विकासन्युज

गजलकार पाण्डेको ‘संशयात्मक सपना’ विमोचन

काठमाडाैं । गजलकार गोकुल पाण्डे (निश्चल)को ‘संशयात्मक सपना’ गजल संग्रह शनिबार विमोचन भएको छ । युवा गजलकार पाण्डेद्वारा लिखित पहिलो गलज संग्रह ‘संशयात्मक सपना’ शनिबार काठमाडौंमा विमोचन गरिएको हो । वरिष्ठ साहित्यकार विजय चालिसेले ‘संशयात्मक सपना’ को विमोचन गरेका हुन् । उनको कृतिमा ६० भन्दा बढी गजलहरु प्रकाशित छन् । नुवाकोटको बेल्कोटमा जन्मिएका पाण्डे सानैदेखि साहित्यमा अगाडी थिए । हाल उनी शिक्षण पेशामा आवद्ध छन् ।  उनले आफ्नो कृतिमा नेपाली राजनीति, शैक्षिक, सामाजिक तथा समसामयिक विषयवस्तुहरु समावेश गरेका छन् । कार्यक्रममा साहित्यकार चालिसेले साहित्यले बालबालिका तथा युवाहरुमा सिर्जनात्मक क्षमता बढाउने बताए । उनले पछिल्लो समय युवाहरुमा साहित्यप्रति रुचि बढ्न थालेको समेत  बताए ।  गजलकार पाण्डेले आगामी दिनमा पनि नेपाली साहित्य क्षेत्रमा क्रियाशिल भएर लाग्ने बताए ।

घोराहीमा लेखा तथा कर नीतिसम्बन्धी अभिमुखीकरण कार्यक्रम सम्पन्न

काठमाडाैं । सनराइज बैंक लिमिटेडको आयोजना तथा महिला चेम्बर अफ कमर्स घाेराहीकाे समन्वयमा शनिबार आधारभुत लेखा तथा कर नीति सम्बन्धी अभिमुखीकरण कार्यक्रम सम्पन्न भएको छ । कार्यक्रमको उद्घाटन कार्यक्रमकी प्रमुख अतिथि महिला चेम्बरकी सचिव लिमा अधिकारीले गरेकी थिईन् । घोराही चेम्बर अफ कमर्शका अध्यक्ष मञ्जु वज्राचार्यको अध्यक्षतामा आयोजित उक्त कार्यक्रम नेपाल महिला चेम्बर अफ कमर्शकी केन्द्रिय सचिव लिमा अधिकारीको प्रमुख आतिथ्यता तथा सनराइज बैँकको मुख्य कार्यालय काठमान्डौका चार्टर एकाउन्टेन्ट अभिषेक श्रेष्ठको विशिष्ट आतिथ्यतामा सम्पन्न भएको हो । कार्यक्रमको उद्घाटन पश्चात सहभागीहरुलाई सम्बोधन गर्दै  महिला चेम्बरले व्यवसाय मैत्री वातावारणलाई प्राथमिकता राख्दै महिला सशक्तिकरण माथि जोड दिदै आएको बताईन् । कार्यक्रम माझ घोराही चेम्बरका उपाध्यक्ष दुर्लभ केसीले स्वागत मन्तव्य राख्दै अभिमुखीकरण तालिमको खाँचो औंल्याएका थिए । महिला चेम्बर सम्बद्ध उद्यमी व्यवसायीहरुलाई  प्रशिक्षण तथा अभिमुखीकरण तालिम उपलब्ध गराउने सम्बन्धमा नेपाल महिला चेम्बरका केन्द्रिय अध्यक्ष उर्मिला श्रेष्ठ र सनराइज बैंकका प्रमुख कार्यकारी अधिकृत जनक शर्मा पौड्यालले यस अघि एक सम्झौतापत्रमा हस्ताक्षर गरी आपसी सहकार्यका लागि हातेमालो गर्ने प्रतिबद्धता ब्यक्त गरेका थिए । झन्डै २ सय ३० व्यवसायीहरूकाे सहभागीता रहेको उक्त कार्यक्रममा बोल्ने वक्ताहरुले घोराही चेम्बरले नव आगन्तुक र व्यवसाय गरिरहेका व्यवसायीहरूलाइ लक्षित गरि महत्वपूर्ण कार्यक्रम गरेको भन्दै चर्चा गरे । कार्यक्रमको सञ्चालन घोराही चेम्बरका सचिव रजिव उल्लाह खाँले गरेका थिए । सो अवसरमा दाङ चेम्बर अफ कमर्शका अध्यक्ष श्रीधर महरा, नेपाल पत्रकार महासंघ दाङका अध्यक्ष सविन प्रीयासन लगायतले शुभकामना मन्तव्य राखेका थिए भने समापन कार्यक्रमको सञ्चालन महासचिव विमल श्रेष्ठले गरेका थिए । आधारभुत लेखा तथा कर नीति बारेको सो अभिमुखीकरण कार्यक्रमका सहभागीहरुलाई चार्टर एकाउन्टेन्ट श्रेष्ठले व्यापार व्यवसाय संचालन गर्दा ध्यान दिनुपर्ने कुरा, कम्पनी दर्ता,, लेखा, कर नीति लगायतका विषयमा प्रशिक्षण दिएका थिए । गत भदौमा नेपाल महिला चेम्बर र सनराइज बैंकबीच भएको  व्यापार साझेदारी सम्झौता अनुरुप बैंकले आधारभुत लेखा तथा कर नीति सम्बधी तालिम उपलब्ध गराएको हो । कार्यक्रममा सनराइज बैँक तुलसीपुर शाखाका प्रवन्धक प्रविण अधिकारी, चेम्वर सम्बद्ध ब्यवसायी तथा अन्य उद्यमी ब्यवसायीहरुको उलेख्य सहभागिता रहेको थियो ।सोही अवसर माझ घोराही उपमहानगर चेम्वर अफ कमर्श मातहत घोराही महिला चेम्वर अफ कमर्श गठन गरिएको छ । महिला उद्यमी ब्यवसायीहरुको भेलाले सुमिता गिरीको अध्यक्षतामा ९ सदस्यीय समिति गठन गरेको हो ।

