मध्य भोटेकोसीले १ अर्ब ४४ करोडको आईपीओ ल्याउँदै, ५० देखि १२०० कित्तासम्म भर्न पाइने
काठमाडौं । मध्य भोटेकोसी जलविद्युत् कम्पनी लिमिटेडले कात्तिक २८ गतेदेखि साधारण सेयर (आईपीओ) निष्कासन गर्ने भएको छ । कम्पनीले कर्मचारी संचय कोषका संचयकर्ता, संस्थापक संगठित संस्थाका कर्मचारी र ऋणदाता संस्थाका कर्मचारीलाई गरी २४ प्रतिशत अर्थात १ अर्ब ४४ करोड रुपैयाँ बराबरको १ करोड ४४ लाख कित्ता आईपीओ निष्कासन गर्न लागेको हो । कम्पनीले कर्मचारी सञ्चयकोषका संचयकर्तालाई १ अर्ब १७ करोड रुपैयाँ बराबरको १ करोड १७ लाख कित्ता निष्कासन गर्न लागेको छ । जसअनुसार संचयकर्ताले आगामी कात्तिक २८ गतेदेखि मंसिर १४ गतेसम्म आवेदन दिने व्यवस्था गरिएको भोटेकोसीका प्रमुख कार्यकारी अधिकृत (सीईओ) मणिप्रसाद काफलेले जानकारी दिए । त्यसैगरी, संगठित संस्थाका कर्मचारीलाई २१ करोड रुपैयाँ बराबरको २१ लाख कित्ता र ऋणदाता संस्थाका कर्मचारीलाई ६ करोड रुपैयाँ बराबरको ६ लाख कित्ता आईपीओ निष्कासन गर्न लागेको छ । संस्थाका कर्मचारीलाई आगामी मंसिर १८ गतेदेखि २६ गतेसम्म आवेदन भर्न पाउनेछन् ।लगानीकर्ताले न्युनतम ५० कित्तादेखि अधिकतम १२०० कित्तासम्म आवेदन दिने पाइने उनले बताए । उनका अनुसार आवेदनपत्र भोलि (बिहीबार) प्रकाशित हुनेछ । कोषका संचयकर्ताले न्युनतम् ५० वा सो भन्दा बढी १० अंकले भाग जाने संख्यामा अधिकतम ५०० कित्तासम्म आवेदन दिन पाउने भएका छन् । संचय कोषका कर्मचारीले ५० लेखि बढीमा १ हजार २०० कित्तासम्म आवेदन दिन पाउने काफलेले जानकारी दिए । दोस्रो चरणमा आयोजना प्रभावित सिन्धुपाल्चोकवासीलाई १० प्रतिशत अर्थात ६० करोड रुपैयाँ बराबरको ६० लाख कित्ता र सर्वसाधारणलाई १५ प्रतिशत अर्थात ९० करोड रुपैयाँ बराबरको ९० लाख कित्ता आईपीओ निष्कासन गर्ने सीईओ काफलेले जानकारी दिए । कम्पनीले सिन्धुपाल्चोमा १०२ मेगावाट क्षमताको मध्यभोटेकोसी आयोजना निर्माण गरिरहेको छ । आयोजनाबाट आगामी २०७६ असारदेखि बिजुली उत्पादन गर्ने लक्ष्य लिइएको छ । आयोजना बनाउन निर्माण अवधिको ब्याजबाहेक १४ अर्ब ८३ करोड ९२ लाख रुपैया लाग्ने अनुमान गरिएको छ । मध्यभोटेकोसीमा नेपाल विद्युत प्राधिकरण र चिलिमे जलविद्युत कम्पनी लिमिटेड मुख्य लगानी छ । आयोजनामा विद्युत प्राधिकरणको १०, चिलिमेको ३७ प्रतिशत स्वामित्व छ । सिन्धुपाल्चोक हाइड्रोपावर कम्पनी लिमिटेड, अरनिको हाइड्रोपावर कम्पनी लिमिटेड र सिन्धुभोटेकोसी हाइड्रो कम्पनी लिमिटेडको ३ प्रतिशत लगानी छ । ४९ प्रतिशत साधारण सेयरधनी र ५१ प्रतिशत संस्थापक सेयरधनीको स्वामित्व छ । संचय कोषका संचयकर्ताको १९.५, संस्थाका कर्मचारीको ३.५, सर्वसाधारणको १५ र आयोजना प्रभावित सिन्धुपाल्चोकवासीलाई १० प्रतिशत सेयर छुट्टाईएको छ ।
