नेपाल बैंकलाई साढे १५ करोड नोक्सान पुर्याउने ११ जना पक्राउ
काठमाडौं । गैरकानून रुपमा सुन कर्जा लिने र दिने काम गरी करोडौं रुपैयाँ नोक्सान पुर्याउने ११ जनालाई केन्द्रीय अनुसन्धान व्युरोले पक्राउ गरी अनुसन्धान थालेको छ । नेपाल बैंक धरान शाखाबाट गैरकानुनी तवरले सुन कर्जा लिने दिने कार्यगरी बैकलाई १५ करोड ५१ लाख ४३ हजार नोक्सान पुर्याउने ११ जनालाई शुक्रबार २ गते ब्यूरोको टोलीले पक्राउ गरी ईलाका प्रहरी कार्यालय, धरान मार्फत उच्च अदालत विराटनगरबाट ७ दिनको म्याद थपभई बैंकिङ कसुर तथा सजाय ऐन, २०६४ बमोजिम अनुसन्धान भइरहेको जनाएको छ ।
भदौ १३ देखि नाडा अटो सो हुदै, अटोलोन सीमा बढेपछि व्यवसायीमा उत्साह
काठमाडौं । सवारी साधनको खरिदबिक्री सम्बन्धी मेला नाडा अटो शो आउदो सातादेखि राजधानीको भृकुटीमण्डपमा आयोजना हुने भएको छ । नेपाल अटोमोवाइल डिलर्स एसोसियसन (नाडा) ले आयोजना गर्ने मेला भदौ १३ गतेदेखि १८ गतेसम्म ६ दिनसम्म सञ्चालन हुनेछ । विभिन्न ब्राण्डका सवारी साधनको एकै छानामुनी बिक्रीबितरण गर्न मेला आयोजना गर्न लागिएको नाडाले आइतबार राजधानीमा पत्रकार सम्मेलनको आयोजना गरी जानकारी दिएको छ । सर्भोद्वारा प्रायोजित मेलामा चर्चित ब्राण्डका सवारी साधन तथा स्पेयर पार्र्टस, लुब्रिकेन्ट्स, टायर , ग्यारेज उपकरण, ब्याट्री तथा अन्य एसोसेरिज रहनेछ । एशोसिएशनले ब्राण्ड एम्बेसडरका रुपमा चर्चत कलाकार मदनकृष्ण श्रेष्ठ र हरिवंश आचार्यलाई नियुक्त गरेको छ । मेलामा ९० वटा संस्थाहको सहभागितामा करिब १३० वटा ठुला तथा साना स्टलहरु रहनेछन् सो अवसरमा जानकारी दिइयो । मेलामा १६ वटा ब्राण्डका ४ पाङ्ग्रे, १९ वटा ब्राण्डका २ पाङ्ग्रे तथा ६ वटा ब्राण्डका हेभी कमर्शियल सवारीसाधन आर्कषण रहने छन् । नाडाका अध्यक्ष अन्जन श्रेष्ठले विगतका भन्दा यसपाली अझ बढी भव्य र व्यवस्थित हुने दाबी गरेका छन । उनले भने, “विगतका वर्ष हामीले मेला आयोजनामा केहि त्रुटी महसु गरेका थियौं यो पटक. त्यसलाई हामी सकभर सुधार्ने छौं । मेलामा लगभग पचास हजार आगन्तुकले अवलोकन गर्ने आयोजकको अनुमान छ । नाडाले अटो शोबाट उठेको रकम मध्ये पाँच लाख रुपैयाँ बाढीपहिरो पीडितलाई दिने निर्णय गरेको छ ।
युवाहरु विदेश पलायन हुन थालेपछि चिया उत्पादनमा समस्या
पाँचथर । सरकारले कृषिलाई आधुनिकीकरण गर्ने नीति लिएपनि पाँचथरका चिया कृषक भने समस्यामा परेका छन् । राज्यले सहयोग नगर्दा आफूहरुले वर्षौंदेखि समस्या झेल्नु परेको उनीहरुको गुनासो छ । चियाको उत्पादन र गुणस्तरलाई कायम गर्न सके यसको ब्यापार फष्टाउने देखिएको नाम्फुयक चिया सहकारीका सचिव सुवास तुम्वापोले बताए । उनले भने, “श्रमिकको समस्याका कारण चियाखेती भनेजस्तो ढंगले विस्तार र सुधार हुन सकेको छैन ।” लालीखर्कस्थित चिया तथा कफी विकास बोर्डका चिया