राष्ट्र बैंकमा सकसः ६ माघसम्म डेपुटी गभर्नर नियुक्त नगरे श्रेष्ठलाई सफाइ दिने वा खाली राख्ने मात्रै विकल्प

काठमाडौं । नेपाल राष्ट्र बैंकमा डेपुटी गभर्नर नियुक्तिको विषय पेचिलो बन्दै गएको छ । डेपुटी गभर्नर शिवराज श्रेष्ठले पदीय आचरण अनुसार काम नगरेको अभियोगमा बर्खास्ती प्रक्रिया अघि बढेसँगै नयाँ डेपुटी गभर्नर कसलाई बनाउने भन्ने विकल्प ज्यादै कम देखिएको छ । सरकारले डेपुटी गभर्नर शिवराज श्रेष्ठमाथि विभिन्न आरोप लगाउँदै छानविन समिति बनाएको थियो । राष्ट्र बैंक संचालक समिति सदस्य प्राडा श्रीराम पौडेलको संयोजकत्वमा गठिन समितिले श्रेष्ठलाई दोषी ठहर गर्दै कारबाहीको लागि सिफारिस गरेको थियो । पौडेल समितिले गरेको सिफारिस अहिले प्रधानमन्त्री तथा मन्त्रिपरिषद कार्यालयमा विचाराधीन छ । समितिको सिफारिस अनुसार सरकारले कारबाही गरेमा श्रेष्ठ पदमुक्त हुनेछन् । यस्तो अवस्थामा अर्काे डेपुटी गभर्नर नियुक्ति गर्नुपर्ने हुन्छ । श्रेष्ठको स्थानमा नियुक्त हुने डेपुटी गभर्नरले बाँकी कार्यकाल अर्थात अबको करिब १३ महिना कार्यकाल सम्हाल्ने छन् । राष्ट्र बैंक ऐनको व्यवस्थाअनुसार एक कार्यकाल डेपुटी गभर्नर भइसकेको व्यक्ति फेरि सोही पदमा नियुक्तिको लागि योग्य हुदैन । त्यसैकारण अहिले डेपुटी गभर्नर बनेका व्यक्तिले करिब १३ महिना मात्रै डेपुटी गभर्नर बन्न पाउने छन् । राष्ट्र बैंक ऐनले कार्यकारी निर्देशकबाट डेपुटी गभर्नर बनाउने परिकल्पना गरेको छ । तर, अहिले राष्ट्र बैंकमा कार्यरत कार्यकारी निर्देशक लक्ष्मीप्रपन्न निरौला र महेश्वरलाल श्रेष्ठ आगामी ६ माघदेखि अनिवार्य अवकाश पाउँदैछन् । अवकाश पाउने एक महिना अघि अनिवार्य विदा बस्ने प्रचलनका कारण निरौला र श्रेष्ठ दुबै जना विदामा छन् । यसमध्ये श्रेष्ठ प्रमुख प्रतिपक्षी दल नेपाली काँग्रेस निकट मानिन्छ । निरौला भने सत्तारुढ नेकपा निकट कर्मचारी हुन् । त्यसैकारण अहिले विदामा बसेका कार्यकारी निर्देशकबाट डेपुटी गभर्नर बनाउँदा निरौला एकमात्र प्रत्यासी जस्तै हुन् । तर, निरौलाई डेपुटी गभर्नर बनाउन सरकारले ६ माघअघि नै नियुक्त गरिसक्नुपर्छ । सो समयमभित्रमा नियुक्ति भएन भने वरिष्ठतम छान्दा कार्यकारी निर्देशक भुवन कँडेलको पालो आउनेछ । डेपुटी गभर्नर बन्न योग्य अर्का