“लखपति एक्स्प्रेस” योजनाकोे विजेता बासु थापा क्षेत्री, जिते एक लाख रुपैयाँ
काठमाडौं । सिटी एक्स्प्रेसले “लखपति एक्स्प्रेस” उपहार योजनाको पहिलो महिनाको विजेता घोषणा गरेको छ । हालै गरिएको उपहार घोषणा अन्तर्गत कोरीयाको जीमनी ट्रान्स(सिटी एक्स्प्रेसको सहायक संस्था)बाट पैसा पठाई पहिलो महिनाको १ लाख रुपैयाँको मासिक लक्की ड्रमा परी बासु थापा क्षेत्री विजेता घोषित भएका छन् । उक्त नगद पुरस्कार कम्पनीमा आयोजित समारोहबीच कम्पनीेका प्रबन्ध निर्देशक चन्द्र टण्डनले वितरण गरेका हुन् ।उक्त योजना अन्तर्गत लक्कीड्र मार्फत उपभोक्ताहरुले दैनिक २०० रुपैयाँको मोबाइल टप अप १२ जनाले जित्न सक्नेछन् । त्यसैगरी, साप्ताहिक रुपमा तीन जना विजेताहरुले १० हजार रुपैयाँ हरेक महिना लक्की ड्रमा विजयी हुने एक जनाले एक लाख रुपैयाँ जित्न सक्नेछन् । उपहार योजनाको अन्त्यमा एक जना भाग्यशाली विजेताले बम्पर उपहार र सिटी एक्स्प्रेस मनी ट्रान्सफर १२औं बर्ष प्रवेश गरेको उपलक्ष्यमा १२ लाख रुपैयाँ जित्न सक्ने घोषणा भएको थियो । यो अफर असोज १ गते देखि मंसिर २९ गते सम्म लागू हुनेछ । यो अवधिभर सिटी एक्सप्रेस मार्फत मनी ट्रान्स्फर गर्ने सम्पूर्ण सेवाग्राही यो उपहार योजनामा सहभागी हुनेछन् । यस उपहार योजना अवधिमा हालसम्म दैनिक उपहार योजना अन्तर्गत ४३ जनाले २०० रुपैयाँको मोबाइल टप अप, साप्ताहिक रुपमा १५ जना विजेताले १० हजार रुपैयाँ जिति सकेका छन् । ती सबै उपहारहरु विद्युतीय लक्की ड्र मार्फत विजेता छनौट गरिएको कम्पनीले जनाएको छ ।
क्याफे कफी डेको तेस्रो आऊटलेट दरबारमार्गमा
काठमाडौं । क्याफे कफी डेले नेपालको दरबारमार्गमा शाखा विस्तार गरेको छ । अष्ट्रीया, चेक रिपब्लिक, मलेशिया, इजिप्ट लगायतका देशमा शाखा स्थापना गरेको कफीडेले नेपालमा पनि आफ्नो शाखा विस्तर गरिरहेको छ । नायिका स्वस्तिमा खड्काले क्याफेको औपचारीक उद्घाटन गरेकी थिइन् । नेपालमा ब्राड क्याफे कफी डेका मास्टर फैंचाइजी र स्तव्य हस्पिटालिटीका निर्देशक रवि तिब्बरालाले भने, “ हामीले दरबारमार्गमा एउटा नयाँ आउटलेट लन्च गरेकोमा एकदमै खुसी छौँ ।” उक्त नयाँ आउटलेटमा दुईवटा फ्लोरमा विभाजित गरिएको र पहिलो तल्लामा ४० जना बस्ने क्षमता छ भने दोश्रो तल्लामा ३० जनाको क्षमतारहेको क्याफेले जानकारी दिएको छ । सीसीडी नामले प्रख्यात क्याफेकफी डेले आफ्नो कफीको उत्पादन आफ्नै बगानको स्रोतबाट गर्दछ । कफी डेले युरोप र जापान सहित सम्पूर्ण युरोपमा पनि यसको उपस्थिति जनाएको छ, जसले गर्दा यो भारतको शीर्ष कफी निर्यातको रुपमा चिनाएको छ सिसिडीले दाबी गरेको छ ।
