिसेयर नेटवर्थ घटेर ३७ रुपैयाँमा झरेको छ ।
यूलेन्स स्कुलले आर्थिक अनियमितता गरेको आशंका, तीन दिनभित्र प्रष्ट पार्न विभागको निर्देशन
काठमाडौं। आपूर्ति व्यवस्थापन तथा उपभोक्ता हित संरक्षण विभागले ललितपुर स्थित खुमलटारमा रहेको यूलेन्स स्कुल/यूलेन्स एजुकेसन फाउण्डेसनलाई तीन दिनभित्रमा वार्षिक शुल्क स्पष्ट पार्न निर्देशन दिएको छ । विभिन्न स्कुलहरुले विद्यार्थीहरुलाई ठगि गरेको उजुरीको आधारमा विभागले पछिल्लो समय स्कुलहरुको अनुगमन सुरु गरेको छ । बुधबार गरेको अनुगमनको क्रममा उक्त स्कुलले आर्थिक अनियमितता गरेको आशंका गर्दै वार्षिक शुल्क के कति आधारमा तयार गरेको हो, तीन दिनभित्र लिखित रुपमा प्रष्ट पार्न विभागले निर्देशन दिएको छ । भाटभाटेनीमा पनि भेटियो म्याद नघेको सामाग्री सोही दिन गरिएको अनुगमनमा काठमाडौं स्थित चुच्चेपाटी भाटभटेनी सुपर मार्केटमा म्याद नघेको सामानहरु बिक्री गरिरहेको अवस्थामा भेटिएको थियो । म्याद नघेको क्यानवरी, गोल्डेन डेट्स, फ्यान्टा, सेभेनअप लगायत सामाग्रीहरु जफत गरी नष्ट गरिएको विभागका निर्देशक निरज पौडेलले जानकारी दिए । विभागले त्यस्ता म्याद नघेको सामान बिक्री नर्गन साथै तीन दिनभित्रमा सुपर मार्केटको व्यसाय दर्ता, प्यान दर्ता, कम्प्यूटर विलिङ्ग लगायतका सम्पूर्ण कागजात समेत विभागमा पेश गर्न निर्देशन दिइएको छ ।
प्रतिकित्ता २१० मा एनसीसी बैंकको ७० लाख संस्थापक सेयर लिलामीमा, एनबी समूह बाहिरिदै
काठमाडौं । नेपाल क्रेडिट एन्ड कमर्श (एनसीसी) बैंकबाट ठुलो लगानीकर्ता एनबी समूह बाहिरिने भएको छ । समूहले आफनो स्वामित्वमा रहेको ७० लाख कित्ता संस्थापक सेयर प्रतिकित्ता न्युनतम २१० रुपैयाँ राखेर बिक्री गरेर बाहिरिन लागेको हो । संस्थापक सेयर खरिदका लागि बिक्री प्रवन्धक सीबीआईएल क्यापिटल लिमिटेडले बिहीबार शिलबन्दी बोलपत्र आब्हान गरेको छ । इच्छुक व्यक्ति र कम्पनीले फागुन ३ गतेसम्म बोलपत्र पेश गर्न सीबीआईएलले भनेको छ । प्रतिकित्ता २१० रुपैयाँअनुसार ७० लाख कित्ता सेयरको मूल्य १ अर्ब ४७ करोड रुपैयाँ हुन आउछ । एनसीसीको साधारण सेयर प्रतिकित्ता ३२५ रुपैयाँ छ । एनसीसीले चुक्तापुँजी बढाउन ५० प्रतिशत हकप्रद सेयर निष्काशनको गर्दैछ । एनबी समूहले हरिसिद्धि इँटा तथा टालय कारखाना लिमिटेड र अन्य ऋण तिर्नका लागि संस्थापक सेयर बिक्री गरेर बाहिरिन लागेको हो । नेपाल बंगलादेश बैंकमा एनबी समूहले सेयर बिक्री गरेको छ । बैंकले २ बराबर १ अनुपातमा २ अर्ब ३४ करोड रुपैयाँ बराबरको हकप्रद सेयर निष्कासन गर्न धितोपत्र बोर्डमा जान लागेको हो । चालु आर्थिक वर्षको ६ महिनामा बैंकको नाफा ४०० प्रतिशत बढेको छ ।२०७३ पुस मसान्तमा जम्मा ७ करोड रूपैयाँ खुदनाफा गरेको बैंकले २०७४ पुस मसान्तमा २८ करोडले वृद्धि गरेर ३५ करोड रूपैयाँ पुर्याएको हो । बैंकको नाफामा ३४ करोड रूपैयाँको भने राइट ब्याकको हिस्सा रहेको छ ।