विस्तार आयोजना प्रमुख प्रेमकुमार थिङका अनुसार चियामा राज्यले विभिन्न आकर्षणसहितका अनुदान, तालीम गोष्ठी गरेपनि स्वयं किसानको आकर्षण घट्नु, वैदेशिक रोजगारीका क्रममा युवा विदेश पलायन हुनुजस्ता कारण पनि चिया क्षेत्रमा ह्रास आइरहेको छ । चिया उत्पादक सहकारी सङ्घ पाँचथरका अध्यक्ष नन्दकुमार आङ्थोपुले चिया प्रशोधनका लागि फ्याक्ट्रीमा दक्ष प्राविधिक नहुनु र चियाको मूल्य निर्धारणमा कृषकको पहुँच नपुग्नाले कृषकले उचित मूल्य पाउँन नसकेको बताए चिया नीति २०५८ नै परिवर्तन गर्नुपर्ने आवश्यकता औल्याउँदै उनले आङ्थोपुले साना किसानले कम्तीमा पनि ३५० रोपनी क्षेत्रफलमा खेती गर्नुपर्नेजस्ता नीतिले साना चिया कृषक मारमा परेका बताए । उता चियाको मूल्य स्थिर नहुँदा र खेती प्रवद्र्धनका लागि राज्यले अनुदान नदिँदा खेती नै परिवर्तन गर्नुपर्ने अवस्था आएको उनको गुनासो छ । फिदिम–५ की फूलकुमारी तुम्वापोले कृषि मजदुरलाई लिङ्गका आधारमा ज्यालामा समेत पुरुषलाई ३०० र महिलालाई १५० मात्र दिएर विभेद गरेको गुनासो गरे । यसैबीच कृषि मजदुर, मूल्य नपाएका किसान, व्यापारीदेखि उद्यमीसम्मको अधिकार र कर्तव्यबारे जानकारी दिलाउन मेची र कोशीको सात पहाडी र हिमाली जिल्लामा अहिले अधिकार तथा जिम्मेवार व्यापारका लागि पैरवी शुरु भएको छ । उन्नति समावेशी वृद्धि कार्यक्रमअन्तर्गतको अभियानमा अन्तर्राष्ट्रिय श्रमिक संगठन आइएलओले सात जिल्लाका ३० वटा स्थानीय सङ्घ, संगठनसँगको सहकार्यमा पैरवी शुरु गरेको हो । पाँचथर, इलाम, ताप्लेजुङ, तेह्रथुम, धनकुटा, भोजपुर र संखुवासभामा शुरु भएको पैरवीका क्रममा किसानका हक अधिकार, श्रमिकको स्वास्थ्य, सुरक्षालगायतका विषय र व्यापारीका समस्या र जिम्मेवार व्यापारका विषयमा छलफल हुने गरेको कार्यक्रमका स्रोत व्यक्ति तोयानाथ भट्टराईले बताए । डेनमार्क सरकारको ३० लाख डलर र आइएलओको छ लाख डलर व्यहोर्ने गरी शुरु भएको पैरवीले कृषिका सरोकारवालाका लागि काम र व्यवसायिक वातावरण बनाउने अपेक्षा गरिएको छ ।रासस
कुबेर मर्चेन्टको नाम परिवर्तन, सिटी एक्सप्रेस इन्टरनेशनल फाइनान्स लिमिटेडबाट कारोबार गर्ने
काठमाडौं । कुबेर मर्चेन्ट फाईनान्स लिमिटेडको नाम परिवर्तन भएको छ । फाइनान्सले अाफ्नाे कम्पनीकाे नाम परिवर्तन गरि सिटी एक्सप्रेस इन्टरनेशनल फाइनान्स लिमिटेडबाट सेयर लगायत सम्पूर्ण कारोबार गर्ने भएको छ । नाम परिवर्तन सम्बन्धि कम्पनीको प्रस्तावलाई भदौ ४ गते सम्पन्न फाइनान्सको ११औं वार्षिक साधारण सभाले पारित गरेको हो । साथै, उक्त सभामा आर्थिक वर्ष २०७२/०७३ को वार्षिक प्रतिवेदन र प्रबन्ध पत्र तथा नियमावलीको संशोधन जस्ता प्रस्तावहरु पारित भएको कम्पनीका सचिव एवं प्रमुख कार्यकारी अधिकृत(सिईओ) गोपाल घिमिरेले जानकारी दिए । उक्त अवसरमा सभाका निर्णयहरु नियामक निकायहरुको