बैंकमा जनताको पैसा १५ खर्ब ५२ अर्ब पुग्यो, कसको कति (सूचिसहित)
¨ काठमाडौं । बैंक तथा वित्तीय संस्थामा व्यक्तिगत निक्षेप झण्डै २ प्रतिशत वृद्धि भएको छ । गत भदौसम्म व्यक्तिगत निक्षेप बढेर १५ खर्ब ५२ अर्ब ७५ करोड रुपैयाँ पुगेको छ । चालु आर्थिक वर्षको २ महिनामा बैंक तथा वित्तीय संस्थामा व्यक्तिगत निक्षेप २७ अर्ब ४७ करोड रुपैयाँ थप भएको नेपाल राष्ट्र बैंकले जनाएका छ । कुल निक्षेपको ६० प्रतिशत बढी व्यक्तिगत रहेको छ । गत भदौसम्म बैंक तथा वित्तीय संस्थाको निक्षेप परिचालन बढेर २८ खर्ब ७५ अर्ब ७९ करोड रुपैयाँ पुगेको छ । चालु आर्थिक वर्षको २ महिनामा निक्षेप ३९ अर्ब १४ करोड रुपैयाँ थप भएको केन्द्रीय बैंकले सार्वजनिक गरेको विवरणमा उल्लेख छ । बैंक तथा वित्तीय संस्थामा बीमा कम्पनीहरुको १ खर्ब ८९ अर्ब ४४ करोड रुपैयाँ पुगेको छ । कर्मचारी संचय कोषको ५० अर्ब ९१ करोड र नागरिक लगानी कोषको ६३ अर्ब २७ करोड रुपैयाँ रहेको छ । यस्तै सार्वजनिक संस्थानको २ खर्ब ६४ अर्ब ९२ करोड, अन्तर बैंक निक्षेप ९७ अर्ब ६० करोड रुपैयाँ रहेको छ । बैंक तथा वित्तीय संस्थाहरुले लगानीयोग्य पुँजी (क्रेडिट क्रन्च) भएको बताए पनि व्यक्तिगत निक्षेप भने बढेको छ ।
बरुण हाइड्रोपावरको कात्तिक २० गते बुक क्लोज, वार्षिक साधारणसभामा जाँदै
काठमाडौं । बरुण हाइड्रोपावर कम्पनी लिमिटेडको आगामी कात्तिक २० गते बुक क्लोज हुने भएको छ । कम्पनीले वार्षिक साधारणसभामा जानको लागि उक्त एक दिन सेयर खरिद बिक्री गर्ने कार्य बन्द गर्न लागेको हो । यस कम्पनी आगामी कात्तिक २५ गते १५औं वार्षिक साधारणसभामा जाँदै छ । सभा उक्त दिन बिहान ११ बजे काठमाडौंको अनामनगरमा रहेको युनियन हाउसमा बस्दै छ । सभामा कम्पनीले गत आर्थिक वर्षको वार्षिक प्रतिवेदन सम्बन्धि छलफर गरी पारित गर्ने भएको छ । साथै, सञ्चालक समितिको निर्वाचन गर्ने कम्पनीले जनाएको छ ।
नेपाल क्यान्सर अस्पतालकाे तेस्रो ‘क्यान्सर सर्भाइभर मिट’
काठमाडौं। नेपाल क्यान्सर अस्पतालले तेस्रो ‘क्यान्सर सर्भाइभर मिट’ गरेको छ। मंगलबार अस्पतालमा कार्यक्रम गरी स्तन क्यान्सर भएका बिरामीसँग अन्तरक्रिया गएिको हो। कार्यक्रममा स्तन क्यान्सर सर्भाइभर वन्दना शर्माले आफ्नो अनुभव सुनाइन्। ‘रोगले भन्दा बढी डरले गाल्ने रहेछ’, उनले भनिन्’, त्यसैले क्यान्सर राेगीले उपचारसँगै आत्मबल पनि बलियो बनाउनुपर्छ।’ कार्यक्रममा हेल्थ ह्यापिनेस ट्रेनर सिमन न्यौपानेले कारणविनै खुशी हुने अभ्यास गरे शरीरको रोग प्रतिरोधात्मक शक्ति बढ्ने तर्क गरे। ‘जो हाँस्न जान्दैन, त्यो बाँच्न पनि जान्दैन’, उनले भने, ‘जब रोगले च्याप्दै जान्छ तब स्वास्थ्य ठूलो भन्ने थाहा हुन्छ।’ कार्यक्रममा ६० भन्दा बढी क्यान्सर सर्भाइभर रोगी सहभागी भएको अस्पतालले जनाएको छ। सुदीप्त (जीवनको नयाँ बिहानी) नेपाल क्यान्सर सहयोग समूहको इकाइ र नेपाल क्यान्सर हस्पिटल एण्ड रिसर्च सेन्टरको संयुक्त आयोजनामा कार्यक्रम गरिहेको हो। अक्टुबर महिनाभर स्तन क्यान्सरसम्बन्धी विभिन्न कार्यक्रम गरेको अस्पतालले जनाएको छ। अस्पतालले भदौदेखि क्यान्सर सर्भाइभर मिट गर्दै आएको छ।
बीपी कोइरालाका तत्कालीन अध्यक्ष डा. श्रेष्ठ भ्रष्टाचारको मुद्धामा दोषी ठहर
काठमाडौं। विशेष अदालतले चितवन भरतपुरस्थित बीपी कोइराला क्यान्सर अस्पतालका तत्कालीन अध्यक्ष डा भक्तमान श्रेष्ठलाई भ्रष्टाचारको मुद्धामा दोषी ठहर गरेको छ । विशेष अदालतका अध्यक्ष बाबुराम रेग्मी, न्यायाधीशद्वय रत्नबहादुर बागचन्द, प्रमोदकुमार श्रेष्ठ वैद्यको इजलासले आज उनलाई एक वर्ष कैद र रु एक करोड १८ लाख ६६ हजार ७७६ जरिवानाको फैसला गरेको विशेष अदालतका रजिष्ट्रार भीमकुमार श्रेष्ठले जानकारी दिए। डा श्रेष्ठ अस्पतालको अध्यक्ष हुँदा रु एक करोड ६७ लाख ५७ हजार ११३ स्रोत नखुलेको (अवैध) सम्पत्ति आर्जन गरेको उल्लेख गर्दै अख्तियार दुरुपयोग अनुसन्धान आयोगले विसं २०७२ फागुन २ गते विशेष अदालतमा मुद्दा दर्ता गरेको थियो । अदालतले रु ४८ लाख ९० हजार ३३७ बैध सम्पत्ति कमाएको ठहर गरेको छ । बाँकी रु एक करोड १८ लाख ६६ हजार ७७६ अवैध सम्पत्ति आर्जन गरेको ठहर गर्दै विशेष अदालतले यो बराबर डा श्रेष्ठको सम्पति जफत हुने फैसलो गरेको हो । अदालतले डा श्रेष्ठकी श्रीमती शिलु श्रेष्ठलाई भने सफाइ दिएको छ । डा श्रेष्ठ विशेषज्ञ चिकित्सकका रूपमा सो अस्पतालमा २०५४ सालमा सेवा प्रवेश गरी २०६४ भदौदेखि २०६७ सालसम्म क्यान्सर अस्पतालको कार्यकारी निर्देशक भएका थिए। रासस
काठमाडौं, भक्तपुर र ललितपुरका १८ नगरको घोषणाः विद्या सुन्दरको नेतृत्वमा संसारकै उत्कृष्ठ शहर
काठमाडौं । काठमाडौं उपत्यका भित्रका १८ वटा नगरपालिकाहरुले संसारकै उत्कृष्ठ शहर निर्माण गर्ने उद्घोष गरेका छन् । काठमाडौं महानगरपालिकाका प्रमुख विद्या सुन्दर शाक्यको नेतृत्वमा उपत्यका नगरपालिका फोरम गठन गरेर उनीहरुले आफ्नै कार्यकाल भित्र उपत्यकालाई संसारकै उत्कृष्ठ शहर निर्माण गर्ने घोषणा गरेका हुन् । काठमाडौं उपत्यकाको फोहोरमैला व्यवस्थापन, सडक सञ्जाल, साझा नदीको उपयोग व्यवस्थापन, कर प्रणाली, पुरातात्विक तथा सांस्कृतिक पद मार्ग निर्माणलगायतका