६५ हजार ९५६ ले पाए प्रिमियर इन्स्योरेन्सको एफपीओ
काठमाडौं । प्रिमियर इन्स्योरेन्स कम्पनी नेपाल लिमिटेडको थप निष्कासन (एफपीओ) बिहीबार बाँडफाँड भएको छ । आवेदन दिने मध्ये ६५ हजार ९५६ जनाले मात्र १० कित्ताका दरले एफपीओ पाएका छन् । यी मध्ये ५ जनाले ११ कित्ता एफपीओ पाएका छन् । ७९९ रुपैयाँमा ६ लाख ५९ हजार ५६५ कित्ता एफपीओ निष्कासन भएको थियो । कुल आवेदक मध्ये १ लाख ८६ हजार ४७५ आवेदन छनौट भएका थिए । माग भन्दा ५.७४ गुणा आवेदन परेको थियो ।
ग्वार्कोमा यामाहाले खोल्यो शोरुम, एक्सचेन्ज र फाइनान्सको सुविधा दिइने
काठमाडौं। नेपालका लागि यामाहा ब्रान्डको मोटरसाइकल तथा स्कुटरको आधिकारिक विक्रेता एमएडब्लु इन्टरप्राइजेजले ललितपुरको ग्वार्कोमा नयाँ सोरुम सुरु गरेको छ । यामाहाको पुरानो डिलर रिसिक अटोमोबाइल्सले एक्सचेन्ज र फाइनान्स सुविधासहितको सेल्स आउटलेट सुरु गरेको जनाएको हो । ललितपुर जिल्लमा यामाहा मोटरसाइकल तथा स्कुटरको बढ्दो मागलाई सम्बोधन गर्न कम्पनीले नयाँ सोरुम स्थापना गरेको बताएको छ । सोरुमको उद्घाटन मिन नेपाल इन्टरनेशनल तथा यामाहा फेस अफ फेसिनो निती शाहले गरेका थिए । उद्घाटन कार्यक्रममा एमएडब्लु इन्टरप्राइजेजका एजीएम दिपक रौनियारले यामाहाका मोटरसाइकल र स्कुटरको बढिरहेको लोकप्रियताको कारण ठाउँ– ठाउँमा नयाँ डिलर र सोरुमको स्थापना गर्नु परेको बताए । ‘नयाँ सोरुमबाट ग्राहकले गुणस्तरीय सेवा प्राप्त गर्नेछन्,’ उनले भने । रिसिक अटोमोबाइल्सका प्रबन्ध निर्देशक मिलनबाबु मल्लले निकट भविश्यमा उक्त सोरुमबाट सर्भिसको सुविधा थाल्ने बताए । यामाहाले नेपाली बजारमा विभिन्न भेरियेन्टका मोटरसाइकल र स्कुटर विक्री गर्दै आएको छ । स्कुटरमा यामाहाको फेसिनो, रे जेडआर र रेजी गरी तीन मोडेल छन् भने मोटरसाइकलमा एफजेड–एस एफआई, आर १५, एसजीआरआर, सलुटो र प्राविधिक रुपमा उच्च स्तरीय आर३ उपलब्ध छन् ।
बढ्दो प्रविधिको प्रयोगले वित्तीय प्रमुखको भुमिकामा चुनौति थपिदै
