काठमाडौं । नेरुडे मिर्मिरे लघुवित्त वित्तीय संस्था लिमिटेडको प्रमुख कार्यकारी अधिकृत (सीईओ) मा मिनबहादुर बोहरा नियुक्त भएका छन् ।
संस्थाको सञ्चालक समितिको ४०५औँ बैठकले गरेको निर्णयअनुसार बोहराको नियुक्ति २०८३ असोज १ गतेदेखि लागू भएको हो ।
यसअघि प्रमुख कार्यकारी अधिकृत रहेका केशवकुमार पौडेलले व्यक्तिगत तथा घरायसी कारण देखाउँदै दिएको राजीनामा सञ्चालक समितिले असोज १ गतेदेखि लागू हुने गरी स्वीकृत गरेपछि रिक्त पदमा बोहरालाई नियुक्त गरिएको हो ।
नवनियुक्त सीईओ बोहरासँग लघुवित्त तथा बैंकिङ क्षेत्रमा लामो समय काम गरेको अनुभव छ । उनले कालिका लघुवित्त वित्तीय संस्था र धौलागिरी लघुवित्त वित्तीय संस्थामा प्रमुख कार्यकारी अधिकृत तथा नेपाल एग्रो लघुवित्त वित्तीय संस्थामा कायममुकायम प्रमुख कार्यकारी अधिकृतका रूपमा काम गरिसकेका छन् ।
त्यस्तै, बोहराले नेरुडे मिर्मिरे लघुवित्तमै नायब कार्यकारी प्रमुखको जिम्मेवारीसमेत सम्हालिसकेका छन् ।
उनसँग नेपाल कम्युनिटी डेभलपमेन्ट बैंकमा कायममुकायम प्रमुख कार्यकारी अधिकृत तथा कम्पनी सचिवका रूपमा काम गरेको अनुभव छ । ग्रामीण विकास बैंक (नेपाल ग्रामीण बैंक) मा शाखा प्रबन्धक तथा अनुगमन तथा मूल्यांकन विभागमा समेत उनले जिम्मेवारी सम्हालेका थिए। उनको व्यावसायिक यात्रा ग्रामीण विकास बैंकबाट सुरु भएको हो ।
बोहरा सीईओको जिम्मेवारीमा प्रवेश गर्दा नेरुडे मिर्मिरे लघुवित्त वित्तीय सुधार र व्यवसाय विस्तारको महत्वपूर्ण चरणमा रहेको छ ।
आर्थिक वर्ष २०८२/८३ को चौथो त्रैमासिकको अपरिष्कृत वित्तीय विवरणअनुसार संस्थाको कुल सम्पत्ति २० अर्ब ९५ करोड ९४ लाख रुपैयाँ रहेको छ । त्यस्तै, ग्राहकलाई प्रवाह गरेको कर्जा १९ अर्ब ३२ करोड २४ लाख रुपैयाँ र निक्षेप ७ अर्ब ६९ करोड ६७ लाख रुपैयाँ रहेको छ ।
सो अवधिमा संस्थाले २३ करोड ५९ लाख रुपैयाँभन्दा बढी खुद नाफा कमाएको छ । संस्थाको निष्क्रिय कर्जा १९.८६ प्रतिशत रहेको वित्तीय विवरणमा उल्लेख छ ।
नयाँ नेतृत्वका लागि कर्जा गुणस्तर सुधार, कर्जा असुली, जोखिम व्यवस्थापन, पूँजी तथा वित्तीय स्थायित्व र सञ्चालन दक्षता बढाउने विषय प्रमुख चुनौतीका रूपमा देखिएका छन् ।
संस्थाले नयाँ नेतृत्वसँगै संस्थागत सुशासन, कर्जा असुली, जोखिम व्यवस्थापन, व्यवसायिक दक्षता, डिजिटल सेवा तथा दीगो वित्तीय स्थायित्वमा थप सुधार हुने अपेक्षा गरेको छ ।
