आशा लघुवित्तको आइपीओ आजदेखि, एक हजारकै आवेदन गर्ने सुविधा
काठमाडौं । आशा लघुवित्तको आइपीओ आजबाट बिक्रि खुल्ला भएको छ । कम्पनीले ६ लाख ७४ हजार कित्ता सेयर सर्वसाधारणका लागि निष्काशन गरेको हो । जसमा न्युनतम १० कित्ता अर्थात एक हजार रुपैंयँकै आवेदन दिन सकिनेछ भने अधिकतम ३ हजार ३ सय ७० कत्तासम्म आवेदन दिन सकिन्छ । छिटोमा माघ २२ गते र ढिलोमा फागुन १९ गते निष्काशन बन्द हुनेछ । निष्काशित सेयरमध्ये १० हजार ३ सय ७० कित्ता कर्मचारीलाई, ३३ हजार ७ सय कित्ता म्युचुअल फण्डलाई र बाँकी ६ लाख २९ हजार ९ सय ३० कित्ता सर्वसाधारणका लागि छुट्याईएको छ । आशा लघु वित्त कम्पनीलाई प्रभु ग्रुपले प्रवद्र्धन गरिरहेको छ ।
अमेरिकी डलर ओसार्ने विदेशी पक्राउ, यात्रुकाे पाकेट मार्ने पाँच भारतीय महिना थुनामा
काठमाडौँ । प्रहरीले अवैध रुपमा लैजान लागेको १९ हजार ७०० अमेरिकी डलरसहित इजरायली नागरिकलाई विहीबार पक्राउ गरेको छ । त्रिभुवन अन्तर्राष्ट्रिय विमानस्थलको अन्तर्राष्ट्रिय उडानतर्फ प्रस्थान गर्ने स्थानबाट इजरायली नागरिक तासी छकी बेन मोहा बेनलाई उक्त परिमाणको अवैध डलरसहित पक्राउ गरिएको हो । काठमाडौँबाट थाइल्याण्ड जान लागेका उनलाई जाँच गर्दा अवैध रुपमा डलर लैजान लागेको अवस्थामा पक्राउ गरेको प्रहरीले जनाएको छ । पक्राउ परेकालाई इजरायली नागरिकलाई आवश्यक कारबाहीका लागि राजश्व विभाग हरिहरभवन ललितपुर पठाइएको छ । उनीकाे साथमा रहेकाे करिब २० हजार अमेरिकी डलर प्रहरीले जफत गरेकाे छ । विहीबार नै महानगरीय प्रहरी वृत्त महाराजगञ्जले सार्वजनिक सवारी साधनमा पाकेटमारी गर्ने पाँच भारतीय महिलालाई पक्राउ गरेको छ । वृत्तको टोलीले बसुन्धराबाट नारायणगोपाल चोक जाँदै गरेको कान्तिपुर बसमा पाकेटमारी गर्ने भारत गोरखपुरका प्रिति चमार, नितु चमार, पुजा चमार, पिङ्की चमार र सोनी चमारलाई आज दिउँसो पक्राउ गरेको हो वृत्तका प्रमुख एवं प्रहरी नायव उपरीक्षक फणिन्द्र प्रसाईंले सुस्मिता कुँवरको रु ५२ हजार पाकेटरमारी गरेर बसबाट ओर्लर्न लाग्दा पक्राउ गरीएको बताए । “सार्वजनिक सवारीमा धकेलाधकेल गरी पैसा चोरेको अनुसन्धानमा खुलेको छ”,उनले भने । पक्राउ परेकालाई चोरी तथा डाँकासम्बन्धी कसुर मुद्दामा मुद्दा दर्ता गरी कारवाही अघि बढाइने वृत्तले जनाएको छ ।
सुनको माग चार प्रतिशत वृद्धि, बढ्यो कारोबार