कार्यकारी निर्देशक सुनिल उदासले पनि फागुनदेखि अनिवार्य अवकाश पाउँदै छन् । उदास पनि काँग्रेस निकट मानिन्छन् । तर, कडेलले अझै ५ वर्षभन्दा बढी समय कार्यकारी निर्देशकको रुपमा काम गर्न पाउने भएकोले आफूलाई डेपुटी गभर्नर नबनाइदिन शक्ति केन्द्र धाउदै छन् । गभर्नर डा. चिरन्जीबी नेपाल र डेपुटी गभर्नर चिन्तामणि शिवाकोटीलाई पटक पटक भेटेर आफूलाई डेपुटी गभर्नरमा सिफारिस नगरिदिन कँडेलले अनुरोध गर्दै आएका स्रोतले वतायो । ‘पहिला मलाई डेपुटी गभर्नर बनाइदिनु पर्यो भन्दै कार्यकारी निर्देशकहरु जसरी शक्तिकेन्द्र धाउने गर्नुहुन्थ्यो, अहिले त्यसरी नै मलाई सिफारिस नगरिदिनुस् भन्दै शक्तिकेन्द्र धाउन थाल्नुभएको छ, केही कार्यकारी निर्देशक त आफूलाई डेपुटी गभर्नर नियुक्त गरिए पनि सरकारी नियुक्ति लिन्न बाध्य हुनुपर्दैन भनेर नियुक्ति नलिने सोँचमा पनि हुनुहुन्छ,’ स्रोतले भन्यो । किन चाहदैनन् डेपुटी बन्न ? राष्ट्र बैंक ऐनका अनुसार डेपुटी गभर्नरमा नियुक्त भएकै दिनदेखि राष्ट्र बैंकको कर्मचारीबाट स्वतः अवकाश पाएको मानिन्छ । राष्ट्र बैंकको कर्मचारीमा १८ वर्ष काम गरेपछि मात्रै पेन्सन पाइन्छ । तर, अहिलेका अधिकांश कार्यकारी निर्देशकको जागिरे अवधि १८ वर्ष पुगेको छैन । त्यसैले उनीहरुमध्ये कसैलाई पनि डेपुटी गभर्नर नियुक्त गरिए उनीहरुले पेन्सन पाउने छैनन् । जीवनभर जागिर गरेको संस्थाबाट पेन्सन नपाउने गरी अवकाश हुन कुनै पनि कार्यकारी निर्देशक तयार छैनन् । त्यसैकारण उनीहरु डेपुटी गभर्नर नबनाइदिनको लागि शक्तिकेन्द्रको शरणमा पुगेका हुन् । राष्ट्र बैंकमा १८ वर्ष काम गरेर अवकाश पाएको कार्यालय सहयोग तथा सवारी चालकले मात्रै पनि मासिक ५० हजार रुपैयाँको हाराहारीमा पेन्सन पाउँछन् । यसअघि तत्कालीन कार्यकारी निर्देशक बीरविक्रम रायामाझीलाई डेपुटी गभर्नर बनाउँदा पनि यस्तै भएको थियो । उनको जागिर अवधि १७ वर्षमात्रै भएको थियो । यस्तो परिस्थितिमा नै रायामाझी डेपुटी गभर्नर बनेका थिए । उनले पेन्सन नपाउने भएपछि राष्ट्र बैंक संचालक समितिले विशेष निर्णय गरेर उनले पेन्सन पाउने निर्णय गरेको थियो । तर, सो विषय अख्तियारमा उजुरी परेपछि रायामाझीले लिएको पेन्सन नै फिर्ता गर्नुपरेको थियो । रायामाझीले अहिले राष्ट्र बैंकबाट पेन्सन पाउँदैनन् ।