काठमाडौं । पछिल्लो समय विश्वमा बढेको प्रविधिको प्रयोगले वित्तीय प्रमुख (सीएफओ) को भुमिका चुनौतिपूर्ण बन्दै गएको सरोकारवालाहरुले बताएका छन् । मंगलवारदेखि राजधानीमा सञ्चालनमा भइरहेको दक्षिण एशियाली लेखा व्यवसायीहरुको सम्मेलनमा सहभागिहरुले यस्तो बताएका हुन् । सम्मेलनमा सीएमए श्रीलंकाका परिषद सदस्य एड्रियन परेराले प्रविधि जहिले पनि सहयोगीको रुपमा उपयोगी हुन्छ तर, विश्वमा बढ्दै गएको प्रविधिको प्रयोगले वित्तीय प्रमुखहरुको भुमिकामा चुनौति थपिएको बताए । उनका अनुसार हाल विश्वमा ९ सयभन्दाबढी डिजिटल मुद्रा (क्रिप्टोकरेन्सी) प्रयोगमा रहेको छ । साइबर अपराध बढिरहेको र रोबटले मानिसले जस्तै काम गर्न थालेको अवस्थामा वित्तीय व्यवस्थापन थप चुनौतिपूर्ण बन्दै गएको उनको भनाइ छ । सम्मेलनमा बुधबार वित्तीय प्रमुखको भविश्य, संस्थागत सुशासनमा वित्तीय प्रमुखको भुमिका र प्रविधिगत रुपान्तरणमा वित्तीय प्रमूखको भुमिकामा लगाय विषयमा छलफल केन्द्रीत भएको बताइएको छ । अधिकांश मुलुकका वित्तीय प्रमूखहरुले प्रविधिको कारण आफ्नो कार्य कुशलतामा फरक पर्ने तथ्याङ्क प्रस्तुत गरे । उनीहरुले वित्तीय व्यवस्थापनमा प्रविधिको प्रयोग बढ्नु राम्रो भएपनि समस्याको समाधान नभएको उल्लेख गरेका थिए । परम्परागत शैलीको प्रमूखहरुको अस्तित्व संकटमा प्रविधिको प्रयोग बढ्दै गएकोले परम्परागत शैलीमा काम गर्ने वित्तीय प्रमूखहरुको अस्तित्व संकटमा परेको बताइएको छ । आइसीए श्रीलंकका उपाध्यक्ष मनिल जयसिंगेले वित्तीय विवरण बनाउने, तथ्यांक राख्ने लगायतका काम मात्र गर्ने वित्तीय प्रमुखहरुको अस्तित्व संकटमा पर्ने बताए । नेपाल बंगलादेश बैंकका प्रमुख कार्यकारी अधिकृत ज्ञानेन्द्र ढुंगानाले व्यवसायको जोखिम व्यवस्थापन गर्नेदेखि साइबर सुरक्षा अवलम्बन, राष्ट्रिय र अन्तर्राष्ट्रिय मापदण्डको परिपालना लगायत सबै किसिमका काममा वित्तीय प्रमुखहरु अभ्यस्त हुनुपर्ने बताए । त्यस्तै कार्यक्रममा भारतीय आइसीएका केन्द्रीय परिषद सदस्य विजय कुमारले आफ्नो स्वामित्व रहेको अर्को संस्थासँग कारोबार गर्न नडराउन पर्ने तर्क गरे । साफा ‘बेष्ट प्रिजेन्टेड अवार्ड’ प्रदान दक्षिण एसियाली लेखाव्यावसायी महासंघ (साफा)ले सन् २०१६ मा उत्कृष्ट वार्षिक प्रतिवेदन पेश गर्ने कम्पनीहरुलाई विभिन्न पदकद्वारा सम्मानित गरेको छ । बुधबार महालेखापरिक्षक टंंकमणी शर्मा र अर्थसचिव शंकर अधिकारीले दर्जन विधामा उत्कृष्ट वार्षिक प्रतिवेदन तयार गर्ने साफा सदस्य देशका कम्पनीहरुलाई सम्मानित गरेका हुन् । साफा बेस्ट प्रिजेन्टेड एनुअल रिपोर्ट अवार्ड–२०१६का विभिन्न १२ क्षेत्रका कम्पनीहरुलाई अवार्ड प्रदान गरिएको छ ।