रसुवाका सांसद मोहन आचार्यले व्यक्तिगत लगानीमा ४ किलोमिटर सडक बनाए
काठमाडौं । सासंद मोहन आचार्यले रसुवाको कालिका गाउँपालिका अन्तरगत चित्रेपानी गाँउमा आफ्नो व्यक्तिगत लगानीमा सडक निर्माण गरेका छन् । एक महिनाअघि जिल्लाको दुर्गम गाउँमा सडक निर्माण गर्न १ करोड ७० लाख रुपैयाँ पर्ने स्क्याभेटर र डोजर सहयोग गरेका आचार्यले पुनः आफनै लगानीमा सडक निर्माण गरेका हुन् । बर्षौदेखी सडकको पर्खाईमा रहेका चित्रेपानीबासीको आफ्नै घर अगाडी मोटर गुडेको हेर्ने चाहाना सासंद आचार्यको विजय सगै पुरा भएको छ । अब दोश्रो चरणमा पासाङलामु राजमार्गको पराङक्षेबाट पात्ले जोड्ने सडक खन्ने काम शुरु हुने भएको छ । यो सडकको लम्बाई करिब २ किलोमिटर छ । सांसद आचार्यले बाटोले नछोएका जिल्लाका सबै स्थानहरुमा आफ्नो व्यक्तिगत खर्चमा बाटो पुर्याउने अभियानको शुभारम्भ माघ २७ गते स्काभेटर र डोजर जिल्लालाई उपलव्ध गराएर शुरु गरेका थिए । सो अभियानबाट लाभान्वित हुने चित्रेपानी बासिहरु पहिलो बन्न पुगेका छन् । अभियानअन्तर्गत पहिलो चरणमा रसुवाको कालिकास्थान गाउँपालिकाको लामाटोलबाट चित्रेपानी सम्मको करिव ४ किलोमिटर ग्रामिण सडक निर्माण सम्पन्न भएको छ । रसुवाका सबै गाँउमा ग्रामिण सडक सञ्जाल पुर्याउन योजना सार्वजनिक गरेका छन् । जिल्लाको गोसाँईकुण्ड गाउँपालिको लाङटाङ ,नौकुण्ड गाउँपालिकाको केही गाउँ, पार्वतीकुण्ड गाउँपालिकाको हाकु, सानो हाकु, नेसिङलगायतका ठाउँहरुमा अहिले पनि मोटर बाटो पुग्न सकेको छैन ।घर अगाडी मोटर बाटो आईपुग्दा भुकम्पबाट पीडितहरुलाई घर निर्माणमा प्रत्यक्ष सहयोग पुगेको स्थानिय बासिहरुको भनाई छ ।
उदयपुर सिमेन्टले ६० करोड कर तिर्न बाँकी, १५ दिन भित्र नतिरे कार्वाही गर्ने ठूला करदाता कार्यालयकाे चेतावनी
काठमाडौं । सरकार स्वामित्वको संस्थानले समेत करोडौ रुपैयाँ कर बुझाउन बाँकी रहेको पाइएको छ । लामो समयदेखि कर नबुझाएपछि ठूला करदाता कार्यालयले उदयपुर सिमेन्ट उद्योग लिमिटेडलाई कर तिराउन ताकेता गरेको छ । कर कार्यालयले १५ दिनभित्र कर तिर्न उद्योगलाई सयम (अल्टिमेटम) दिएको छ । तोकिएको समयभित्र कर नबुझाए आयकर ऐनअनुसार कार्वाही अघि बढाउने कर कार्यालयले चेतावनी दिएको छ । उद्योगले आर्थिक वर्ष ०५९/०५९ देखि हालसम्म कर नतिरेको कार्यालयले जानकारी दिएको छ । १६ वर्षको करको साँवा र ब्याज गरी ६० करोड ३० लाख २८ हजार रुपैयाँ कर तिर्न बाँकी रहेको कर कार्यलयले जनाएको छ । कर कार्यालयले फागुन १५ गतेसम्मको कर चुक्ता गर्न उद्योगलाई भनेको छ । कार्यालयकाअनुसार आयकर अग्रिम कट्टी र अन्तशुल्क समेत गरी ३२ करोड ९ लाख रुपैयाँ वक्यौता र सोको व्याज २८ करोड रुपैयाँ बढी छ ।
संस्थापकले समेत सिभिल बैंकको हकप्रद सेयर किनेनन्, ४२ लाख ३८ हजार कित्ता लिलामीमा