४० वर्षदेखि सरकारी जग्गा अतिक्रमण गरी बनाइएका घरटहरा भत्काइयो

वीरगञ्ज । उपमहानगरपालिका–१० मटिअर्वाका दुई दर्जन घरटहरा प्रहरीले भत्काइदिएको छ । विगत करिब ४० वर्षदेखि सरकारी जग्गा अतिक्रमण गरी सो स्थानमा घरटहरा बनाइएको थियो । सशस्त्र प्रहरी बल बोर्डर आउटपोष्ट मटिअर्वाका सशस्त्र प्रहरी निरीक्षक लक्ष्मण जोशी र स्थानीय जनप्रतिनिधिको संयुक्त टोलीले छोटी भन्सार कार्यालय तथा दशगजा क्षेत्रका करिब डेढ कठ्ठा जग्गा अतिक्रमण गरी बनाइको संरचना भत्काएका हुन् । वडा नं १० का वडाध्यक्ष शङ्करप्रसाद गुप्ताले उनीहरुलाई बारम्बार जग्गा खाली गर्न अनुरोध गर्दा नमानेकाले प्रहरीले घरटहरा भत्काएको जानकारी दिए । फुसको छाप्रोमा रहेका पुराना भन्सार कार्यालय नजिकैको नयाँ भवनमा सरेपछि उक्त खाली जग्गा स्थानीयवासीले अतिक्रमण गरी व्यापार गर्दै आएका थिए । रासस

 झापामा भारतीय ट्रकले ठक्कर दिँदा दुईको मृत्यु, तीन घाइते

दमक । पूर्वपश्चिम राजमार्गअन्तर्गत झापाको दमकमा गए राति भएको सवारी दुर्घटनामा परी दुई जनाको मृत्यु भएको छ । तीन घाइते भएका छन् । दमक–९ स्थित क्याम्पसमोडमा पूर्वबाट पश्चिमतर्फ जाँदै गरेको मे१ह ४९१९ नंको अटोरिक्सालाई विपरीत दिशाबाट आइरहेको भारतीय नम्बरको बीआर०७जीएच७८ को ट्रकले ठक्कर दिँदा अटोरिक्साका चालकसहित दुईको घटनास्थलमै मृत्यु भएको छ । दुर्घटनामा परी मृत्यु हुनेमा दमक नगरपालिका–९ का अटोरिक्सा चालक हरिबहादुर भुजेल र अर्का मृतकको पहिचान खुल्न सकेको छैन । दुर्घटनामा अटोरिक्सामा सवार तीनै जना घाइतेको स्थानीय लाइफलाइन अस्पतालमा उपचार भइरहेको इलाका प्रहरी कार्यालय दमकका प्रहरी नायब उपरीक्षक विजयराज पण्डितले जानकारी दिएका छन् । दुर्घटनामा संलग्न ट्रकसहित चालकलाई नियन्त्रणमा लिएको उनले जानकारी दिए ।

उद्योगलाई विद्युत् माग पूरा गर्न नवलपरासीकै हकुईमा १३२ केभीएको सवस्टेशन बनाउँदैछौँ- कार्यकारी निर्देशक घिसिङ