क्षेत्रमा साझा सोच, कार्यक्रम र योजना निर्माण संसारकै उत्कृष्ठ शहर बनाउने सामुहिक प्रतिवद्धता उनीहरुले व्यक्त गरिएको काठमाडौं महानगरपालिकाका मेयर विद्या सुन्दर शाक्यले जानकारी दिए । फोरमको पहिलो बैठकमा फोहोरमैला व्यवस्थापनका विषयमा बढी केन्द्रित भएर छलफल गरेको पनि मेयर शाक्यले जानकारी दिए । बैठकले जारी गरिएको ९ बुँदे घोषणा पत्रमा काठमाडौं उपत्यकाको वातावरणीय प्रदूषणलाई न्युनीकरण गरी बस्न योग्य, जीवन्त तथा उन्नत सहर बनाउन महानगरपालिका÷नगरपालिकाहरु संयुक्त तथा एकल रुपमा कार्य गर्ने, वातावरण सम्बन्धी नीति, कानुन र मापदण्ड तर्जुमा गर्न तथा प्रभावकारी कार्यान्वयन गरी प्रदुषण घटाउन संस्थागत संरचनाहरु परिचालित गर्ने उल्लेख गरिएको छ । ‘स्वच्छ वातावरणमा नवजीवनका लागि अत्यावश्यक भएकोले काठमाडौं उपत्यकाको हालको प्रदुषणको मात्रालाई क्रमशः न्यूनीकरण गर्दै जानेछौं,’ नौँ बुँदेमा भनिएको छ, ‘स्स्वच्छ तथा स्वस्थ वातावरण मानवको मौलिक हक तथा नैसर्गिक अधिकार भएकोले यसतर्फ काठमाडौं उपत्यका भित्रका स्थानीय सरकारहरु सचेत, संवेदनशील र मानव हित प्रबद्र्धन गर्न कटिबद्ध छौँ ।’ बैठकमा नगरपालिका यातायात गुरुयोजना, सडक यातायात, करको दर र एकरुपता कायम गराउने विषय, जग्गा विकास आयोजना सञ्चालन, खरिद ऐनमा एक रुपता, प्रदुषण नियन्त्रण प्रयास, प्रदुषण शुल्क र यसको उपयोग, सामुदायिक र सरकारी बन, नियमावली निर्माण र कार्यान्वयनजस्ता विषयमा पनि गहन छलफल भएको थियो । बैठकमा उठेका विषयहरुमध्ये कतिपय नीतिगत व्यवस्था गर्नु पर्ने र कतिपय कार्यान्वयन गर्नु पर्ने भएकोले विषयलाई कार्यसमितिले बर्गीकरण गरेर आगामी बैठकमा प्रस्तुत गर्ने तयारी गरेको पनि उपत्यका नगरपालिका फोरमले जानकारी दिएको छ । उपत्यकाको दिगो विकासका लागि साझा धारणा तय गर्ने भन्दै गत भदौ २२ गते उपत्यका नगरपालिकाका प्रमुख र उप–प्रमुखको भेलाले उपत्यका फोरमको गठन गरेको हो । ११ सदस्यीय कार्य समिति रहेको फोरमको उप–संयोजकमा ललितपुर महानगरका उप–प्रमुख गीता सत्याल र सचिवमा मध्यपुर ठिमी नगरका प्रमुख मदनसुन्दर श्रेष्ठ छन् । कार्यसमिति सदस्यमा काठमाडौंको चन्द्रागिरी नगरपालिकाका प्रमुख धनश्याम गिरी, कागेश्वरी मनोहरा नगरपालिकाका प्रमुख कृष्णहरि थापा, कीर्तिपुर नगरपालिकाका प्रमुख रमेश महर्जन, गोकर्णेश्वर नगरपालिकाका उपप्रमुख शान्ति नेपाल, तारकेश्वर नगरपालिकाका उपप्रमुख भवानी डोटेल र टोखा नगरपालिकाका उपप्रमुख ज्ञानमाया डंगोल,ललितपुरको गोदावरी नगरपालिका प्रमुख गजेन्द्र महर्जन र भक्तपुरको चाँगुनारायण नगरपालिका प्रमुख सोमप्रसाद मिश्र छन् ।