काठमाडौं । सिभिल बैंकका संस्थापक सेयरधनीले हकप्रद सेयर खरिद गरेनन् । ठुलो संख्यामा हकप्रद सेयर बिक्री नभएपछि बैंकले लिलामी गर्न लागेको छ । बैंकको संस्थापक र सर्वसाधारण गरी ४२ लाख ३८ हजार ९५८ कित्ता हकप्रद सेयर लिलामी हुन लागेको हो । संस्थापक समूहतर्फ ३२ लाख ४४ हजार ६ र सर्वसाधारणतर्फ ९ लाख ९४ हजार ३५८ कित्ता हकप्रद सेयर बिक्री हुन सकेन । बिक्र भएको हकप्रद गत सोमबार नै बाँडफाँट भएको बिक्री प्रवन्धक लक्ष्मी क्यापिटल मार्केट्स लिमिटेडले जनाएको छ । हकप्रद खरिदको बोलपत्र पेश गर्ने अन्तिम मिति चैत १ गते राखिएको छ । फागुन २३ गतेदेखि हकप्रद खरिदको बोलपत्र खुला हुने छ । बैंकले चुक्तापुँजी बढाएर ८ अर्ब रुपैयाँ पुर्याउन ४० प्रतिशत अर्थात २ अर्ब ७ करोड ४० लाख रुपैयाँ बराबरको २ करोड ७ लाख ४० हजार कित्ता हकप्रद निष्कासन गरेको हो । बैंकले मंसिर २२ देखि पुस २७ सम्म हकप्रद बिक्री खुला गरेको थियो । बिक्री नभएपछि बैंकले माघ १२ गतेसम्म समय थप गरिएको थियो । पछिल्लो समयमा प्रतिकित्ता १ सय रुपैयाँ अंकित मूल्यको हकप्रद सेयर बिक्री हुन छाडेको छ ।
जाली नेपाली नोटसहित छ जना पक्राउ
काठमाडौ । प्रहरीले पाँच जनालाई नक्कली नोटसहित पक्राउ गरेको छ । बल्खुस्थित कार्की फार्मेसीमा औषधि किन्न आएका दुई व्यक्तिका साथबाट ५ सय रुपैयाँको नक्कली नोट भोटिएपछि उनीहरुलाई पक्राउ गरी अनुसन्धान गर्दै जाँदा थप चारजना पक्राउ परेका हुन् ।धनुषा शर्षा नगरपालिका–९ घर भई हाल ललितपुर नख्खीपोट बस्ने धिरजबहादुर श्रीनेत ठकुरी र भोजपुर खावा–९ घर भई हाल नख्खीपोट बस्ने निगम राईले गत फागुन १२ गते कार्की फामेर्सीमा औषधि खरिद गरी ५ सयको नोट दिएकामा औषधि पसलले शंका लागि प्रहरीलाई खबर गरेपछि सो गिरोहबारे खुलेको हो । औषधि पसलेले खबर गरेलगत्तै पुगेको महानगरीय प्रहरी वृत्त, कालीमाटीको प्रहरी टोलीले ठकुरी र राईलाई नियन्त्रणमा लिएर खानतलासी गर्दा ठकुरीको साथबाट ५०० दरको थप दुई थान नोट बरामद गरेको थियो । उनीहरुसँग प्रारम्भिक सोधपुछ गर्दा सो नक्कली नोट ललितपुर गोदावरी नगरपालिका–४ घर भई हाल ललितपुरको ताल्सीखेलमा एमएस वर्कसप सञ्चालन गरी बस्ने मनोज केसीबाट लिएको बताएपश्चात् फागुन १३ गते वर्कसपबाट केसीलाई प्रहरीले पक्राउ गरेको थियो । केसीको शरीर तलासी गर्दा उनसको साथबाट समेत एक थान ५०० को नक्कली नोट बरामद भएपश्चात् सोधपुछ गर्दा उनले सो नोट सोलुखुम्बु, तिम्ला घर भई हाल काठमाडौँ, कपन बस्ने भेषकुमार थापा मगरबाट लिएको बताएपछि मगरलाई समेत प्रहरीले पक्राउ गरेको थियो । मगरका साथबाट २१ थान ५ सयको नक्कली नोट बरामद भएपछि आफूलाई रामेछाप, नागदह घर भई हाल गोठाटार बस्ने नेमा तामाङको साथबाट १ हजारको नक्कली नोट बरामद भएको थियो । तामाङले आफूले सो रकम आशीष माझीलाई पनि दिएको माझीलाई पक्राउ गर्दा उनको साथबाट समेत ५०० को नक्कली नोट बरामद भएको थियो । अनुसन्धानका क्रममा ती नक्कली नोटहरु नेमा तामाङले वीरजगन्जबाट ल्याएको खुल्न आएको प्रहरीले जनाएको छ । पक्राउ परेकाहरुलाई काठमाडौँ जिल्ला अदालतबाट खोटाचलन शीर्षक मुद्दामा मुद्दा अनुसन्धानमा रहेको प्रहरीले जनाएको छ । रासस