परासी । नेपाल विद्युत् प्राधिकरणका कार्यकारी निर्देशक कुलमान घिसिङले औद्योगिक क्षेत्रको विद्युत् माग पूरा गर्न सवस्टेशन निर्माणलाई जोड दिएको जानकारी दिएका छन् । पश्चिम नवलपरासीस्थित नेपाल विद्युत् प्राधिकरण परासी वितरण केन्द्रको नवनिर्मित कार्यालय भवनको शनिबार उद्घाटन गर्दै उनले परासी–भैरहवा औद्योगिक क्षेत्रमा सवस्टेशन बनाउन लागिएको बताए । पश्चिम नवलपरासीको हकुईमा सवस्टेशन बन्ने जानकारी दिँदै कार्यकारी निर्देशक घिसिङले भने, “परासी–भैरहवा क्षेत्र औद्योगिक क्षेत्रको रूपमा विकास भइरहँदा विद्युतकाे माग बढिरहेको छ, उद्योगलाई विद्युत् माग पूरा गर्न हामीले नवलपरासीकै हकुईमा १३२ केभीएको सवस्टेशन बनाउँदैछौँ, त्यहाँबाट उद्योगलाई पर्याप्त विद्युत् आपूर्ति हुन्छ ।” उक्त क्षेत्रमा उद्योगीले लामो समयदेखि सवस्टेशन बनाउन माग गर्दै आएका थिए । नवलपरासीकै सुनवलमा पनि न्यू बुटवल–गोरखपुर प्रसारण लाइनअन्तर्गत ४०० केभीएको सवस्टेशन बन्ने प्रक्रियामा छ । परासी वितरण केन्द्रको भवन रु ९० लाखमा निर्माण भएको केन्द्र प्रमुख विजय महतोले जानकारी दिए । कार्यकारी निर्देशक घिसिङले शनिबार नै नवलपरासीमा निर्माण हुन लागेको न्यू बुटवल सवस्टेशन, भरतपुर–बर्दघाट ट्रान्समिसन लाइन र होङ्सी सिमेन्ट ट्रान्समिसन लाइनको पनि निरीक्षण गरेका छन् ।

भारी हिमपातका कारण टेलिफोन र बिजुली अवरुद्ध

अमरगढी । भारी हिमपातले जिल्ला सदरमुकामसहित ग्रामीण बस्ती सञ्चार र बिजुलीविहीन बनेको छ । बिहीबारदेखि तापक्रम झर्दो अवस्थाले इन्टरनेटलगायतका सञ्चारसेवासमेत अवरुद्ध भएका छन् । लामो तथा छोटो दूरीका सञ्चालन हुने सवारी साधन चल्ने ग्रामीण सडकसमेत हिमपातलेअवरुद्ध बनाएको उग्रतारा डडेल्धुरा यातायात प्रालि डडेल्धुराले जनाएको छ । दूरसञ्चार कार्यालय डडेल्धुराका शिवराज बोहराले हिमपातले अवरुद्ध सञ्चार सेवालाई सुचारु बनाउन प्रयास भइरहेको जानकारी दिए । नेपाल विद्युत् प्राधिकारण वितरण केन्द्र डडेल्धुराले विद्युतसेवा सुचारु बनाउन प्रयास भइराखेको जनाएको छ । विद्युत् अवरुद्ध हुँदा जिल्लाको गन्याधुरा गाउँपालिका, नवदुर्गा गाउँपालिका, अमरगढी नगरपालिका, परशुराम नगरपालिका, आलिताल र भागेश्वर गाउँपालिका तीन दिनदेखि अन्धकारमय बनेको छ । रासस