स्वीकृति पछि लागू हुने घिमिरेले बताए । कम्पनीको ११औं वार्षिक साधारण सभामा संचालक समितिको निर्वाचन पनि रहेकोमा नयाँ लगानीकर्ता समेतको प्रतिनिधित्व गर्दै चन्द्र टण्डन र सन्दिप शर्मा नयाँ संचालक सदस्यमा निर्वाचित भएको जानकारी पनि घिमिरेले दिए । संचालक पदमा निर्वाचित भए पश्चात् शेयर सदस्यहरुको जिज्ञासा मेटाउने क्रममा संस्थालाई ३ देखि ४ वर्ष भित्रमा नाफाको अवस्थामा ल्याइने कम्पनीले जनाएको छ । साथै साधारण सभा सम्पन्न पश्चात बसेको संचालक समितिको २५० औं बैठकले चन्द्र टण्डनलाई अध्यक्षमा चयन गरेको छ । संस्थामा पारदर्शिता तथा संस्थागत सुशासन जस्ता विषयलाई प्रभावकारी रुपमा कार्यान्वयन गरी चाँडै नै समस्याग्रस्त अवस्थाबाट मुक्त गराउने पनि टण्डनले जानकारी गराए ।
सेयर दलाल र मर्चेन्ट बैंकर सुपरिवेक्षण दिग्दर्शन आयो, यस्ता छन् आधा दर्जन विशेषता
काठमाडौं । नेपाल धितोपत्र बोर्डले धितोपत्र व्यवसायीको सुपरिवेक्षण दिग्दर्शन, २०७४ लागु गरेको छ । बोर्डले भदौं ४ गतेदेखि लागु हुने गर दिग्दर्शन लागु गरेको हो । यसले सेयर बजारको सुपरिवेक्षणलाई थप प्रभावकारी, व्यवस्थित र अन्तराष्ट्रिय मूल्य मान्यता अनुरुप बनाउन सघाउने बोर्डका निर्देशक डा. नबराज अधिकारीले बताए । दिग्दर्शनले गैरस्थल र स्थलगत सुपरिवेक्षणको प्रकृया, सुपरिवेक्षण कर्ताको जिम्मेवारी, काम, कर्तव्य, अधिकार तथा उत्तरदायित्वका साथै सुपरिवेक्षकको आचारसंहिता समेत समेटेको छ । दिग्दर्शनले धितोपत्र व्यवसायीकोहरुको ऐन, नियम पालनाको अवस्थामा सुधार आई संस्थागत सुशासन सुदृढ हुने र समष्टिगतमा धितोपत्र व्यवसायीहरुको सेवाप्रवाहमा प्रभावकारिता आउने विश्वास पनि बोर्डले लिएको डा. अधिकारीले बताए । यस अघि नै बोर्डले आश्वा प्रणाली लागु गर्नेदेखि धितोपत्र व्यवसायी(मर्चेन्ट बैङ्कर) (पहिलो संशोधन) नियमावली, २०७४बाट मर्चेन्ट बैंकरको कार्य क्षेत्र विस्तारको काम गरिसकेको थियो । यस्ता छन दिग्दर्शनका बिशेषताहरु १) धितोपत्र व्यवसायीको सुपरिवेक्षण स्थलगत र गैरस्थलगत रुपमा नियमित गर्ने व्यवस्था गरिएको । २) धितोपत्र व्यवसायीको सुपरिवेक्षणका कार्यगत उदेश्यहरु तोकिएको । ३) जोखिममा आधारित सुपरिवेक्षणमा जोड दिइएको, ४) धितोपत्र व्यवसायीको नियमितरुपमा सुपरिवेक्षण गरिने व्यवस्था गरिएको । ५) धितोपत्र व्यवसायीको हिसाव किताव तथा लेखा, नियमनकारी निकायले तोकेका वित्तिय विवरणहरु तथा प्रतिवेदनको अवस्था, धितोपत्र व्यवसायीहरुले धितोपत्र सम्बन्धी प्रचलित कानूनको पालनको अवस्था, धितोपत्र व्यवसायीको काम कारवाहीको अवस्था, ग्राहक पहिचान विवरण, जोखिम व्यवस्थापन, सम्पत्ति शुद्धिकरण तथा आतंककारी क्रियाकलापमा वित्तिय लगानी सम्बन्धी विवरणको रिर्पोिटङ्गको अवस्था, कारोबार प्रणाली, भौतिक पूर्वाधार एवं जनशक्तिको अवस्था, आन्तरिक नियन्त्रण प्रणाली जस्ता विषयहरुको सुपरिवेक्षणमा जोड दिइएको । ६) सुपरिवेक्षकका काम, कर्तव्य, अधिकार तथा उत्तरदायित्वका साथै सुपरिवेक्षकको आचारसंहिता सम्बन्धी व्यवस्था समेत गरिएको ।