एनईए इन्जिनियरिङले २ हजार मेगावाटका ४ आयोजनाको अध्ययन थाल्यो, २ वर्षमा सकिने
काठमाडौं । सरकार स्वामित्वको एनईए इन्जिनियरिङ कम्पनी लिमिटेडले २ हजार मेगावाट क्षमताको ४ ठुला जलविद्युत आयोजनाको अध्ययन सुरु गरेको छ । नेपाल विद्युत प्राधिकरणअन्र्तगतको एनईएले ४५० मेगावाटको किमाथाँका अरुण, ४२६ मेगावाटको फुकोट कर्णाली, ६८८ मेगावाटको वेतान कर्णाली र ३०७ मेगावाटको जगदुल्ला जलासययुक्त आयोजनाको अध्ययन अघि बढाएको छ । सरकारले ठुला आयोजनाको अध्ययनका लागि कम्पनी स्थापना गरेको हो । यी सबै आयोजना अध्ययनको काम सुरु भएका एनईएका प्रमुख कार्यकारी अधिकृत (सीईओ) हितेन्द्रदेव शाक्यले बताए । केही वर्षभित्र अध्ययन सुरु भएकाको विस्तृत आयोजना प्रतिवेदन (डीपीआर) तयार भइसक्ने उनले जानकारी दिए । कम्पनीले हाल किमाथाँका अरुण आयोजानाको गत पुसदेखि संभाव्यता अध्ययन सुरु गरेको छ । आयोजनामा ड्रिलिङ र जिओलोजिकल अध्ययनका लागि बोलपत्र आब्हान गरेको छ । यस्तै फुकोट कर्णालीको सेडिमेन्ट अध्ययनका लागि आवश्यक प्रयोगशाला स्थापना गर्नका लागि बोलपत्र आब्हान गरेको छ । आयोजनाको अध्ययन सुरु भइसकेको छ । वेतान कर्णालीको पानीको वहावका साथै संभाव्यता अध्ययनको काम सुरु भएको छ । आयोजना कर्मचारी संचय कोषको अगुवाइमा निर्माण हुन लागेको छ । कोषले आयोजना बनाउनका लागि वेतान कर्णाली हाइड्रोपावर लिमिटेड स्थापना गरिसकेको छ । लगानी जुटाउने काम गरिरहेको छ । यस्तै जगदुल्ला जलासययुक्त आयोजनामा पानी नाप्नेलगायत अन्य प्रारम्भीक काम सुरु गरेको छ । जगदुल्ला आयोजना पश्चिमको भेरीमा पर्छ । सबै आयोजनाको डीपीआर तयार भएपछि निर्माणका लागि काम सुरु हुने भएको छ । हालसम्म सार्वजनिक र निजी क्षेत्रबाट गरी १ हजार मेगावाट बिजुली उत्पादन भइसकेको छ । यस्तै २ हजार ५ सय मेगावाट क्षमताका आयोजनाको काम भइरहेको छ ।
स्ट्याण्डर्ड चार्टर्ड बैंकका ग्राहकलाई नेपाल मेडिसिटी हस्पिटलमा विशेष छुट
काठमाडौं । स्ट्याण्डर्ड चार्टर्ड बैंकले आफ्ना ग्राहक तथा कर्मचारीहरुलाई थप सुविधा दिने उद्देश्यले नेपाल मेडिसिटी हस्पिटलबीच व्यापारिक साझेदारीका विषयमा सम्झौता गरेको छ । उक्त सम्झौतापत्रमा बैंकका प्रमुख कार्यकारी अधिकृत जोसेफ सिल्भानुस र नेपाल मेडिसिटी हस्पिटलका प्रमुख कार्यकारी अधिकृत सुधाकर जयरामले हस्ताक्षर गरेका छन् । सम्झौता अनुसार, बैंकका प्राथमिकता प्राप्त ग्राहकहरुलाई विशेष ‘मेडिसिटी प्राइभी प्रोग्राम’ को निशुल्क सदस्यता उपलब्ध गराइनेछ । सदस्यता प्राप्त गर्नेले मेडिसिटी हस्पिटलमा उपचार गराउँदा विभिन्न सेवाहरुमा १० प्रतिशतसम्म छूट तथा निशुल्क पहिलो स्वास्थ्य परामर्श, टेली–परामर्श, स्वास्थ्यमा पहुँचसम्बन्धि कुराकानी एवं सचेतता जाँच जस्ता सेवा पाउनेछन् । बैंकले आफ्ना प्राथमिकता प्राप्त ग्राहक एवं डेबिट र क्रेडिट कार्ड ग्राहकहरुका लागि सेवा उपलब्ध गराउन