जसअन्र्तगत कृषि विधामा गोल्डेन हार्भेस्ट एग्रो लिमिटेड–वंगलादेश, सूचना प्रविधिमा माइन्डट्रि लिमिटेड–भारत लगायत देशलाई विभिन्न अवार्ड प्रदान गरिएको छ । त्यस्तै गैरसरकारी विधामा सिटिजन्स फाउन्डेसन–पाकिस्तान, निजी क्षेत्रका बैंक विधामा बिआएसी बैंक लिमिटेड–बंगलादेश, त्यस्तै श्रीलंका लागतयका विभिन्न कम्पनीहरु पुरस्कृत भएका छन् । सार्क एनिभर्सरी अवार्ड फर कर्पोरेट गभर्रनेन्स इस्लामी बैक बंगलादेश लिमिटेडले जितेको छ । नेपालबाट वित्तीय सेवा विधामा कैलाश विकास बैंक र निजी बैंक विधामा स्ट्यान्डर्ड चार्टर्ड बैंक नेपाल र निर्माण क्षेत्रमा बुटवल पावर कम्पनी लिमिटेड सम्मानित भएका छन् । बुधबार नै आइक्यानले आफ्नो २१ औं वार्षिकउत्सव समेत मनाएको छ । वार्षिकउत्सवको अवसरमा उत्कृष्ट विद्यार्थीहरु तथा कर्मचारीहरुलाई समेत पुरस्कार प्रदान गरिएको छ । यसैगरी वार्षिक उत्सवकै अवसरमा उत्कृष्ट कर्मचारीका रुपमा संस्थामा कार्यरत समिता डंगोल, आमोद खनाल र अनिमा मर्हजन समेततले नगत पुरस्कार प्रदान गरिएको जानकारी गराइएको छ ।
राष्ट्र बैंकले १० अर्ब पठाउदा ३ वटा बैंकले १ अर्ब ६० करोड मात्र लिए, अन्तर बैंक ब्याजदर घट्यो
काठमाडौं । नेपाल राष्ट्र बैंकले तरलता व्यवस्थापन गर्न १० अर्ब रुपैयाँ बजारमा पठाउदा ३ वटा बैंकले १ अर्ब ६० करोड रुपैयाँ मात्र लिएका छन् । केन्द्रीय बैंकले बुधबार १० अर्ब रुपैयाँ बजारमा पठाउदा अधिकाँश बैंकले पैसा लिएनन् । बुधबारसम्म बैंकिङ प्रणालीमा १९ अर्ब रुपैयाँ अधिक तरलता रहेको छ । बैंकिङ प्रणालीमा तरलता धेरै कम भएपछि राष्ट्र बैंकले बुधबार १० अर्ब रुपैयाँ पठाएको हो । यता अन्तर बैंक ब्याजदर घटेर ४.८ प्रतिशतमा झरेको छ । अन्तर बैंक ब्याजदर बढेपछि राष्ट्र बैंकले रिपोमार्फत बजारमा पैसा पठाएर नियन्त्रण गर्दै आएको छ । चालु आर्थिक वर्ष सुरु भएयता राष्ट्र बैंकले ८ पटक रिपो गरी बजारमा ५४ अर्ब रुपैयाँ बजारमा पठाएको छ । यता बैंकहरुले सार्वजनिक गरेको चालु आर्थिक वर्षको दोस्रो त्रैमाशिक वित्तीय विवरणमा कर्जा, निक्षेप र पुँजी अनुपात (सीसीडी) रेसियो ७९ प्रतिशत बढी रहेको छ । वित्तीय विवरणमा सीसीडी रेसियो कसिलो अवस्थामा पुगेपछि अधिकांश बैंकले थप कर्जा लगानी गर्न छाडेका छन् । चालु आवको पुससम्मको वित्तीय विवरण सार्वजनिक गर्ने बैंकहरुको सीसीडी रेसियो ८० नजिक पुगेकाले थप कर्जा लगानी गर्न नसक्ने अवस्थामा पुगेका छन् । सरकार स्वामित्वको राष्ट्रिय वाणिज्य बैंक मात्र सहज अवस्थामा छ । राष्ट्रिय वाणिज्यको कर्जा, निक्षेप र प्राथमिक पुँजी (सीसीडी) अनुपात ६९.१२ प्रतिशत छ । सीसीडीअनुसार राष्ट्रिय वाणिज्यसंग अधिक लगानीयोग्य पुँजी रहेको छ ।
