काठमाडौं । “क” वर्गको एनएमबि बैंकले राष्ट्रिय स्तरको “ख” वर्गको कञ्चन डेभलपमेन्ट बैंकलाई प्राप्ति गर्ने भएको छ । सो सम्बन्धि दुई संस्थाबीच जेठ २५ गते अन्तिम सम्झौता पत्रमा हस्ताक्षर भएको कम्पनीका सचिव ध्रुव प्रसाद अधिकारीले जनाएका छन् ।
यसअघि दुई कम्पनीबीच माघ १६ गते(आइतबार) पहिलो सम्झौता भएको थियो । अन्तिम सम्झौता पश्चात नेपाल राष्ट्र बैंक र बैंकहरुले पनि साधारण सभा मार्फत पारित गर्नुपर्ने व्यवस्था रहेकाे छ । त्यसपछि दुई कम्पनीबीच एकीकृत कारोबार हुने छ ।
कञ्चनपुर जिल्लाको महेन्द्रनगर स्थित केन्द्रिय कार्यालय रहेको कञ्चन डेभलपमेन्ट बैंकको प्राप्तिले राष्ट्रको प्रादेशिक संरचनामा एनएमबि बैंकको सन्तुलित वित्तीय पहुँचको मार्गचित्र कोर्न नयाँ आयाम थपिएको छ । जसबाट ग्रामीण तथा शहरोन्मुख क्षेत्रमा दिगो वित्तीय सेवा र विकास प्रदान गर्ने उद्देश्य रहेको कम्पनीले जनाएको छ ।
एनएमबि बैंकको बैंकिङ्ग क्षेत्रमा सफल बैंकको रुपमा पहिचान बनाएको तथा लगातार दुई पटक बैंक अफ दि ईयरले सम्मानित भई ग्राहकहरुलाई प्रभावकारी सेवा दिँदै आएको “क” वर्गको बैंक हो । त्यस्तै, कञ्चन डेभलपमेन्ट बैंक हालसम्म सक्षम संस्थाको रुपमा सुदूर पश्चिमका सर्वसाधारणहरुलाई प्रभावकारी सेवा प्रदान गर्दै आएको राष्ट्रिय स्तरको “ख” वर्गको बैंक हो ।
कञ्चन डेभलपमेन्ट बैंक कैलाली, कञ्चनपुर, डंडेलधुरा, बैतडी र डोटी गरि ५ वटा जिल्लामा कार्यक्षेत्र रहेको बैंक हो । यस बैंकको १७ वटा शाखा कार्यालयहरु तथा ३ वटा एक्सटेन्सन काउन्टरहरु संचालनमा छन् ।
एनएमबि बैंकले कञ्चन डेभलपमेन्ट बैंकलाई प्राप्ति गरे पश्चात यस बैंकको सुदूर पश्चिमका प्रदेशमा शाखा संख्या २४ पुग्नेछ भने एक्सटेन्सन काउन्टरको संख्या ४ पुग्नेछ ।
यसबाट बैंकको उक्त प्रदेशमा शाखा सञ्जाल बलियो भई सो क्षेत्रका सर्वसाधारणहरुलाई थप बैंकिङ्ग सेवा प्रदान गर्न सक्षम हुने कम्पनीको विश्वास छ ।