हस्पिटलसँग समझदारी गरेको हो । मेडिसिटीले नेपालमैं पहिलोपटक प्रिमियम मेडिकल प्याकेज ‘अभिभावकप्रति समर्पित’ सार्वजानिक गर्दैछ । बैंकको हस्पिटलसँगको रणनीतिक साझेदारीअन्तर्गत, बैंकका ‘सिल्भर जेनेरेसन’ (विशेष ग्राहक) र उनका अभिभावकहरुलाई विशेष हेरचाहको प्याकेज सेवा निशुल्क प्रदान गरिनेछ । बैंकका प्राथमिकता प्राप्त ग्राहकहरुले पनि ‘अभिभावकप्रति समर्पित’ प्याकेजमा ६० प्रतिशतभन्दा बढीको छुट पाउनेछन् । सम्झौताअनुसार बैंकको डेबिट र क्रेडिट कार्ड लिएकाहरुले समेत हस्पिटलले प्रदान गर्ने सेवामा ७ प्रतिशतको छुट पाउनेछन् । यद्यपि, औषधि, उपभोग्य वस्तु, प्रत्यारोपण सामाग्री एवं चिकित्सकको परामर्श शुल्कमा भने यो छुट नपाइने बैंकद्धारा जारी विज्ञप्तिमा उल्लेख छ ।
महालक्ष्मी विकास बैंकद्धारा जेहेन्दार विद्यार्थीलाई आर्थिक सहयोग
काठमाडौं । महालक्ष्मी विकास बैंक लिमिटेडको मनहरी शाखाले जेहेन्दार विद्यार्थी राजन खड्कालाई छात्रवृत्ति स्वरुप १५ हजार रुपैयाँ प्रदान गरेको छ । बैंकले संस्थागत सामाजिक उत्तरदायित्व अन्तर्गत राष्ट्रिय उच्च माध्यामिक विद्यालयका कक्षा ११ मा अध्ययरत खड्कालाई उक्त सहयोग गरेको हो । त्यसैगरि, बैंकको नारायणगढ शहिदचोक शाखाले देवघाटधाम स्थित गलेश्वर आश्रम अन्तर्गतको वेदवेदाङ्ग विद्यालयलाई शैक्षिकतथा खेलकुद सामाग्री सहयोग गरेको छ ।
धान किन्न नसकेपछि नेपाल खाद्य संस्थानले ३४ करोडको चामल किन्ने
काठमडौं । लक्ष्य अनुसारको धान खरिद गर्न नसक्ने भएपछि नेपाल खाद्य संस्थानले वैशाखदेखि चामल किन्ने भएको छ । गएको दुई वर्ष पर्याप्त धान खरिद गरेकोले चामल किन्न नपरेकाे संस्थानले यो वर्ष धान खरिद गर्न नसकेसँगै चामल किन्ने लागेकाे हो । संस्थानको प्रवक्ता शंकर सापकोटाले यो वर्ष ३४ करोड रुपैयाँ बराबरको करिब १ लाख क्वीटल चामल खरिद गर्ने तयारी गरिरहेको बताए । ‘अबको केही हप्तासम्म धान खरिद गरिनेछ,’ उनले भने ‘तर धान खरिद उत्साहजनक देखिएको छैन । त्यसैले चामल किन्ने गृहकार्य भइरहेको छ ।’ आगामी वैशाखदेखि चामल खरिद गर्न सुरु गर्ने उनले बनाए । यस वर्ष संस्थानले निर्धारण गरेको धानको मूल्यभन्दा बजार मूल्य बढी भएको तथा भारत सरकारले जीएसटी लागू गरेसँगै अनौपचारिक रुपमा मुलुकमा भित्रिने गरेको धान नआएकोले पनि धान खरिदमा प्रभाव परेको उनकाे बुझाइ छ । संस्थानले झापा, विराटनगर, लहान, विरगन्ज, काठमडौं, भैरवा, नेपालगन्ज, सुर्खेत, धनगडी लागयतका स्थानहरुबाट चामल खरिद गर्ने जानकारी दिएको छ । संस्थानका अनुसार खाद्यन्न सुरक्षा भण्डारणको लागि २५ हजार टन खाद्यन्न स्टकमा राख्नु पर्ने हुन्छ । त्यस्तै सार्क फुड बैंकमा नेपालकोतर्फबाट ८ हजार टन खाद्यन्न जम्मा गर्नु पर्ने प्रावधान छ । चालु वर्ष ६४ करोड रुपैयाँ बराबरको २ लाख ७६ हजार क्वीटल धान खरिद गर्ने लक्ष्य राखेता पनि हालसम्म करिब ९४ हजार क्वीटल मात्र धान खरिद भएको संस्थानका प्रवत्ता सापकोटाको भनाइ छ ।