ट्राफिक प्रहरीद्वारा सवारी साधन जाँचमा कडाइ, १० लाख बढी राजश्व सङ्कलन

डाेटी । जिल्ला ट्राफिक प्रहरी कार्यालय दिपायलले जिल्लामा एक महिनाको अवधिमा कूल रु १० लाख बढी राजश्व सङ्कलन गरेको छ । पछिल्लो सयम जिल्लामा खटिएको ट्राफिक प्रहरीले सवारी साधन जाँचमा कडाइ गर्न थालेको छ । सवारी जाँचमा कडाइ गर्दा राजश्व सङ्कलनमा वृद्धि तथा दुर्घटनामा कमी आएको जनाइएको छ । उक्त कार्यालयले दिएको जानकारीअनुसार आर्थिक वर्ष विसं २०७४/७५ मा चार हजार २ सय ३६ सवारी चालकलाई कारबाही गरी रु २३ लाख २४ हजार ५०० राजश्व सङ्कलन भएको थियो । आव २०७५/७६ मा चार हजार ४ सय ५४ लाई कारवाही गरी रु २४ लाख ५९ हजार राजश्व सङ्कलन भएको थियो । चालु आवको मङ्सिर महिनासम्ममा कूल एक हजार ६२९ सवारी चालकलाई कारवाही गरिएको जिल्ला ट्राफिक प्रहरी कार्यालय दिपायलका प्रमुख अशोक खड्काले जानकारी दिए । उनले भने, “हाम्रो उद्देश्य भनेको राजश्व सङ्कलन गर्नेभन्दा पनि सवारी दुर्घटना रोक्ने हो, हामी त्यहीअनुसार काम गरिरहेका छौँ ।” आव २०७४/७५ मा सडक दुर्घटनामा परी ३० तथा आव २०७५/७६ मा ११ जनाको मृत्यु भएको थियो । चालु आव २०७६/२०७७ को कात्तिकसम्ममा चार जनाको मृत्यु भएको सो कार्यालयको तथ्याङ्कमा उल्लेख गरिएको छ । त्यस्तै ट्राफिक प्रहरी बस्ने भवन र दरबन्दीअनुसारका ट्राफिक प्रहरी नहुँदा पनि ट्राफिक व्यवस्थापनमा निकै समस्या हुने गरेको कार्यालयले जनाएको छ । जनशक्ति अभाव डोटीमा मात्र नभई सुदूरपश्चिमका सबै जिल्लामा रहेको र क्रमिक रूपमा ट्राफिक प्रहरी सङ्ख्या थपिँदै जाने सुदूरपश्चिम क्षेत्रीय ट्राफिक प्रहरी कार्यालय अत्तरियाका प्रमुख तथा ट्राफिक प्रहरी उपरीक्षक लोकेन्द्र श्रेष्ठले जानकारी दिए । उनले भने, “जनशक्ति अभाव छ, सबै जिल्लाका आफ्ना भवन छैनन्, तर पनि आफूसँग भएको जनशक्ति र स्रोतसाधनलाई पूर्णरूपमा प्रयोग गरेका छौँ, सेवा प्रवाहमा बाधा हुन दिन्नौँ ।” ट्राफिक प्रहरीले जिल्लामा सञ्चालन गरेको ट्राफिक सचेतना अभियानअनुसार सवारी साधनमा सिट क्षमताभन्दा बढी यात्रु बोक्ने, साथमा आवश्यक कागजात नभएका, मोटरसाइकलमा तीन जना सवार गर्ने, मदिरा सेवन गरी सवारी साधन चलाउने, सिट बेल्ट नबाँध्ने, लापरवाही गर्ने, नम्बरप्लेट नभएका तथा बिदाको दिन सरकारी सवारी साधन चलाउनेलाई कारबाही गरिएको ट्राफिक कार्यालय दिपायल डोटीले जनाएको छ । आवश्यकताअनुसार ट्राफिक प्रहरीको सङ्ख्या कमी भए पनि जिल्लाका मुख्य बजार बुडर, बिपीनगर, सानागाँउ, तिलताली, सिलगढी र दिपायल बजारमा परिचालन गरिएको जिल्ला प्रहरी कार्यालय डोटीका प्रमुख तथा प्रहरी उपरीक्षक दिलीपसिंह देउवाले जानकारी दिए । उनले भने, “जनशक्ति अभाव हुँदा पनि जिल्लाका प्रमुख बजारमा ट्राफिक प्रहरी परिचालन गरिएको छ, सडक पुगेका जिल्लाका अन्य ग्रामीण क्षेत्रमा पनि विस्तारै परिचालन गर्ने योजनामा छौँ ।” रासस