नेपाल इन्भेष्टमेन्ट बैंकबाटै आइएमई लाइफको इन्स्योरेन्स सेवा पाइने
काठमाडौं । अब नेपाल इन्भेष्टमेन्ट बैंक लिमिटेडबाटै आइएमई लाइफ इन्स्योरेन्सको बीमा सेवा पाइने भएको छ । उक्त सेवा सम्बन्धि आइएमई लाइफ इन्स्योरेन्स र नेपाल इन्भेष्टमेन्ट बैंकबीच आइतबार बैंकास्योरेन्स सम्झौता भएको छ । उक्त सम्झौतामा इन्स्योरेन्स कम्पनीतर्फबाट प्रमुख कार्यकारी अधिकृत श्रीचन्द्र भट्ट र नेपाल इन्भेष्टमेन्ट बैंकका तर्फबाट नायब कार्यकारी अधिकृत ज्योतीप्रकाश पाण्डेले हस्ताक्षर गरेका छन् । उक्त सम्झौता पछि सर्वसाधारण तथा बैंकका ग्राहकहरुले नेपाल इन्भेष्टमेन्ट बैंकको जुनसुकै शाखाबाट आइएमई लाइफको जीवन बीमा गराउनका साथै जीवनबीमा सम्बन्धी जानकारी पाउन सक्नेछन् ।
बजार १४ अंकले घट्यो, सबै सूचक राताम्मे
काठमाडौं । आइतबारको सेयर बजार १४.८२ अंकले घटेर ११६६.४३ अंकमा झरेको छ । कारोबार शुरु भएदेखि निरन्तर ओरालो लागेको सो दिनको बजार १.२५ प्रतिशतले घटेर बजार बन्द भएको छ । बजार कुल १५४ कम्पनीको २५ करोड ६ लाख रुपैयाँ बराबरको सेयर कारोबार भएको छ । सो दिन सबैभन्दा बढी एनएमबी बैंकको ३ करोड ६५ लाख रुपैयाँ बराबरको सेयर किनबेच भएको छ । सो दिन कारोबारमा आएका सबै सूचक राताम्मे भएका छन् । सबैभन्दा बढी निर्जीवन बीमा समूह ९६ अंकले घटेको छ । त्यस्तै, उत्पादनमूलक ५०, जीवन बीमा ४४, होटल २८, हाइड्रोपावर २४ र माइक्रोफाइनान्स २२ अंकले घटेका छन् । अन्य बाँकी समूह भने सामान्य अंकले ओरालो लागेका छन् ।
मुक्तिनाथ विकास बैंकले १८ प्रतिशत बोनस र २० प्रतिशत हकप्रद जारी गर्ने, सेयर मूल्य बढ्यो
काठमाडौं । मुक्तिनाथ विकास बैंक लिमिटेडले सेयरधनीलाई चुक्ता पुँजीको १८.२५ प्रतिशत बोनस सेयर दिने भएको छ । साथै, बैंकले कर प्रयोजनको लागि ०.९३ प्रतिशत अर्थात २ करोड ४८ लाख रुपैयाँ नगद लाभांश दिने प्रस्ताव गरेको छ । उक्त प्रस्ताव बैंक सञ्चालक समितिको बैठकले गरेको हो । बैठकले उक्त बोनस पश्चात कायम हुन आउने चुक्ता पुँजीमा २० प्रतिशत अर्थात १० बराबर २ का दरले हकप्रद सेयर जारी गर्ने छ । हाल बैंकको चुक्ता पुँजी २ अर्ब ५९ करोड रुपैयाँ रहेको छ । १८.