आइतबार नेप्से परिसूचक र कारोबार रकम दुबैमा गिरावट, ७९ करोडको सेयर किनबेच
काठमाडौं । आइतबार नेप्से परिसूचक र कारोबार रकम दुबैमा गिरावट भएको छ । साताको पहिलो दिन नेप्से ११ दशमलब ७८ अंकले घटेर १६१७ दशमलब ९७ अंकमा झरेको छ । दोहोरो अंकले घटेको बजारमा ७९ करोड ४६ लाख रुपैयाँ बराबरको सेयर कारोबार भएको छ । सबैभन्दा बढी प्राइम लाइफ इन्स्योरेन्स कम्पनीको ५ करोड रुपैयाँ माथिको सेयर कारोबार भएको छ । सो दिन १५९ कम्पनीको ४६ लाख ७८ हजार कित्ता सेयर किनबेच भएको छ । परिसूचका आधारमा होटल बाहेक सबै समूहको परिसूचक ओरालो लागेका छन् । सबैभन्दा बढी बीमा समूहको परिसूचक ३९ अंकले ओरालो लागेको छ । त्यस्तै, उत्पादनमूलक, हाइड्रोपावर, विकास बैंक र बैंकिङ समूहको परिसूचक क्रमशः २५, १५, १४ र १२ अंकले घटेका छन् । होटल समूहको परिसूचक भने सामान्य ४ अंकले उकालो लागेको छ । बजारमा सबैभन्दा बढी हिमालयन डिष्टीलरीको सेयर मूल्य करिब ९.९२ प्रतिशतले घटेको छ । त्यस्तै, वल्र्ड मर्चेन्ट बैंकिङ एण्ड फाइनान्सका लगानीकर्ताले पनि ९.१४ प्रतिशत गुमाएका छन् । दोहोरो अंकले घटेको बजारमा पनि स्वरोजगार लघुवित्त वित्तीय संस्थाको सेयर मूल्य ९.९७ प्रतिशतले बढेको छ ।
नेपाली सडकमा गुड्छन करीब २८ लाख गाडी, एक बर्षमै थपियो करीब ५ लाख सवारी
काठमाडौं । नेपालका सडकमा करीब २८ लाखको हारहारीमा गाडी गुड्दै आएका छन् । नेपालमा कुल २७ लाख ८३ हजार ४२८ सवारी साधन यातायात कार्यलयमा दर्ता छन् । गत आर्थिक बर्ष ०७३/०७४ मा मात्रै ४ लाख ४४ हजार २६९ नयाँ सवारी साधन दर्ता भएका छन् । विभागले ०७३ फागुन १८ देखि काठमाडौं उपत्यकामा भने २० बर्ष पुराना सवारी साधन चलाउन रोक लगाएको थियो । यातायात विभाग अन्तर्गतका कार्यालयले मात्रै १ बर्षमा २० अर्ब ३२ करोड २९ लाख ६२ हजार रुपैयाँ राजश्व संकलन गरेका छन् । यो राजश्वमध्ये सवारी साधन करबाट ८ अर्ब ७९ करोड ८५ लाख ८२ हजार संकलन भएको छ । सडक निर्माण तथा सम्भार दस्तुरबाट ८ अर्ब ५३ करोड २७ हजार तथा सवारी चालक अनुमतिपत्र र सवारी इजाजतको दस्तुरबाट २ अर्ब ४० करोड १५ लाख ४२ हजार रुपैयाँ संकलन भएको विभागले जनाएको छ । विभागले चालु आर्थिक वर्षमा सबै सवारी साधनहरुमा हाई सेक्युरिटी इम्बोस्ड् नम्बर प्लेट प्रयोग गर्ने व्यवस्था लागू गर्ने योजनासहित काम गरिरहेको छ । करीब २५ लाख सवारी साधनका नम्बर प्लेटलाई इम्बोस्ड् नम्बर प्लेटमा रुपान्तरण गरिने विभागले जनाएको छ । हालसम्म काठमाडौं उपत्यकामा रहेको सवारी चालक अनुमति पत्र कार्यालयबाट २ लाख ६० हजार सवारी चालक अनुमतिपत्रलाई