बेइजिङ, चीन । विश्वव्यापीरूपमा सुनको माग बढ्दो अवस्थामा रहेको वल्र्ड गोल्ड काउन्सिल (डब्लुजीसी) ले बिहीबार सार्वजनिक एक प्रतिवेदनमा जनाइएको छ । केन्द्रीय बैंकले दशकौँदेखि बढी मात्रामा सुन खरिद र सुनमा लगानी तीब्र पारेको कारणले सुनको मागमा वृद्धि देखिएको हो । सन् २०१७ मा सुनको विश्वभर जम्मा चार हजार ३४५ टन माग रहेकोमा सन् २०१८ मा यसमा चार प्रतिशतको वृद्धि देखिएको डब्लुजीसीले रिपोर्टमा उल्लेख गरेको छ । हरेक मुलुकको केन्द्रीय बैंकद्वारा हुने सुनको खरिदमा अघिल्ला बर्षको तुलनामा सन् २०१८ मा ७४ प्रतिशतले वृद्धि भई जम्मा ६५१.५ टन पुगेको छ । यो आर्थिक बर्षमा सुनको कारोबारमा अहिलेसम्मकै दोस्रो धेरै खरिदविक्री भएको प्रतिवेदनमा उल्लेख छ । गत बर्षमा गहनाका लागि दुई हजार २०० टन सुनको माग रहेको थियो यो अघिल्लो बर्षको तुलनामा सामान्य वृद्धि हो । सुनको सिक्का र बारहरूको लागि सुनको मागमा पनि चार प्रतिशतको वृद्धि आई गत बर्ष जम्मा एक हजार ९० टन पुगेको छ । सुनमा आधारित विनिमय व्यापार कोष तथा अन्य उत्पादनमा भने सुनको मागमा भने अघिल्लो बर्षको तुलनामा सन् २०१८ मा ६७ प्रतिशतले कमी आउँदा यस शीर्षकका लागि जम्मा ६८.९ टन माग देखिएको छ । गत बर्ष प्रविधि क्षेत्रमा ३३४.६ टन सुनको प्रयोग भएको छ, जुन अघिल्लो बर्षको तुलनामा जम्मा एक प्रतिशत बढी हो । स्मार्ट फोनको विक्रीमा देखिएको मन्दीका कारण प्रविधि क्षेत्रमा सुनको प्रयोगमा कमी आएको डब्लुजीसीले उल्लेख गरेको छ । , रासस÷सिन्ह्वा
नूबियाले स्मार्टफोनको मूल्य घटायो, अब कतिमा पाइन्छ ?
काठमाडौँ । नूबियाले नेपाली बजारमा लोकप्रिय मोबाइल फोनहरुको मूल्य घटाएको छ । नूबिया फोनको नेपालका लागि आधिकारिक बितरक आइटिपी नेपाल प्रालिले चार मोडलहरु जेड १७ मिनी, जेड १७ लाइट, जेड १७ मिनी एस र भी १८ स्मार्टफोनको अधिकतम बजार मूल्य घटाएको हो । कम्पनीले जेड १७ मिनी स्मार्टफोनको मूल्य घटाउँदै रु.२३,०००/– कायम गरेको छ । यसअघि जेड १७ मिनीको पुरानो मूल्य रु.२४,५९०/– रहेको थियो । जेड १७ लाइटको मूल्यमा पनि रु.२,०००/– घटाउँदै नयाँ मूल्य रु.२६,५००/– कायम गरेको छ । नूबिया जेड १७ मिनी एसको नयाँ मूल्य रु. २८,०००/– रहेको छ । यसअघि यो स्मार्टफोनको पुरानो बजार मूल्य रु.२९,५००/– रहेको थियो । त्यसैगरी नूबिया भी १८ स्मार्टफोनको मूल्यमा रु.२,५००/– घटाएर नयाँ बजार मूल्य रु. २५,०००/– कायम गरेको छ । नूबियाका स्मार्टफोनहरुमा घटेको बजार मूल्यमा नै यी फोनहरु नेपालभर उपलब्ध रहेको आइटीपी नेपाल प्रालिले जनाएको छ । जेड १७ लाइट र जेड १७ मिनी एस स्मार्टफोनमा कम्पनीले स्न्यापड्रागन ६५३ प्रोसेसर राखेको छ भने यसमा ६जीबी र्याम तथा ६४ जीबीको स्टोरेज रहेको छ । ड्यूल रियर क्यामरा भएका स्मार्टफोनहरुमा ३२०० एमएएचको ब्याट्री ब्याकअप तथा फिंगरप्रिन्ट सेन्सर पनि रहेको छ । ६ जीबी र्याम भएका यी स्मार्टफोनहरु नेपाली बजारमा सबैभन्दा सस्तो मूल्यमा उपलब्ध हुने कम्पनीले जनाएको छ ।
सांग्रिला बैंकका ग्राहकलाई ग्राण्डीमा विशेष छुट