२५ प्रतिशत बोनस पछि कम्पनीको चुक्ता पुँजी ३ अर्ब रुपैयाँ नाघ्ने छ । त्यसपछि उक्ता पुँजीमा २० प्रतिशत हकप्रद जारी पछि कम्पनीको नयाँ चुक्ता पुँजी ३ अर्ब ६७ करोड रुपैयाँ नाघ्ने छ । कम्पनीको उक्त प्रस्तावलाई नेपाल राष्ट्र बैंकले स्वीकृति तथा बैंकको आगामी साधारणसभाले पारित गर्नुपर्ने छ । कम्पनीको १२औँ वार्षिक साधारणसभा यही मंसिर २९ गते बस्दै छ । सो प्रयोजनको लागि मंसिर १८ गतेदेखि मंसिर २९ गतेसम्म कम्पनीको बुक क्लोज हुँदै छ । कम्पनीले बोनस घोषणासँगै लगानीकर्तामा खुसी छाएको सेयर मूल्यले संकेत गरेको छ । आइतबार कम्पनीको सेयर मूल्य बढेर प्रतिकित्ता ४१४ रुपैयाँ पुगेको छ । बिहीबार प्रतिकित्ता ४०९ रुपैयाँमा कारोबार भएको बैंकको सेयर मूल्य आइतबार ५ रुपैयाँ अर्थात १.२२ प्रतिशतले बढेर प्रतिकित्ता ४१४ रुपैयाँ पुगेको छ ।
सीजीका आकर्षक स्मार्टगिजरहरु नेपाली बजारमा
काठमाडौं । जाडो महिनालाई लक्षित गरि आकर्षक स्मार्ट गिजरहरु बजारका आएका छन् । सीजीको उत्पादनमा नेपाली बजारमा विभिन्न किसिमका स्मार्ट इलेक्ट्रिक तथा ग्यास गिजरहरु आएका हुन् । चिसो पानीबाट नुहाउने समस्याको हलका लागी इलेक्ट्रिक गिजरहरुमा १० लिटर, १५ लिटर र २५ लिटरमा उपलब्ध गराएको छ । बिषेशता यी गिजरहरुमा थर्माेस्ट कन्ट्रोल र उच्च तापक्रमबाट हुने क्षतिबाट पनि बचाउने गर्दछन् । त्यस्तै ग्यास गिजरहरुमा विभिन्न रंगहरु र ११ वाट हिटर इनपुट तथा २८०० प्रति एल.पि.जी ग्यास प्रेसरमा चल्ने बिषेशताहरु रहेका छन् । हेर्दा निकै नै आकर्षक देखिने यी गिजरहरु नेपालभरि सजिलै पाउन सकिने भएको छ ।
लेखा समितिमा कंसाकारको बयानः वाइड बडीमा कमा र फुलस्टप पनि बिगारेका छैनौं
काठमाडौं । नेपाल बायु सेवा निगमका प्रबन्ध निर्देशक सुगत रत्न कंसाकारले वाइड बडी जहाज खरिदमा कमा र फुलस्टप समेत नबिगारेको बयान दिएका छन् । प्रतिनिधी सभाको सार्वजनिक लेखा समितिमा वाइड बडी जहाज खरिद प्रक्रियाबारे उठेका प्रश्नहरुको जवाफ दिँदै कंसाकारले त्यस्तो दावी गरेका छन् । ‘हामीले वाइड बडि खरिदमा सार्वजनिक खरिद एेन र विनियमालीका प्रत्येक अक्षर र कमा मिलाएका छौं, त्यसको सबै प्रमाण हामीसँग छ’, कंसारकारले भने । उनले वाइड बडी ल्याउने प्रयास गर्दा यस अघि पनि आफुलाई जेल हाल्ने प्रयास भएको र अहिले पनि जहाज खरिद प्रक्रिया सम्पन्न गरेपछि निगमलाई डुबाउन अनेकखाले षडयन्त्र भैरहेको आरोप पनि लगाए । बैठकमा निगमको कार्यकारी अध्यक्ष मदन खरेलले वाइड बडिलाई संचालन गर्न नसक्दा निगमले घाटा बेहोर्नु परेको बताए । उनले वाइड बडिलाई जापानको नारिता ,ओसाका शहर तथा चीनका बिभिन्न् शहरहरुमा उडाउने तयारी भैरहेको जानकारी पनि दिए । हाल निगमसँग ५० अर्बको सम्पति र ३९ अर्ब ऋण रहेको जानकारी पनि बैठकमा गराईएको थियो । हाल निगमले साँवा र ब्याज गरि मासिक १ अर्ब १३ करोड रुपैंयाँ बुझाउने गरेको जानकारी पनि बैठकमा गराईएको थियो । बैठकमा बोल्ने अधिकांश सदस्यहरुले वाइड बडी जहाज खरिद गरिएको हो वा भाडामा ल्याईएको हो ? नागरिक लागनी कोष र कर्मचारी सञ्चय कोषको ३३ अर्ब ऋण त डुब्दैन भन्ने जिज्ञासा राखेका थिए । सांसदहरुले निगम नेतृत्वको कमजोर क्षमताका कारण देशको शानका रुपमा रहेको निगम ओरालो लाग्दै गएको आरोप लगाएका थिए ।
उद्योग छाडेर व्यापारमा लाग्ने उल्टो बाटो नहिड्नुसः उद्योग मन्त्री यादव
काठमाडौं । उद्योग, बाणिज्य तथा आपूर्ति मन्त्री मातृका यादवले नाफाको पछि लागेर उद्योग बन्द गर्दै व्यापार तिर लाग्ने प्रवृत्तिको आलोचना गरेका छन् । आइतबार उद्योग दिवसका अवसरमा आयोजीत कार्यक्रममा मन्त्री यादवले उद्योग छाडेर व्यापारमा लाग्ने व्यवसायीलाई उल्टो बाटो हिडेको आरोप पनि लगाए । उद्योगीहरुले उद्योग स्थापनामा जोड नदिएर व्यापारीक मानसिकता मात्रै राखेर ‘उल्टो बाटो’ हिडेको मन्त्री यादवको आरोप छ । यादवले उद्योगीहरुको सरकारलाई हेर्ने दृष्टिकोण ठिक नभएको भन्दै असन्तुष्टि व्यक्त गरेका छन् । मन्त्री यादवले उद्योगीहरुले सरकारको नीति, व्यवहार केही पनि ठिक नभएको भन्ने गरेकोमा आपत्ति समेत जनाएका हुन् । मन्त्री यादवले स्वदेशी उद्योगमा जोड दिएर अघि बढन पनि उद्योगीहरुलाई आग्रह गरे । मन्त्री यादवले व्यापारीहरुले देशको भन्दा पनि आफ्नो मुनाफामा मात्रै ध्यान दिएको गुनासो पनि गरे । स्वदेशी बस्तु उत्पादनमा उद्योगीहरुले जोड दिए त्यसका लागि आवश्यक सहयोग गर्न सरकार प्रतिवद्ध रहेको यादवको भनाइ थियो ।
तल्लो मोदीखोलाको जलविद्युत् उत्पादन पुसभित्रै, ४२ लाख साधारण शेयर निष्काशन गर्ने
काठमाडौं । २० मेगावाट क्षमताको तल्लो मोदीखोला जलविद्युत् आयोजनाको उत्पादन शुरु गर्ने भएको छ । पर्वतको कुश्मा नगरपालिका–८ स्थित पराधिमा अधिकांश निर्माणकार्य पूरा भएको उक्त आयोजना अबको डेढदुई महीनामै उत्पादन थाल्ने भएको छ । असारमा नै उत्पादन योजना शुरु गर्ने भनिएता पनि स्थानीय अवरोध एवं प्राकृतिक प्रकोप लगायतका कारणले काम सम्पन्न गर्न झण्डै छ महीना ढिलाइ भएको छ । आयोजनाका जनसम्पर्क अधिकृत सुरेन्द्र बेलवासेका अनुसार अब सामान्य फिटिङ्सको कामबाहेक सबैजसो काम सकिएको हुँदा पुसभित्रै उत्पादन शुरु गर्ने बताएका छन् । तीन अर्ब ६० करोड रुपैयाँको लागत अनुमानमा निर्माण शुरु भएको उक्त आयोजना समयमा पनि अपेक्षित उपलब्धी हासिल गर्न नसकिएको स्विकार गरेका छन् । आयोजना प्रमुख पवनकुमार यादवले गएको वर्ष