स्मार्ट कार्डमा वितरण गर्नुको साथै काठमाडौं उपत्यका बाहिर कर्णाली अञ्चल बाहेकका सबै यातायात व्यवस्था कार्यालयहरुबाट स्मार्ट कार्ड वितरणको कार्य प्रारम्भ गरिएको विभागले जनाएको छ । विभागले सबै सवारी चालक अनुमतिपत्र र सवारी धनी प्रमाणपत्रलाई आगामी पाँच वर्ष भित्र स्मार्ट कार्डमा रुपान्तरण गर्ने भएको छ । देश भरिका करिब २५ लाख सवारी चालक अनुमतिपत्र तथा सवारी धनी दर्ता प्रमाणपत्रलाई ५ वर्षमा स्मार्ट कार्डमा रुपान्तरण गर्ने विभागका महानिर्देशक रुपनारायण भट्टराईले बताए । सवारी साधनको अनुगमन गरी ४१८ सवारी साधन कारवाहीमा परेका र उक्त सवारी साधनहरुबाट ११ लाख ७९ हजार रुपैयाँ राजश्व संकलन गरिएको विभागले जनाएको छ । गत आवमा यातायात व्यवस्था सुदृढिकरण आयोजना अन्तर्गत ६१ करोड ७९ लाख ९९ हजार रकम दिइएको थियो । सोमध्ये वार्षिक खर्च ४३ करोड २१ लाख ५८ हजार रहेको छ । जसमा वित्तिय प्रगति ७० प्रतिशत रहेको छ भने भौतिक प्रगति ८० प्रतिशत छ । मन्त्रालय अन्तर्गत सडक विभाग लगायत निकायहरुसँगको समन्वयमा जग्गा प्राप्ति गर्ने तथा भवन र ट्रायल सेन्टर बनाउने कार्यहरु अघि बढाउने बताएको छ । प्राविधिक कर्मचारीको आपूर्ति र अन्य जनशक्तिको व्यवस्थापन गर्ने तथा यातायातको क्षेत्रमा हुने अनियमिततामा शुन्य सहनशिलता कायम गर्नको लागि योजना अघि बढाउने महानिर्देशक भट्टराईले बताए ।
सिरहामा विद्युत् चुहावट १० प्रतिशत घट्यो
लहान । विद्युत् चुहावट नियन्त्रण अभियान सञ्चालन भएपछि आव २०७३/७४ मा सिरहामा १० प्रतिशत चुहावटमा कमी आएको छ । सिरहास्थित विद्युत् प्राधिकरण वितरण केन्द्रले चुहावट नियन्त्रणका लागि अभियान सञ्चालन गरेपछि चुहावट ४० प्रतिशतमा झरेको हो । विगत वर्षहरुमा करिब ५० प्रतिशत विद्युत् चुहावट हुँदै आएकामा आव २०७३÷७४ मा करिव १० प्रतिशत विद्युत् चुहावट घटेको विद्युत् केन्द्रका प्रमुख जितेन्द्र यादवले जानकारी दिए । समयमा विद्युत्को महसुल नबुझाउने जिल्लाका ८६५ ग्राहकको विद्युत् लाइनसमेत काटिएको थियो । विद्युत्को बक्यौता रकम समयमा नबुझाएको र पटक पटक समयमै विद्युत् महसुल बुझाउन आग्रह गर्दासमेत बेवास्ता गरेका ग्राहकको विद्युत् लाइन काटेको प्रमुख यादवको भनाइ छ । उनका अनुसार विद्युत् लाइन काटिएका ८६५ ग्राहकमध्ये ५४७ जना ग्राहकबाट १ करोड २३ लाख ६४ हजार ७ सय ९७ रुपैयाँ बक्यौता रकम संकलन भएको छ । विद्युत् लाइन काटिएका मध्ये ३२ जनाले महसुल बुझाए बापत ४५ लाख ३९ हजार रुपैयाँ संकलन भएको छ । केन्द्रले आव २०७३/७४ मा हुकिङ गरी विद्युत् चुहावट गर्ने ४८१ जनालाई पक्राउ गरी गरेको जरिवानमा ३० लाख ३६ हजार १ सय ५३ रुपैयाँ राजश्व संकलन हुनाका साथै सो क्रममा १०३ थान टिभी, १३१ थान पानी तान्ने मोटर, ६६ थान पङ्खा र ६ थान फ्रिजसमेत बरामद गरिएको प्रमुख यादवले बताए । रासस