काठमाडौँ । सांग्रिला डेभलपमेन्ट बैंक र ग्राण्डी इन्टरनेशनल हस्पिटलबीच बैंकका कर्मचारी तथा ग्राकहहरुलाई उपचार शुल्कमा सहुलियत प्रदान गर्ने सम्बन्धी सम्झौता भएको छ । सम्झौता पत्रमा बैंकको तर्फबाट कर्जा तथा मार्केटिङ्ग विभाग प्रमुख निर्मल कुमार श्रेष्ठ र हस्पिटलको तर्फबाट मार्केटिङ्ग तथा व्यापार विकास विभागका उज्वल रेग्मीले हस्ताक्षर गरेका छन् । सम्झौता अनुसार अब सांग्रिला डेभलपमेन्ट बैंकका कर्मचारी तथा यस विकास बैंकको हाल संचालनमा रहेका ८० वटै शाखाका भिसा डेविट कार्ड प्रयोगकर्ता गा्रहकहरुले बैंकको ग्राण्डी हस्पिटल प्रालिले प्रदान गर्ने स्वास्थ्य सेवाहरुमा विशेष छुट पाउने छन् । यसरी बैंकले आफ्ना ग्राकहरुलाई बैंकिङ सेवाको अतिरिक्त ग्राण्डी हस्पिटलले प्रदान गर्ने स्वास्थ्य सम्बन्धी विभिन्न उपचारहरुमा पनि विशेष छुट दिलाई सहयोग गर्न लागेको बैकका प्रमुुख कार्यकारी अधिकृत सुयोग श्रेष्ठले बताए ।
एनसेलले ल्यायो ‘भ्यालेन्टाइन अफर’, सुबिधा यसरी लिन सकिन्छ
काठमाडौँ । एनसेलका ग्राहकले यस भ्यालेन्टाइन सिजनमा आफ्ना प्रियजनसँग सुलभ दरमा असीमित कुराकानीको मजा लिन सक्ने भएका छन् । नजिकिदै गरेको प्रणय दिवसको अवसरमा एनसेलले आफ्ना ग्राहकका लागी भ्यालेन्टाइन अफर ल्याएको छ, जसअन्तर्गत ग्राहकले आफुले छानेको एउटा विषेश एनसेल नम्बरमा मात्र ५० पैसा(कर सहित ६४ पैसा) प्रति मिनेटका दरले कुरा गर्न सक्नेछन् । यो भ्यालेनटाइन अफर यहि शुक्रबारबाट लागु हुनेछ । अफर अन्तर्गत एनसेलका प्रिपेड तथा पोस्टपेड ग्राहकले एउटा एनसेल नम्बरलाई आफ्नो नम्बरसँग बिना कुनै शुल्क पेयर गरी मात्र ५० पैसा (कर बाहेक) प्रति मिनेटमा फेब्रुअरी महिना(माघ १८ देखि फागुन १६ गते) भर कुरा गर्न सक्नेछन् । यसका साथै यो सेवा सुचारु गर्ने ग्राहकले १०० वटा एसएमएस निःशुल्क पाउने छन् । यसरी प्राप्त निःशुल्क एसएमएस पेयर गरीएको नम्बरमा सन्देशहरु पठाउन प्रयोग गर्न सकिने कम्पनीले जनाएको छ । ग्राहकले एस्ट्रिक्स् १७१०६ एस्ट्रिक्स् पेयर गरिने मोबाइल नम्बर ह्यास डायल गरी यो सेवा सुचारु गर्न सक्नेछन् । ग्राहकहरुले सिधै १७१०६ डायल गरेर पनि अफर सुचारु गरी आफुले चाहेको एनसेल नम्बर पेयर गर्न सक्नेछन् । साथै उनीहरुले एनसेल एपबाट पनि यो सेवा सहजै सुचारु गर्न सक्छन् । भ्यालेन्टाइन अफरले ग्राहकलाई सुलभ दरमा आफ्ना प्रियजनसँग सम्पर्कमा रहि रहन मद्दत गर्ने विश्वास एनसेलले लिएको छ ।
एक नम्बरको प्रतिष्पर्धामा पाँच बाणिज्य बैंक, स्थापितलाई टक्कर दिँदै एनआईसी एसिया र ग्लोबल
काठमाडौं । चालु आर्थिक बर्षको ६ महिनाको अपरिस्कृत वित्तिय विवरण सार्वजनिक हुँदा पाँच वटा बैंक एक नम्बरका लागि कडा प्रतिष्ष्पर्धा गरिरहेका छन् । निक्षेप, कर्जा लगानी र खुद ब्याज आम्दानी जस्ता आधारभुत गणनामा पाँच बैंकबीच कडा टक्कर रहेको देखिन्छ । नविल बैंक, नेपाल इन्भेष्टमेन्ट बैंक, एभरेष्ट बैंक, ग्लोबल आइएमई र एनआईसी एसिया बैंकले खरो प्रतिष्पर्धामा देखिएका हुन् । नविल र नेपाल इन्भेष्टमेन्ट र एभरेष्ट बैंकबीचको प्रतिष्पर्धामा नयाँ खेलाडीका रुपमा एनआइसी एसिया र ग्लोबल आइएमई थपिएका छन् । नाफामा केहि पछि परेपनि निक्षेप र कर्जा लगानीमा एनआइसी एसिया बैंकले सबै बैंकलाई उछिनेको छ । एनआइसी एसिया बैंकले १ खर्ब ६३ अर्ब निक्षेप संकलन गरेर १ खर्ब ४९ अर्ब कर्जा लगानी गरेको छ। जबकी नविल बैंकको निक्षेप १ खर्ब ४३ अर्ब र कर्ज लगानी १ खर्ब ३० अर्ब मात्रै रहेको छ । नेपाल इन्भेष्टमेन्ट बैंकको निक्षेप १ खर्ब ४१ अर्ब छ भने कर्जा लगानी जम्मा १ खर्ब २७ अर्ब कर्जा लगानी गरेको छ । एभरेष्ट बैंकले १ खर्ब २० अर्ब निक्षेप संकलन गरेर १ खर्ब ५ अर्ब कर्जा लगानी गरेकोे देखिन्छ । ग्लोबल आइएमई बैंकले पनि आफुलाई शिर्ष बैंकको दौडमा अब्बल बनाउँदै लगेको छ । ग्लोबलको निक्षेप १ खर्ब ११ अर्ब निक्षेप संकलन गरेर १ खर्ब २ अर्ब कर्जा लगानी गरेको छ । खुद ब्याज आम्दानीमा भने अझैसम्म नविल बैंक नै अगाडी रहेको छ । नविलले ३ अर्ब ६१ करोड खुद ब्याज आम्दानी गरेको छ भने एनआइसी एसियाको ३ अर्ब ६० करोड रहेको छ । नेपाल इन्भेष्टमेन्ट बैंकले भने ३ अर्ब ३१ करोड खुद ब्याज आम्दानी गरेको छ । एभरेष्ट बैंकले २ अर्ब ६७ करोड खुद ब्याज आम्दानी गर्दा पाँचौं नम्बरमा भने हिमालयन बैंक आईपुगेको छ । हिमालयनको खुद ब्याज आम्दानी २ अर्ब ४९ करोड पुगेको छ । २ अर्ब ३८ करोड खुद ब्याज आम्दानीका आधारमा ग्लोबल आइएमइ बैंक छैठो स्थानमा देखिन्छ । नफाका आधारमा पनि नविल बैंक नै एक नम्बरमा रहेको छ । नविलले २ अर्ब ४ करोड खुद नाफा गरेको छ भने नेपाल इन्भेष्टमेन्ट बैंकले १ अर्ब ७२ करोड नाफा गरेको छ । एनआइसी एसियाको नाफा १ अर्ब २६ करोड रहेको छ भने चौथो नम्बरमा हिमालयन बैंक आईपुगेको छ । हिमालयनको नाफा १ अर्ब १६ करोड पुगेको छ । पाँचौं नम्बरमा ग्लोबल आइमएइ बैंकले १ अर्ब १२ करोड नाफा गरेको देखिन्छ । नाफाका आधारमा छैठौं नम्बरमा प्रभु बैंक परेको छ, प्रभुले १ अर्ब ८ करोड नाफा गरेको छ । एभरेष्ट बैंक भने सातौं नम्बरमा पुगेको छ । एभरेष्टले चालु आवको ६ महिनामा १ अर्ब ४ करोड मात्रै नाफा गरेको देखिन्छ । नाफाका हिसाबले सानिमा बैंक पनि टप ८ मा आईपुगेको छ । सानिमाले ६ महिनामा ९४ करोड खुद नाफा गरेको देखिन्छ । उत्कृष्ठ रहँदै आएका स्थापित बैंकहरुलाई यसपालीदेखि एनआइसी एसिया र ग्लोबल आइएमइ बैंकले कडा टक्कर दिएका छन् । नाफाको मुल आधारका रुपमा रहेको निक्षेप संकलन र कर्जा लगानीका हिसाबले एनआइसी एसिया बैंकले अन्य बैंकहरुलाई पछि धकेलिसकेको छ । खराब कर्जाको मात्रालाई राम्रो व्यवस्थापन गर्न सके एनआइसी एसिया बैंकले अन्य बैंकलाई राम्रै चुनौती दिने देखिन्छ । ग्लोबल आइएमई बैंक, हिमालयन बैंकले पनि आफुलाई अब्बल बनाउँदै लगेका छन् ।