सबैभन्दा धेरै अपेक्षा गरेका त्यहि बेलामा चुनाव भएका कारणले पनि काममा समस्या आएको जनाएका छन् । एक/दुई प्रतिशत सामान्य काममात्र बाँकी रहेको बताउँदै सिभिलतर्फको निर्माण कम्पनी फेवा कन्स्ट्रक्सनले पनि अधिकांस काम पूरा भएको जनाएको छ । निर्धारित समयमा उत्पादन दिन नसकेपछि लागत बढ्ने भएको छ । ०६८ भदौमा नेपाल विद्युत् प्राधिकरणसँग विद्युत् खरिद सम्झौता भएको आयोजनाको निर्माण कार्य एक वर्ष ढिला भएको थियो । आयोजनाको वार्षिक र११ करोड ७० लाख युनिट विद्युत् उत्पादन गर्ने लक्ष्य छ । आयोजनाको इञ्जिनीयरिङलगायत निर्माणको ठेक्का मनाङ ट्रेडलिङ्क र साउथ एसियन इन्फ्रास्ट्रक्चरले गरिरहेका छन् । एक सय रुपैयाँ दरमा ४२ करोड रुपैयाँ बराबर शेयर निष्काशन गर्ने तल्लो मोदीखोला जलविद्युत आयोजनाको प्रवद्र्धक मोदी इनर्जी लिमिटेडले सर्वसाधारणका लागि शेयर निष्काशन गर्ने भएको छ । आयोजनाको आइपिओ (प्रारम्भिक शेयर निष्काशन) सम्बन्धी कार्यका लागि मोदी इनर्जी कम्पनी र बिक्री प्रबन्धकको रूपमा सनराइज क्यापिटल लिमिटेडबीच द्विपक्षीय सम्झौतापत्रमा हस्ताक्षर समेत भएको छ । कम्पनीका तर्फबाट सञ्चालक कुमुदकुमार दुगड तथा क्यापिटलका तर्फबाट प्रमुख कार्यकारी अधिकृत विजयलाल श्रेष्ठ बीच सो सम्झौतापत्रमा हस्ताक्षर भएको हो ।मोदी इनर्जी लिमिटेड, डिल्लीबजार, काठमाडौँले प्रतिसाधारण शेयर एक सय रुपैयाँ दरमा ४२ करोड रुपैयाँ बराबरको ४२ लाख कित्ता साधारण शेयर निष्काशन गर्ने भएको छ । रासस
गरिमा विकास बैंकद्धारा विभिन्न ८ स्थानमा रक्तदान सम्पन्न, ४३० युनिट रगत संकलन
काठमाडौं । गरिमा विकास बैंक लिमिटेडले आफ्नो स्थापनाको १२औं वर्षमा प्रवेश गरेको अवसरमा विभिन्न ८ स्थानमा रक्तदान कार्यक्रम सम्पन्न गरेको छ । उक्त कार्यक्रमबाट बैंकले ४३० युनिट रगत संकलन गरेकाे छ । विकास बैंकले केन्द्रीय कार्यालय काठमाडौंकाे लाजिम्पाट, शाखा कार्यालयहरु महेन्द्रपुलपोखरा, बुटवल रुपन्देही, बेनीम्याग्दी, नारायणगढ चितवन, विराटनगर मोरङ, ईटहरी सुनसरी र घोराही दाङमा रक्तदान कार्यक्रम सम्पन्न गरेको हो । यसै क्रममा बैंकको उद्गमस्थल स्याङजाको वालिङ शाखा कार्यालयमा सरसफाई कार्यक्रम गरेको छ । साथै, विकास बैंकले पोखराको बुद्धचोक शाखा कार्यालयको उद्धघाटन नेपाल राष्ट्र बैंक पोखरा शाखाका निर्देशक पोमनाथ गौतमले गरेका छन् । विकास बैंकले आफ्नो बार्षिकोत्सवको अवसरमा प्रत्येक वर्ष विभिन्न सामाजिक उत्तरदायित्व मुलक कार्यक्रमहरु सम्पन्न गर्दै आईरहेको छ ।