पुनर्निर्माणकाे जिम्मेवारी ३२ जिल्लाका स्थानीय तहलाई हस्तान्तरण
काठमाडौं । राष्ट्रिय पुननिर्माण प्राधिकरणले भूकम्प प्रभावित ३२ जिल्लाका स्थानीय तहहरुलाई पुननिर्माणको कार्य जिम्मेवारी, साधन स्रोत र अधिकार हस्तान्तरण गरेको छ । संघीय संसद् अन्तर्गतको राष्ट्रिय सभाको राष्ट्रिय सरोकार तथा समन्वय समितिको बैठकमा राष्ट्रिय पुन निर्माण प्राधिकरणका प्रमुख कार्यकारी अधिकृत सुशील ज्ञवालीले पुन निर्माणका कार्यलाई गति दिन, स्थानीय तहहरुमा स्वामित्व बढाउन, संस्थागत दिगोपना बढाउन र संघीयताको कार्यन्वयनका लागि प्राधिकरणले स्थानीय तहरुलाई अधिकार हस्तान्तरण गरेको जानकारी दिएका छन् । भूकम्प प्रभावित जिल्लाहरुमा २ सय ८४ स्थानीय तह छन् । प्राधिकरणले अभियानका रुपमा स्थानीय तहहरुसँग ११ बुँदे समझदारी गरी अधिकार हस्तान्तरण गरेको थियो । संघ, प्रदेश र स्थानीय तहका जनप्रतिनिधिहरु सहित जिल्ला पुनर्निर्माण समितिहरुलाई सकृय पारेको जानकारी दिँदै प्रमुख कार्यकारी अधिकृत ज्ञवालीले यसबाट संघ, प्रदेश र स्थानीय तहबीच समन्वय भई पुन निर्माण अझ प्रभावकारी हुने विश्वास व्यक्त गरे । समितिमा प्राधिकरणका प्रमुख कार्यकारी अधिकृत ज्ञवालीले निजी आवास, शैक्षिक संस्था, सरकारी भवन, सुरक्षा निकायका भवन, साँस्कृतिक सम्पदा लगायतको पुननिर्माणमा हालसम्म भएको प्रगति र आगामी कार्ययोजनाबारे जानकारी गराएका थिए । बैठकमा सांसदहरुले सम्पदाहरुको पुनर्निर्माण, विदेशमा भएका लाभग्राही, पुनर्निर्माणमा संघ, प्रदेश र स्थानीय तहबीच समन्वय, लाभग्राहीले ठाउँ परिवर्तन गर्न पाउनेरनपाउने, सहुलियत ऋण, तेस्रो किस्ता लिने लाभग्राही, वैदेशिक सहयोग, गैरसरकारी संस्थाहरुको परिचालन, प्राधिकरणलाई आईपरेका चुनौतीहरु लगायतबारे जिज्ञासा राखेका थिए । प्रमुख कार्यकारी अधिकृत ज्ञवालीले सांसदहरुका जिज्ञासाको उत्तर दिँदै लक्ष्य स्पष्ट गरी काम गरेकाले पूर्व निर्धारित समयमा नै पुन निर्माण सम्पन्न हुने बताए । बजेट व्यवस्थापन चूनौतीपूर्ण रहेको भन्दै प्राधिकरण अन्तर्गतका कर्मचारीहरुलाई समायोजन प्रकृयामा समावेश गरिए त्यसले पनि पुन निर्माणमा असर पार्न सक्ने धारणा व्यक्त गरेका थिए । समितिले निजी आवास, शैक्षिक संस्था, सम्पदा, स्वास्थ्य संस्था, एकीकृत बस्ती लगायतलाई प्राथमिकताका आधारमा पुन निर्माण गर्न निर्देशन दिएको छ । यस्तै समितिले सम्पदाहरुको पुन निर्माण गर्दा समय, गुणस्तर र ऐतिहासिकता महत्वलाई ध्यान दिन, तीन तहका संरचनाहरुबीच समन्वय गर्न, पुननिर्माण सम्बन्धी स्थानीय तहसम्म रहेका सबै संरचनाहरुलाई अझ बढी कृयाशील बनाउन लगायतका निर्देशनहरु दिएको छ ।
